ក្រុមហ៊ុនជប៉ុន ចំនួន១៥នឹងទទួលបានមូលនិធិពីរដ្ឋជាង២៣០លានដុល្លារ ដើម្បីផលិតបន្ទះឈីបនៅអាស៊ាន

ក្រសួងសេដ្ឋកិច្ច ពាណិជ្ជកម្ម និងឧស្សាហកម្មរបស់ប្រទេសជប៉ុន នឹងប្រកាសពីគម្រោងជាក់លាក់ចំនួន១៣ ដែលនឹងត្រូវជ្រើសរើស ដើម្បីអាចទទួលបានជំនួយសរុបចំនួន២៣៨លានដុល្លារ ពីរដ្ឋាភិបាលជប៉ុន ដែលជាផ្នែកមួយនៃកញ្ចប់ថវិកា៦៧៩លានដុល្លារអាម៉េរិក។ គម្រោងទាំងនេះ គឺស្ថិតនៅតាមបណ្ដារដ្ឋជាសមាជិកអាស៊ាន ដែលពាក់ព័ន្ធនឹងការអភិវឌ្ឍបច្ចេកវិទ្យា និងការវិនិយោគ ដែលរំពឹងទុកថា នឹងផ្តល់អត្ថប្រយោជន៍យ៉ាងច្រើនសម្រាប់អាជីវកម្មជប៉ុន នៅក្នុងតំបន់ និងប្រឆាំងនឹងឥទ្ធិពលរបស់ប្រទេសចិន។

ជំនួយរបស់រដ្ឋាភិបាលជប៉ុននេះ នឹងបានមកពីកម្មវិធីឧបត្ថម្ភធនដែលទំហំសរុបជាង៩៥១លានដុល្លារ ដែលផ្តោតលើការវិនិយោគនៅក្នុងតំបន់ភាគខាងត្បូងនៃពិភពលោក (Global South) ដែលត្រូវបានកំណត់កាលពីឆ្នាំមុន។

ឧស្សាហកម្មបន្ទះឈីបនឹងក្លាយជាផ្នែកដ៏សំខាន់នៃគម្រោងខ្សែច្រវាក់ផ្គត់ផ្គង់ ខណៈដែលទីក្រុងតូក្យូ គ្រោងនឹងគាំទ្រខ្សែច្រវាក់ផលិតកម្មវេចខ្ចប់បន្ទះឈីប ដែលកំពុងសាងសង់ដោយក្រុមហ៊ុន Mitsumi Electric នៅប្រទេសហ្វីលីពីន។

ចំណែកក្រុមហ៊ុន Isuzu និងក្រុមហ៊ុន Mitsubishi Corp​ កំពុងសាកល្បងគម្រោងមួយ ដើម្បី​​ ផលិតរថយន្តអគ្គិសនី និងថ្ម ឬអាគុយ នៅក្នុងប្រទេសថៃ ខណៈដែលក្រុមហ៊ុន Sojitz និងក្រុមហ៊ុន Green Power Development នឹងទទួលបានមូលនិធិសម្រាប់ការសាកល្បងផលិតឥន្ធនៈអាកាសចរណ៍ប្រកបដោយនិរន្តរភាព (SAF) នៅតំបន់អាស៊ីអាគ្នេយ៍ផងដែរ៕

អត្ថបទ៖ សុខ មង្គល