គ្រាន់តែនិយាយពាក្យ«មិនដែលទិញអង្ករ»ធ្វើឱ្យរដ្ឋមន្ត្រីកសិកម្មរបស់ជប៉ុនបាត់តំណែង

លោក តាគូ អេតូ រដ្ឋមន្ត្រីកសិកម្មជប៉ុនបានរងសម្ពាធ និងការរិះគន់យ៉ាងខ្លាំងពីមហាជន និងសមាជិកសភាមកពីគណបក្សប្រឆាំង ក្រោយសារព័ត៌មានបានរាយការណ៍ពីអ្វី ដែលលោកបាននិយាយនៅក្នុងពិធីរៃអង្គាសថវិកានយោបាយកាលពីចុងសប្តាហ៍មុនថា លោកមិនដែលទិញអង្ករឡើយ ព្រោះអ្នកគាំទ្របានផ្ដល់អង្ករឱ្យលោកហូបមិនអស់។ ពាក្យពេជន៍ប៉ុន្មានម៉ាត់នេះបានបន្ថែមភ្លើងកំហឹងដល់ក្រុមអ្នកបោះឆ្នោត ដែលបានខឹងសម្បារស្រាប់ហើយអំពីការកើនឡើងតម្លៃអាហារសំខាន់ៗដោយសារទិន្នផលធ្លាក់ចុះ គួបផ្សំការកើនឡើងតម្រូវការប្រើប្រាស់ពីវិស័យទេសចរណ៍។

លោក អេតូ បានប្រាប់អ្នកយកព័ត៌មានបន្ទាប់ពីបានប្រគល់លិខិតលាលែងពីតំណែងរបស់លោកនៅការិយាល័យនាយករដ្ឋមន្ត្រីថា លោកបានថ្លែងសុន្ទរកថាមិនសមរម្យមួយចំពេលពលរដ្ឋកំពុងរងគ្រោះដោយការឡើងថ្លៃអង្ករ។

ក្រោយការលាលែងភ្លាមៗ នាយករដ្ឋមន្ត្រីជប៉ុនលោក ស៊ីហ្គេរូ អ៊ីស៊ីបា បានតែងតាំងអតីតរដ្ឋមន្ត្រីក្រសួងបរិស្ថានលោក ស៊ីនជីរ៉ូ កយហ្ស៊ូមី (Shinjiro Koizumi) ឱ្យដឹកនាំក្រសួងកសិកម្មជំនួសលោក អេតូ។ បើតាមការអះអាងរបស់នាយករដ្ឋមន្ត្រីជប៉ុន លោក កយហ្ស៊ូមី ជាអ្នកមានបទពិសោធ មានចំណេះដឹងខ្ពស់ និងមានចំណង់ចំណូលចិត្តសម្រាប់វិស័យកសិកម្ម និងនេសាទ។

សូមរំលឹកថា ការកើនឡើងតម្លៃអង្ករទ្វេដងនៅឆ្នាំនេះធៀបនឹងឆ្នាំមុនបានក្លាយជាកង្វល់ដ៏ចម្បងមួយសម្រាប់អ្នកបោះឆ្នោតនៅប្រទេសជប៉ុន ដែលធ្លាប់តែមានអប្បផរណា និងធ្លាប់តែមានការកែសម្រួលប្រាក់ឈ្នួលតម្រូវតាមការធ្លាក់ចុះអតិផរណាជាយូរឆ្នាំមកហើយ៕
ដោយ៖ សុខ មង្គល