ទំហំពាណិជ្ជកម្មក្រៅប្រទេសរបស់ឡាវ កាលពីខែមករា ឆ្នាំ២០២៦ បានស្ទុះឡើងក្នុងកម្រិតមួយខ្ពស់មិនធ្លាប់មាន ដោយសម្រេចបានការនាំចេញទៅកាន់ទីផ្សារអន្តរជាតិ រហូតដល់ជិត៨៨៧លានដុល្លារ មានការកើនឡើងរហូតដល់៣៦%។ កំណើនដ៏គួរឱ្យកត់សម្គាល់នេះ កើតឡើងបន្ទាប់ពីឡាវ បានឆ្លងកាត់បទពិសោធមិនល្អកាលពីឆ្នាំ២០២៥ ដែលកាលនោះ ឡាវ បានជួបប្រទះឱនភាពពាណិជ្ជកម្មចំនួន៨៩ លានដុល្លារ បើទោះបីជាកាលពីឆ្នាំ២០២៤ ធ្លាប់សម្រេចបានអតិរេកពាណិជ្ជកម្មរហូតដល់១,៥៤ពាន់លានដុល្លារក៏ដោយ។ តាមរយៈសម្ទុះដ៏ខ្លាំងក្លានៅដើមឆ្នាំនេះ ឡាវ រំពឹងថា នឹងអាចលុបបំបាត់ឱនភាពពាណិជ្ជកម្មកាលពីឆ្នាំមុន ហើយឈានទៅរកការបង្កើតអតិរេកពាណិជ្ជកម្មជាថ្មីម្ដងទៀតនៅក្នុងឆ្នាំ២០២៦ នេះ។
អ្នកវិភាគសេដ្ឋកិច្ចបានលើកឡើងថា ចន្ទល់ដ៏សំខាន់នៃការនាំចេញរបស់ឡាវនាពេលបច្ចុប្បន្ន គឺបណ្ដាញផ្លូវរថភ្លើង ដោយហេដ្ឋារចនាសម្ព័ន្ធផ្លូវដែកនេះ បានអនុញ្ញាតឱ្យឡាវពង្រីកការតភ្ជាប់យ៉ាងទូលំទូលាយជាមួយទីផ្សារអន្តរជាតិ ជាពិសេសទីផ្សារចិន ដែលសូម្បីតែប្រទេសថៃ ក៏ត្រូវពឹងផ្អែកលើច្រកផ្លូវដែកនេះ សម្រាប់ការនាំចេញផលិតផលមួយផ្នែករបស់ខ្លួនផងដែរ។
ដោយមើលឃើញពីសក្តានុពលនៃការតភ្ជាប់នេះ កម្ពុជា ដែលមានព្រំប្រទល់ភាគឦសានជាប់នឹងប្រទេសឡាវ ក៏កំពុងពង្រឹងកិច្ចសហប្រតិបត្តិការសេដ្ឋកិច្ចយ៉ាងសកម្មជាមួយប្រទេសក្បែរខាងមួយនេះផងដែរ។ ជាក់ស្តែងកាលពីថ្ងៃទី១៣ ខែកុម្ភៈ កន្លងទៅនេះ កម្ពុជា និងឡាវ បានចុះហត្ថលេខាលើកិច្ចព្រមព្រៀងថ្មីមួយ ដើម្បីជំរុញការតភ្ជាប់ការដឹកជញ្ជូនឆ្លងកាត់ព្រំដែនឱ្យកាន់តែមានប្រសិទ្ធភាព។
ជាមួយគ្នានេះ ខេត្តអាត់តាពើ របស់ឡាវ និងខេត្តរតនគិរីរបស់កម្ពុជា បានព្រមព្រៀងគ្នាក្នុងការអភិវឌ្ឍប្រព័ន្ធដឹកជញ្ជូនរវាងខេត្តទាំងពីរ ដោយបច្ចុប្បន្នស្ថាប័នជំនាញកំពុងបង្កើតក្រុមការងារបច្ចេកទេសរួមគ្នា ដើម្បីត្រួតពិនិត្យការអនុវត្ត និងរៀបចំបទប្បញ្ញត្តិសម្រាប់ការចែករំលែកព័ត៌មានជាប្រចាំ។ កិច្ចព្រមព្រៀងនេះ មានគោលបំណងបង្កើនប្រសិទ្ធភាពភស្តុភារកម្ម កាត់បន្ថយចំណាយ និងពង្រឹងបណ្តាញតភ្ជាប់ឆ្លងកាត់ព្រំដែនឱ្យកាន់តែរឹងមាំ ដើម្បីទាញយកផលប្រយោជន៍ពីកំណើនសេដ្ឋកិច្ចក្នុងតំបន់៕
ដោយៈ សរ សុជាតិ
