លោកបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា បានគូសបញ្ជាក់ថា ជាទូទៅដំណើរទស្សនកិច្ចរបស់ថ្នាក់ដឹកនាំប្រទេសអាស៊ានមួយទៅកាន់ប្រទេសអាស៊ានផ្សេងទៀត គឺដើម្បីបង្ហាញអំពីរបៀបរបបនៃកិច្ចការអាស៊ាន និងពង្រឹងកិច្ចសហប្រតិបត្តិការទាំងក្នុងប្រកខណ្ឌអាស៊ាន និងក្របខណ្ឌទ្វេភាគី។ ដូច្នេះនៅក្នុងដំណើរទស្សនកិច្ចរបស់ប្រធានាធិបតីហ្វីលីពីន មកកាន់កម្ពុជា នាដើមខែកញ្ញា ខាងមុខនេះ អ្នកជំនាញរូបនេះ យល់ឃើញថា សម្រាប់កម្រិតទ្វេភាគីគឺថ្នាក់ដឹកនាំកម្ពុជា និងហ្វីលីពីន នឹងពិភាក្សាគ្នាលើរបៀបវារៈនៃការពង្រឹង និងពង្រីកកិច្ចសហប្រតិបត្តិការសេដ្ឋកិច្ចពាណិជ្ជកម្មរវាងប្រទេសទាំងពីរឱ្យកាន់តែប្រសើរថែមទៀត។ លោកបណ្ឌិត ជឿជាក់ថា ថ្នាក់ដឹកនាំទាំងពីរ ក៏នឹងពិភាក្សាគ្នាលើបញ្ហាសន្តិសុខតំបន់ និងពិភពលោកផងដែរ ពិសេសថ្នាក់ដឹកនាំកម្ពុជា នឹងប្រាប់ទៅកាន់ប្រធានាធិបតីហ្វីលីពីន អំពីការពិតនៃបញ្ហាជម្លោះកម្ពុជា-ថៃ ដែលថៃ តែងតែរំលោភបំពានមកលើកម្ពុជា ដោយមិនគោរពច្បាប់អន្តរជាតិ ធម្មនុញ្ញអាស៊ាន និងរំលោភបទឈប់បាញ់ និងការតាំងចិត្តយ៉ាងមោះមុតរបស់កម្ពុជា ក្នុងការអនុវត្តបទឈប់បាញ់យ៉ាងខ្ជាប់ខ្ជួន។
ជាមួយគ្នានេះ លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម និងសេដ្ឋកិច្ចយល់ឃើញថា តាមរយៈដំណើរទស្សកិច្ចរបស់ប្រធានាធិបតីហ្វីលីពីន មកកាន់កម្ពុជា នាពេលខាងមុខនេះ គឺជាឱកាសដ៏ល្អ សម្រាប់ប្រទេសទាំងពីរក្នុងការពង្រឹងទំនាក់ទំនងការទូត សេដ្ឋកិច្ច ពាណិជ្ជកម្ម និងកិច្ចសហប្រតិបត្តិការសំខាន់ៗជាច្រើនទៀតផងដែរ។ អ្នកជំនាញរូបនេះ បានវាយតម្លៃថា ថ្នាក់ដឹកនាំនៃប្រទេសទាំងពីរក៏នឹងអាចពិភាក្សាគ្នា និងមានការចុះកិច្ចព្រមព្រៀងលើការទិញអង្កររបស់កម្ពុជា ពីសំណាក់ប្រទេសហ្វីលីពីន ផងដែរ។ ទន្ទឹមនេះ លោកបណ្ឌិតយល់ឃើញថា ប្រមុខរាជរដ្ឋាភិបាលកម្ពុជានឹងមានការស្នើសុំដល់ប្រធានាធិបតីហ្វីលីពីន ក្នុងការពង្រឹងតួនាទីរបស់ហ្វីលីពីនបន្ថែមទៀតលើការតាមដាន ត្រួតពិនត្យលើការអនុវត្តបទឈប់បាញ់កម្ពុជា-ថៃ ផងដែរ។
បើយោងតាមព័សារព័ត៌មានក្នុងស្រុករបស់ហ្វីលីពីន បានឱ្យដឹងថា ចាប់ពីថ្ងៃទី៧ ដល់ទី៩ ខែកញ្ញា ឆ្នាំ២០២៥ ខាងមុខនេះ ប្រធានាធិបតីហ្វីលីពីន លោក ហ្វឺឌីណង់ ម៉ាកូស នឹងមកបំពេញទស្សនកិច្ចនៅប្រទេសកម្ពុជា។ ពាក់ព័ន្ធបញ្ហានេះ សារព័ត៌មាន ខេមបូណូមីស ពុំទាន់អាចទាក់ទងសុំការបញ្ជាក់បន្ថែមពីក្រសួងការបរទេស និងសហប្រតិបត្តិការអន្តរជាតិ របស់កម្ពុជាបាននៅឡើយទេ៕
