ទន្ទឹមនឹងនោះ ក៏មានគម្រោងប្រវត្តិសាស្ត្រមួយទៀតដែរ ដែលកំពុងលេចរូបរាងឡើងនៅក្បែរនោះ គឺគម្រោងភូមិកីឡដ្ឋានវើលដ៍ប្រ៊ីដរបស់អ្នកឧកញ៉ា សៀ ឬទ្ធី ដែលបច្ចុប្បន្នកំពុងសម្រុកការសាងសង់យ៉ាងសស្រាក់សស្រាំ ដើម្បីរួចរាល់ត្រៀមទទួលរៀបចំព្រឹត្តិការណ៍កីឡាស៊ីហ្គេមនៅឆ្នាំ២០២៣។ បច្ចុប្បន្នគម្រោងនេះ សម្រេចការសាងសង់បានចំនួន៣ជាន់ហើយ ដោយគ្រោងបញ្ចប់ និងប្រគល់ជូនរាជរដ្ឋាភិបាលសម្រាប់ធ្វើជាម្ចាស់ផ្ទះការប្រកួតកីឡាស៊ីហ្គេម និងអាស៊ានប៉ារ៉ាហ្គេមនៅដើមឆ្នាំ២០២៣។
បើនិយាយពីការអភិវឌ្ឍន៍ជុំវិញរាជធានីភ្នំពេញ ប៉ែកខាងជើងត្រូវបានគេមើលឃើញថា ហាក់មានភាពលេចធ្លោខ្លាំងគួរឲ្យកត់សម្គាល់នៅប៉ុន្មានឆ្នាំចុងក្រោយនេះ រួមទាំងការវិនិយោគពីវិស័យរដ្ឋ និងឯកជន។
តួយ៉ាង សមិទ្ធផលប្រវត្តិសាស្ត្រមួយបានផុសឡើងហើយកំពុងទទួលបានការចាប់អារម្មណ៍ខ្លាំងពីមហាជននៅភាគខាងជើងនោះ គឺពហុកីឡដ្ឋានជាតិមរតកតេជោដែលមានតម្លៃជាង១៥០លានដុល្លារអាមេរិក។ បើក្រឡេកងាកចេញបន្តិច យើងនឹងឃើញការដ្ឋានមួយ កំពុងសម្រុកការសាងសង់យ៉ាងសកម្មនៅក្បែរពហុកីឡដ្ឋានមរតកតេជោ នោះគឺគម្រោងភូមិកីឡដ្ឋានវើលដ៍ប្រ៊ីដរបស់អ្នកឧកញ៉ា សៀ ឬទ្ធី ប្រធានក្រុមប្រឹក្សាភិបាលនៃក្រុមហ៊ុនវើលដ៍ប្រ៊ីដគ្រុប។
អត្ថបទគួរអាន
ភូមិកីឡដ្ឋានវើលដ៍ប្រ៊ីដ តម្លៃជាង២០០លានដុល្លារនេះ ជាគម្រោងសហការគ្នារវាងរាជរដ្ឋាភិបាល និងក្រុមហ៊ុនវើលដ៍ប្រ៊ីដ សាងសង់ឡើងក្នុងគោលបំណង ដើម្បីត្រៀមទទួលប្រតិភូ គ្រូបង្វឹក និងកីឡាករកីឡាការិនីមកពីប្រទេសផ្សេងៗនៅតំបន់អាស៊ាន ក្នុងការប្រកួតកីឡាស៊ីហ្គេម និងអាស៊ានប៉ារ៉ាហ្គេមនៅឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
ឯកឧត្តម វ៉ាត់ ចំរើន អគ្គលេខាធិការ នៃគណៈកម្មាធិការជាតិរៀបចំការប្រកួតកីឡាស៊ីហ្គេមកម្ពុជាបានគូសបញ្ជាក់ថាអះអាងថា ភូមិកីឡដ្ឋានវើលដ៏ប្រ៊ីដនេះ នឹងបញ្ចប់ការសាងសង់ ហើយប្រគល់ជូនរាជរដ្ឋាភិបាលកម្ពុជានៅដើមខែកុម្ភៈ ឆ្នាំ២០២៣។ ខណៈបច្ចុប្បន្នអគារទាំង៦សម្រេចការសាងសង់បានចំនួន៣ជាន់ហើយ។
ក្រៅពីគម្រោងប្រវត្តិសាស្ត្រទាំងពីរនេះ តំបន់ភាគខាងជើងរាជធានីភ្នំពេញ ពិសេសតាមបណ្ដោយផ្លូវជាតិលេខ៦ ក៏កំពុងរីកផុសឡើងនូវគម្រោងលំនៅដ្ឋានប្រណីតៗ និងអគារពាណិជ្ជកម្មកាន់តែច្រើនឡើងៗផងដែរ។ គម្រោងបុរីវិមានភ្នំពេញរបស់អ្នកឧកញ៉ា លី ហួរ ប្រធានក្រុមប្រឹក្សាភិបាលនៃក្រុមហ៊ុន លី ហួរ ដែលតម្លៃរហូតខ្ទង់លានដុល្លារ ត្រូវបានគេមើលឃើញថា ជាគម្រោងលំនៅដ្ឋានលេចធ្លោមួយនៅភាគខាងជើងរាជធានីភ្នំពេញនេះ។ អ្នកឧកញ៉ា លី ហួរ បានអះអាងថា កត្តាដែលជំរុញឲ្យក្រុមហ៊ុន អ្នកឧកញ៉ា អភិវឌ្ឍន៍បាញ់ឆ្ពោះភាគច្រើនទៅភាគខាងជើង ដោយសារនៅប៉ែកខាងនេះមានប្រភពទឹកគ្រប់គ្រាន់ និងអាកាសធាតុល្អ គួបផ្សំសម្បូរទៅដោយអគារពាណិជ្ជកម្ម សាលារៀន ផ្សារទំនើប និងស្ថាប័នរដ្ឋជាដើម។
បើតាមអ្នកជំនាញអចលនទ្រព្យបានអះអាងថា តំបន់ភាគខាងជើងរាជធានីភ្នំពេញ គឺជាតំបន់មានសក្ដានុពលសម្រាប់ការរស់នៅ ដោយសារតែស្ថិតនៅក្បែរទន្លេ និងមានហេដ្ឋារចនាសម្ព័ន្ធ សាលារៀន មន្ទីរពេទ្យ និងអគារស្ថាប័នរដ្ឋាភិបាលជាច្រើនក៏កំពុងមានវត្តមាននៅតំបន់នោះកាន់តែច្រើនដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
