![ប្រព័ន្ធផ្សព្វផ្សាយសង្គម](https://cdn.cambonomist.com/media/images/chnhthrmlsnngsnghbrasjagsdgnnsggts.2e16d0ba.fill-960x540.jpg)
ដើម្បីការពារ និងបង្ការសុវត្ថិភាពជូនពលរដ្ឋ អាជ្ញាធរម៉ាឡេស៊ីគ្រោងនឹងគ្រប់គ្រងបណ្តាញសង្គមតាមរយៈការរឹតបន្តឹងការចេញអាជ្ញាបណ្ណដល់អ្នកប្រើប្រាស់គេហទំព័ររបស់បណ្តាញសង្គមដូចជា Facebook, X , TikTok និងសេវាកម្មផ្ញើសារផ្សេងទៀតដូចជា WhatsApp ជាដើម។
លោក អេនឌ្រៀន ហៀ (Adrian Hia) នាយកគ្រប់គ្រងប្រចាំតំបន់អាស៊ីប៉ាស៊ីហ្វិកនៃក្រុមហ៊ុនសន្តិសុខអ៊ីនធឺណិត Kaspersky បានគូសបញ្ជាក់ថា ឧក្រិដ្ឋជនតាមអ៊ីនធឺណិតជារឿយៗតែងតែធ្វើសកម្មភាពកេងប្រវញ្ចពីការប្រើប្រាស់កម្មវិធី e-commerce និងប្រព័ន្ធផ្សព្វផ្សាយសង្គមដោយសារភាពអនាមិករបស់កម្មវិធីទាំងនោះផ្តល់ឱកាសក្នុងការលួចបន្លំ និងបោកប្រាស់ងាយស្រួល។
ដើម្បីរឹតបន្តឹងលើការប្រើប្រាស់បណ្តាញសង្គម បច្ចុប្បន្នអាជ្ញាធរ និងអ្នកជំនាញការម៉ាឡេស៊ី កំពុងរៀបចំបទប្បញ្ញត្តិថ្មីមួយ ដែលតម្រូវឱ្យកម្មវិធីផ្សព្វផ្សាយតាមវេទិកាអនឡាញចុះឈ្មោះ ដើម្បីទទួលបានអាជ្ញាបណ្ណ និងត្រូវបន្តអាជ្ញាបណ្ណនេះជារៀងរាល់ឆ្នាំ។ តាមរយៈបទប្បញ្ញត្តិថ្មីនេះ ការខកខានណាមួយក្នុងការស្នើសុំអាជ្ញាបណ្ណ ត្រូវបានចាត់ទុកថា ជាសកម្មភាពខុសច្បាប់ ដែលអាចរងពិន័យរហូតដល់ជាង១០ម៉ឺនដុល្លារឯណោះ។
ជុំវិញគម្រោងការនេះ និយ័តករនៃគណៈកម្មការទំនាក់ទំនង និងពហុព័ត៌មានម៉ាឡេស៊ី បានឲ្យដឹងថា គោលបំណងចម្បងរបស់ក្របខណ្ឌបទប្បញ្ញត្តិនេះ គឺការធានាឱ្យបាននូវប្រព័ន្ធអេកូឡូស៊ីអនឡាញដែលមានសុវត្ថិភាព សម្រាប់ប្រជាជនម៉ាឡេស៊ីទាំងអស់ ជាពិសេស គឺកុមារតែម្តង។ បើតាមនិយ័តករនេះ អ្នកពាក់ព័ន្ធដែលនឹងត្រូវស្នើសុំអាជ្ញាបណ្ណ គឺមានចំនួនជាង២៥% នៃចំនួនប្រជាជនរបស់ប្រទេស ឬប្រមាណ៨លាននាក់។
មិនមែនមានតែអាជ្ញាធរម៉ាឡេស៊ីនោះទេ អាជ្ញាធរសិង្ហបុរី ក៏គ្រោងអនុវត្តវិធានការនេះដូចគ្នាដែរ ដោយកាលពីខែមុន អាជ្ញាធរសិង្ហបុរី បានទាមទារឲ្យប្រព័ន្ធផ្សព្វផ្សាយសង្គម និងទីផ្សារអនឡាញពង្រឹកការទទួលខុសត្រូវ ជាពិសេសពាក់ព័ន្ធនឹងសកម្មឧក្រិដ្ឋកម្មនឹងអំពើឆបោក។ ករណីឆបោក ឫឧក្រិដ្ឋកម្មតាមអនឡាញ គឺជារឿងដ៏គ្រោះថ្នាក់មួយ ដោយកាលពីឆ្នាំ២០២៣ មានការកត់ត្រាករណីបែបនេះសរុបដល់ទៅ៤៦ពាន់ករណី ហើយខាតបង់សេដ្ឋកិច្ចប្រមាណជា៤៨៦លានដុល្លារ។
ពាក់ព័ន្ធនឹងស្ថានភាពនេះក្រសួងមហាផ្ទៃសិង្ហបុរី បានចេញក្រមអនុវត្តកាលពីខែមុន ដែលតម្រូវឱ្យ Facebook និង Carousell ដែលជាទីផ្សារបស់ជជុះអនឡាញ ត្រូវផ្ទៀងផ្ទាត់អត្តសញ្ញាណរបស់អ្នកលក់ដែលពួកគេចាត់ទុកថា មានគ្រោះថ្នាក់៕
ដោយៈ សរ សុជាតិ