ប្រទេសធំៗជាច្រើនក្នុងពិភពលោកព្រមទាំងសហភាពអឺរ៉ុប ផ្ទុះប្រតិកម្មព្រមៗគ្នាចំពោះការប្រកាសដំឡើងពន្ធរបស់លោក ដូណាល់ ត្រាំ

សង្គ្រាមពន្ធគយពិភពលោក បានចាប់ផ្ដើមផ្ទុះហើយ ក្រោយលោក ដូណាល់ ត្រាំ ប្រធានាធិបតីទី៤៧របស់សហរដ្ឋអាម៉េរិក បានប្រកាសដំឡើងពន្ធដ៏គួរឱ្យភ្ញាក់ផ្អើលចន្លោះពីទាបបំផុត១០% រហូតដល់៤៩% លើប្រទេស និងដែនដីប្រមាណ១៨០ រួមទាំងកម្ពុជា ផងដែរ។ សង្គ្រាមពន្ធគយដែលបញ្ឆេះឡើងដោយលោក ដូណាល់ ត្រាំ នេះ បានធ្វើឱ្យប្រទេសនានា ជុំវិញពិភពលោក ជាពិសេសប្រទេសដែលមានសេដ្ឋកិច្ចធំៗផ្ទុះប្រតិកម្មឆ្លើយតប រួម​មានមហាយក្សចិន ជប៉ុន កូរ៉េខាងត្បូង កាណាដា ម៉ិកស៊ិក អូស្ត្រាលី សហភាពអឺរ៉ុប និង ប្រេស៊ីលជាដើម។

ក្រសួងពាណិជ្ជកម្មចិន បានទទូចឱ្យសហរដ្ឋអាម៉េរិក ដកចេញវិញជាបន្ទាន់នូវវិធានការពន្ធគយជាឯកតោភាគីនេះ ហើយថា ក្រុងវ៉ាស៊ីនតោន ត្រូវរកដំណោះស្រាយឱ្យបានសមស្របក្នុងការធ្វើពាណិជ្ជកម្មជាមួយប្រទេសជាដៃគូតាមរយៈកិច្ចសន្ទនាស្មើភាពគ្នា។

សូមបញ្ជាក់ថា នៅមុននេះ លោក ដូណាល់ ត្រាំ បានដំឡើងពន្ធ២០% លើទំនិញចិនរួចមកហើយ ហើយពេលនេះ បានដំឡើងពន្ធ ៣៤% បន្ថែមទៀត ដែលធ្វើឱ្យពន្ធសរុបរបស់សហរដ្ឋអាម៉េរិក ដាក់លើចិន កើនឡើងដល់៥៤% ក្រោមរដ្ឋបាលរបស់លោក ដូណាល់ ត្រាំ។

ជាមួយគ្នានេះ រដ្ឋមន្ត្រីពាណិជ្ជកម្មជប៉ុន លោក យ៉ូជី មូតុ (Yoji Muto) បានលើកឡើងថា ការដាក់សម្ពាធពន្ធគយនេះ ពិតជាគួរឱ្យសោកស្ដាយជាខ្លាំង ហើយលោកបាននិយាយថា ទីក្រុងតូក្យូ នឹងជំរុញឱ្យសហរដ្ឋអាម៉េរិក លើកលែងពន្ធលើប្រទេសជប៉ុន។ សូមបញ្ជាក់ថា ទីក្រុងតូក្យូ ប្រឈមមុខនឹងពន្ធគយទៅវិញទៅមក២៤%។

ដោយឡែកក្រសួងឧស្សាហកម្មកូរ៉េខាងត្បូង បានអះអាងថា ប្រធានាធិបតី ស្តីទី លោក ហាន ឌុកស៊ូ (Han Duck-soo) បានបញ្ជាឱ្យចាត់វិធានការជួយគាំទ្រជាបន្ទាន់សម្រាប់អាជីវកម្មនានា ដែលរងផលប៉ះពាល់រួមទាំងឧស្សាហកម្មផលិតរថយន្តផងដែរ បន្ទាប់ពីលោក ដូណាក់ ត្រាំ បានប្រកាសពន្ធ ២៥%លើប្រទេសកូរ៉េខាងត្បូង។

ចំណែកនាយករដ្ឋមន្ត្រីកាណាដា លោក ម៉ាក ខានី (Mark Carney) បានថ្លែងថា ប្រទេសកាណាដានឹងប្រឆាំងពន្ធគយទាំងនេះ តាមរយៈការដាក់ចេញវិធានការតបតយ៉ាងម៉ឹងម៉ាត់។ រីឯប្រធានាធិបតីប្រទេសម៉ិកស៊ិក លោកស្រី ខ្លូឌា សេនបូម (Claudia Sheinbaum) បានថ្លែងថា ប្រទេសម៉ិកស៊ិកនឹងមិនប្រកាសដាក់ពន្ធគយសងសឹកសហរដ្ឋអាម៉េរិក នោះទេ ប៉ុន្តែថា​​​​​​​​​​​​​​នឹងប្រកាសដាក់ចេញកម្មវិធីដ៏ទូលំទូលាយមួយនៅថ្ងៃព្រហស្បតិ៍ ទី៣ ខែមេសា នេះ ដោយមិនបានបញ្ជាក់ថា កម្មវិធីនោះជាអ្វីឡើយ។

ជាមួយគ្នានេះ នាយករដ្ឋមន្ត្រីអូស្ត្រាលី លោក អែនថូនី អាល់បានីស (Anthony Albanese) បានថ្លែងថា ប្រទេសអូស្ត្រាលីនឹងស្វះស្វែងសុំចរចាជាមួយសហរដ្ឋអាម៉េរិក ដើម្បីដកពន្ធទាំងនេះចេញដោយមិនចាំបាច់ប្រើយន្តការដោះស្រាយជម្លោះនៅក្នុងកិច្ចព្រមព្រៀងពាណិជ្ជកម្មសេរីរបស់ប្រទេសទាំងពីរ។

ទន្ទឹមនឹងនេះ លោក បឺន លែង (Bernd Lange) ប្រធានគណៈកម្មាធិការពាណិជ្ជកម្មអន្តរជាតិ នៃសភាអឺរ៉ុប បានថ្លែងថា សហភាពអឺរ៉ុបនឹងឆ្លើយតបតាមរយៈវិធានការដែលស្របច្បាប់ និងសមស្រប។ ចំណែកប្រទេសប្រេស៊ីល បាននិយាយថា ខ្លួនកំពុងពិចារណាគ្រប់ជម្រើសទាំងអស់រួមទាំងការយកបញ្ហានេះប្ដឹងទៅអង្គការពាណិជ្ជកម្មពិភពលោក (WTO) ផងដែរ ដើម្បីធានាពាណិជ្ជកម្មដោយស្មើភាព​។ នៅមុននេះ សភារបស់ប្រទេសប្រេស៊ីល បានអនុម័តច្បាប់ថ្មីមួយដែលអនុញ្ញាតឱ្យរដ្ឋាភិបាលប្រទេសនេះ​ចាត់វិធានការតបតដូចជា ការយកពន្ធគយប្រឆាំងនឹងសកម្មភាពពាណិជ្ជកម្មមិនត្រឹមត្រូវជាដើម។

សូមបញ្ជាក់ថា ក្នុងចំណោមប្រទេសទាំង១០ នៅអាស៊ាន កម្ពុជា ទទួលរងពន្ធគយអាម៉េរិក ខ្ពស់ជាងគេបំផុតរហូតដល់ទៅ ៤៩% ខណៈឡាវ ជាប់ពន្ធ ៤៨% វៀតណាម ៤៦% មីយ៉ាន់ម៉ា ៤៤% ថៃ ៣៦% ឥណ្ឌូនេស៊ី ៣២% ម៉ាឡេស៊ី២៤% ព្រុយណេ ២៤% ហ្វីលីពីន ១៧% រីឯសិង្ហបុរី ជាប់ពន្ធ ១០%៕

ដោយ: តែម សុខុម