លុយដុល្លារអាម៉េរិកធ្លាក់ថ្លៃខ្លាំង ខណៈផ្សារហ៊ុនពិភពលោកហក់ឡើងខ្ពស់

ក្រោយមានការរំពឹងទុកថា ធនាគារកណ្ដាលធំៗរួមទាំងធនាគារកណ្ដាលអាម៉េរិកផងនឹងបញ្ចុះអត្រាការប្រាក់នៅដើមឆ្នាំ២០២៤ ខាងមុខ ទិន្នផលរតនាគាររយៈពេល១០ឆ្នាំបានធ្លាក់ចុះដល់កម្រិតទាបបំផុតមិនធ្លាប់មានក្នុងរយៈពេល៥ខែមកនេះ ខណៈដែលទិន្នផលរតនាគាររយៈពេល២ឆ្នាំបានធ្លាក់ចុះដល់កម្រិតទាបបំផុតមិនធ្លាប់មានក្នុងរយៈពេល៧ខែមកនេះ។ បណ្ដាវិនិយោគិនសង្ឃឹមថា នឹងមានការបន្ធូរបន្ថយលក្ខខណ្ឌរូបិយវត្ថុនៅឆ្នាំក្រោយ ហើយក្ដីសង្ឃឹមនេះ បានជំរុញឱ្យផ្សារភាគហ៊ុនទូទាំងពិភពលោកហក់ឡើងខ្ពស់ ឈានដល់កម្រិតដែលមិនធ្លាប់បានឃើញចាប់តាំងពីខែតុលា ឆ្នាំ២០២២។

នៅឯ Wall Street ដែលជាសង្កាត់ហិរញ្ញវត្ថុដ៏ល្បីល្បាញរបស់សហរដ្ឋអាម៉េរិក សន្ទស្សន៍ផ្សារហ៊ុន Dow Jones បានហក់ឡើង០,២១% ខណៈផ្សារហ៊ុន S&P 500 និងផ្សារហ៊ុន ណាស្តាក់(Nasdaq) គ្មានការប្រែប្រួលឡើងចុះ។

ទន្ទឹមនឹងនេះ ផ្សារហ៊ុនអឺរ៉ុប ស្តក (STOXX 600) បានហក់ឡើង០,២១% ខណៈការជួញដូរបានធ្លាក់ចុះដោយសារកាលពីថ្ងៃច័ន្ទ និងថ្ងៃអង្គារ ដើមសប្ដាហ៍នេះជាថ្ងៃឈប់សម្រាកសាធារណៈនៅទូទាំងតំបន់អឺរ៉ុប។

ក្រុមអ្នកវិភាគបានលើកឡើងថា ហានិភ័យចម្បងដែលទីផ្សារទូទាំងពិភពលោកប្រឈមគឺថា អត្រាការប្រាក់ប្រហែលជាមិនធ្លាក់ចុះលឿនដូចការរំពឹងទុក។

លោក នីខូឡាស កូឡាស (Nicholas Colas) សហស្ថាបនិកក្រុមហ៊ុនស្រាវជ្រាវទិន្នន័យ ដាតា ត្រេក រីសឺច (DataTrek Research) បានលើកឡើងថា មានការរំពឹងទុកថា ធនាគារកណ្ដាលអាម៉េរិក នឹងបញ្ចុះអត្រាការប្រាក់ដោយប្រយ័ត្នប្រយែងជាបន្តបន្ទាប់ពេញមួយឆ្នាំ២០២៤។

ទិន្នផលរតនាគារគោលរយៈពេល១០ឆ្នាំបានធ្លាក់ចុះមកនៅត្រឹមប្រមាណ៣,៨% ខណៈទិន្នផលរតនាគារគោលរយៈពេល២ឆ្នាំបានធ្លាក់ចុះមកនៅត្រឹមប្រមាណជាង៤,២%។

ក្ដីរំពឹងចំពោះការបញ្ចុះអត្រាការប្រាក់ក៏បានធ្វើឱ្យប្រាក់ដុល្លារអាម៉េរិក ធ្លាក់ថ្លៃ០,៥១%ផងដែរទល់នឹងរូបិយប័ណ្ណសំខាន់ៗចំនួន៦ ឈានដល់កម្រិតដែលមិនធ្លាប់ជួបចាប់តាំងពីថ្ងៃទី២៧ ខែកក្កដា ឆ្នាំនេះ។

នៅអាស៊ី ឯណេះវិញ MSCI ដែលជាសន្ទស្ស៍ផ្សារហ៊ុនធំបំផុតប្រចាំអាស៊ី-ប៉ាស៊ីហ្វិក បានហក់ឡើងជាង១% ខណៈផ្សារហ៊ុនជប៉ុន Nikkei បានហក់ឡើងជាង១% ផ្សារហ៊ុនហុងកុង បានហក់ឡើង១,៧% ហើយផ្សារហ៊ុនចិនដីគោកបានហក់ឡើង០,៣៥%៕

ដោយ: តែម សុខុម