ក្រសួងឧស្សាហកម្ម នឹងចុះត្រួតពិនិត្យរោងចក្រផលិត និងកន្លែងចែកចាយយានយន្ដថ្មីៗនៅកម្ពុជា ទាក់ទងនឹងស្ដង់បច្ចេកទេស

ក្រសួងដាស់តឿនឲ្យក្រុមហ៊ុន រោងចក្រ សហគ្រាស និងអ្នកនាំចូលផលិតផលយានយន្តថ្មីទាំងអស់មកស្នើសុំអាជ្ញាបណ្ណបញ្ជាក់ស្តង់ដារសុវត្ថិភាពយានយន្តនៅវិទ្យាស្ថានស្តង់ដារកម្ពុជា ខណៈបច្ចុប្បន្នក្រសួងបានផ្តល់អាជ្ញាបណ្ណដល់ក្រុមហ៊ុន រោងចក្រ សហគ្រាស និងអ្នកនាំចូលយានយន្តថ្មីៗជាង៥០អាជ្ញាបណ្ណរួចហើយ។

ដើម្បីចូលរួមចំណែកកាត់បន្ថយគ្រោះថ្នាក់នានា ដែលអាចកើតឡើងពីបញ្ហាបច្ចេកទេសរបស់យានយន្ត ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹងចុះធ្វើអធិការកិច្ចត្រួតពិនិត្យស្តង់ដារសុវត្ថិភាពផលិតផលយានយន្តនៅតាមក្រុមហ៊ុន រោងចក្រ សហគ្រាស និងកន្លែងចែកចាយនានានៅកម្ពុជានាពេលខាងមុខ។

ឯកឧត្តម ហេង សុខគង់ រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនាវានុវត្តន៍បានគូសបញ្ជាក់ថា វិធានការចុះត្រួតពិនិត្យស្តង់ដារសុវត្ថិភាពយានយន្ដនេះ នឹងត្រូវអនុវត្តនៅ៣ខែបន្ទាប់ពីក្រសួងចេញសេចក្តីជូនដំណឹងកាលពីថ្ងៃទី១៧ ខែកញ្ញា ឆ្នាំ២០២១។ ឯកឧត្តម បានសង្កត់ធ្ងន់ថា វិធានការនេះធ្វើឡើងចំពោះតែក្រុមហ៊ុន រោងចក្រ សហគ្រាស និងកន្លែងចែកចាយរថយន្តថ្មីៗតែប៉ុណ្ណោះ។

ឯកឧត្តមបានបន្ថែមថា កត្តាដែលជំរុញឲ្យក្រសួងប្រកាសអនុវត្តវិធានការបែបនេះធ្វើឡើងក្រោយក្រសួងសង្កេតឃើញការចរាចរចែកចាយផលិតផលយានយន្តនៅលើទីផ្សារកម្ពុជានាពេលបច្ចុប្បន្នហាក់ពុំបានគិតគូគ្រប់គ្រាន់លើបញ្ហាសុវត្តិភាពយានយន្តឲ្យស្របតាមការកំណត់ស្តង់ដារ និងបទបញ្ញត្តិបច្ចេកទេសនោះទេ។ គោលបំណងនៃគម្រោងចុះត្រួតពិនិត្យនេះ គឺដើម្បីផ្ទៀងផ្ទាត់ពីភាពត្រឹមត្រូវនៃការអនុវត្តស្តង់ដារសុវត្ថិភាពយានយន្តដែលកំណត់ដោយក្រសួងរបស់ក្រុមហ៊ុន រោងចក្រ សហគ្រាស និងកន្លែងចែកចាយផលិតផលយានយន្តថ្មីទាំងនោះ។ 

ពាក់ព័ន្ធការចុះធ្វើអធិការកិច្ចនេះដែរ ក្រសួងឧស្សាហកម្មស្នើឲ្យម្ចាស់ក្រុមហ៊ុន រោងចក្រ សហគ្រាស និងកន្លែងចែកចាយផលិតផលយានយន្តនានាចូលរួមសហការជាមួយមន្ត្រីអធិការកិច្ចនៃវិទ្យាស្ថានស្តង់ដារកម្ពុជា ដើម្បីចូលរួមចំណែកកាត់បន្ថយគ្រោះថ្នាក់នានា ដែលអាចកើតមានឡើងជាយថាហេតុដោយសារបច្ចេកទេសរបស់យានយន្ត។ ទន្ទឹមនឹងនេះក្រសួងក៏បានព្រមានពិន័យ ឬចាត់វិធានការតាមផ្លូវចំពោះក្រុមហ៊ុន រោងចក្រ សហគ្រាស និងកន្លែងចែកចាយណា ដែលមិនចូលរួមសហការជាមួយមន្ត្រីជំនាញក្នុងការធ្វើអធិការកិច្ចលើស្តង់ដារសុវត្ថិភាពបច្ចេកទេសយានយន្តនេះ។  

ជាមួយគ្នានេះក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បន្តក្រើនរំលឹកដល់ម្ចាស់ក្រុមហ៊ុន រោងចក្រ សហគ្រាស និងកន្លែងចែកចាយរថយន្តថ្មីទាំងអស់ឲ្យមកដាក់ពាក្យស្នើសុំអាជ្ញាបណ្ណបញ្ចាក់ស្តង់ដារសុវត្ថិយានយន្តឲ្យបានគ្រប់គ្នានៅវិទ្យាស្ថានស្តង់ដារកម្ពុជា៕