ធនាគារពិភពលោកបានអះអាងថា ការស្ទុះងើបឡើងវិញនៃការធ្វើពាណិជ្ជកម្មនឹងជួយជំរុញកំណើនសេដ្ឋកិច្ចរបស់ប្រទេសកំពុងអភិវឌ្ឍន៍នៅតំបន់អាស៊ីប៉ាស៊ីហ្វិកសម្រេចបានក្នុងរង្វង់៤,៦%នៅឆ្នាំនេះ បើទោះបីជាសេដ្ឋកិច្ចរបស់ចិនត្រូវគេព្យាករអាចសម្រេចបានក្នុងរង្វង់៤,៥% ទាបជាងឆ្នាំមុនដែលមានក្នុងរង្វង់៥,២% ក៏ដោយ។ កាលពីឆ្នាំ២០២៣ សេដ្ឋកិច្ចនៅតំបន់អាស៊ីសម្រេចបានកំណើនក្នុងរង្វង់៤,៤%។
របាយការណ៍របស់ធនាគារពិភពលោកបានព្រមានថា បើទោះបីការនាំចេញទំនិញរបស់អាស៊ីបានងើបឡើងវិញនៅឆមាសទីពីរក្នុងឆ្នាំ២០២៣ក៏ដោយ តែតំបន់នេះអាចប្រឈមនឹងគោលនយោបាយបង្ខូចទ្រង់ទ្រាយពាណិជ្ជកម្មនៅក្នុងទីផ្សារគោលដៅសំខាន់ៗ ដូចជាសហរដ្ឋអាមេរិក ចិន ជប៉ុន និងកូរ៉េខាងត្បូង និងឥទ្ធិពលនៃការធ្លាក់ចុះទីផ្សារអចលនទ្រព្យ និងតម្រូវការប្រើប្រាស់នៅចិន។
លោក អាឌីធីយ៉ា ម៉ាតូ ( Aaditya Mattoo) ប្រធានសេដ្ឋវិទូរបស់ធនាគារពិភពលោកប្រចាំតំបន់អាស៊ីប៉ាស៊ីហ្វិកបានថ្លែងថា សមត្ថភាពរបស់ពិភពលោកក្នុងការស្រូបយកឥទ្ធិពល និងហានិភ័យរបស់ចិន គឺមានតិចជាងមុន។
ដោយឡែកកំណើនទិន្នផលឧស្សាហកម្មរបស់អាស៊ីនឹងធ្លាក់ចុះ០,៥% ប្រសិនបើសហរដ្ឋអាម៉េរិកជួបប្រទះនឹងការកើនឡើងអតិផរណាសាជាថ្មីដោយមិនបានរំពឹងទុក និងអត្រាការប្រាក់ខ្ពស់បន្តអូសបន្លាយពេលយូរ ហើយវិបត្តិម៉ាក្រូសេដ្ឋកិច្ចនៅក្នុងប្រទេសចិនមានការធ្លាក់ចុះត្រឹមតែ០,៣%។ របាយការណ៍នេះបានព្រមានថា ការកើនឡើង១០% នៃសមាមាត្របំណុលឯកជនធៀបនឹង GDP នឹងអាចធ្លាក់ចុះ១,១% ដោយឡែកបំណុលសាជីវកម្មនៅក្នុងប្រទេសចិន និងវៀតណាមបានកើនឡើងជាង៤០%នៃ GDP ចាប់តាំងពីឆ្នាំ២០១០៕
ដោយៈ សរ សុជាតិ
