បាណាម៉ា ចោទលោក ដូណាល់ ត្រាំ និយាយកុហកជុំវិញរឿងអាម៉េរិក គ្រប់គ្រងព្រែកជីកប៉ាណាម៉ាឡើងវិញ

ប្រធានាធិបតី ដូណាល់ ត្រាំ បានថ្លែងទៅកាន់សភាអាម៉េរិកថា រដ្ឋបាលរបស់លោកយកបានព្រែកជីកប៉ាណាម៉ា ដែលជាផ្លូវទឹកដឹកជញ្ជូនទំនិញដ៏សំខាន់មកគ្រប់គ្រងឡើងវិញហើយ។ ការអះអាងរបស់លោក ដូណាល់ ត្រាំ គឺចង់សំដៅថា ក្រុមហ៊ុនយក្សអាម៉េរិក BlackRock ដែលជាក្រុមហ៊ុនគ្រប់គ្រងទ្រព្យសកម្មធំបំផុតក្នុងពិភពលោក បានប្រកាសទិញយកក្រុមហ៊ុន CK Hutchison របស់កំពូលមហាសេដ្ឋីហុងកុង លី កាស៊ីង ដែលធ្វើប្រតិបត្តិការកំពង់ផែចំនួន២នៅចុងសងខាងនៃព្រែកជីកប៉ាណាម៉ាក្នុងតម្លៃ២២,៨ពាន់លានដុល្លារ។ ​ដំណឹងនេះបានធ្វើឱ្យភាគហ៊ុនរបស់ CK Hutchison ហក់ឡើងស្រឺតៗរហូតដល់ទៅជិត២៥% កាលពីថ្ងៃទី៥ ខែមីនា។

សូមបញ្ជាក់ថា ក្រុមហ៊ុនរបស់កំពូលមហាសេដ្ឋីហុងកុង លោក លី កាស៊ីង បានគ្រប់គ្រងកំពង់ផែចំនួនពីរក្នុងចំណោមកំពង់ផែទាំង៥ នៅតាមបណ្ដោយព្រែកជីកប៉ាណាម៉ា ចាប់តាំងពីឆ្នាំ១៩៩៧ មកទល់នឹងឆ្នាំ២០២៥នេះ។

ប្រទេសប៉ាណាម៉ា បានចេញមុខអះអាងថា ខ្លួននៅតែគ្រប់គ្រងព្រែកជីកប៉ាណាម៉ា ១០០% ហើយក្រុមហ៊ុន CK Hutchison របស់កំពូលមហាសេដ្ឋីហុងកុង លី កាស៊ីង ដែលប្រតិបត្តិការកំពង់ផែទាំង២ក្នុងចំណោមកំពង់ផែទាំង៥ នៅតាមបណ្ដោយព្រែកជីកប៉ាណាម៉ា មិនមានន័យថា ប្រទេសចិន ជាអ្នកគ្រប់គ្រងព្រែកជីកប៉ាណាម៉ា នោះឡើយ។ ដូច្នេះ ការលក់កំពង់ផែនៅតាមបណ្ដោយព្រែកជីកនេះឱ្យទៅក្រុមហ៊ុនអាម៉េរិក ក៏មិនមានន័យថា សហរដ្ឋអាម៉េរិកយកព្រែកជីកនេះទៅកាន់កាប់ឡើងវិញនោះដែរ ព្រោះវាគ្រាន់តែជាប្រតិបត្តិការទិញលក់រវាងក្រុមហ៊ុនឯកជនប៉ុណ្ណោះ។

ប្រធានាធិបតីប៉ាណាម៉ា លោក រ៉ូសេ រ៉ាអ៊ូ មូលីណូ (José Raúl Mulino) បានសរសេរបង្ហោះលើគណនីបណ្ដាញទំនាក់ទំនងសង្គម X កាលពីថ្ងៃទី៥ ខែមីនា ដោយច្រាលចោលថា កិច្ចព្រមព្រៀងលក់កំពង់ផែទាំង២របស់មហាសេដ្ឋីហុងកុង លី កាស៊ីង ឱ្យទៅក្រុមហ៊ុនអាម៉េរិក BlackRock មិនមែនធ្វើឡើងដោយសារការដាក់សម្ពាធពីរដ្ឋាភិបាលអាម៉េរិក នោះទេ។

តាមរយៈសំណេរដដែល លោកបានលើកឡើងថា លោកសុំច្រានចោលការវាយប្រហារនេះមកលើសច្ចៈភាព និងសេចក្តីថ្លៃថ្នូររបស់ប្រទេសប៉ាណាម៉ា ក៏ដូចជាប្រជាជនប៉ាណាម៉ា ហើយបានចោទលោក ដូណាល់ ត្រាំ ថា និយាយភូតកុហកជាថ្មីម្ដងទៀត។

សូមបញ្ជាក់ថា សហរដ្ឋអាម៉េរិក បានសាងសង់ព្រែកជីកប៉ាណាម៉ា ពីឆ្នាំ១៩០៣ ដល់ឆ្នាំ១៩១៤ ពោលគឺរយៈពេល១១ឆ្នាំ ក្រោមរដ្ឋបាលប្រធានាធិបតីទី២៦ របស់សហរដ្ឋអាម៉េរិក លោក ធីអូ-ដ រ៉សេវែល (Theodore Roosevelt) ដើម្បីភ្ជាប់មហាសមុទ្រអាត្លង់ទិក និងមហាសមុទ្រប៉ាស៊ីហ្វិក ហើយបានបន្តកាន់កាប់ព្រែកនេះ រហូតដល់ថ្ងៃទី៣១ ខែធ្នូ ឆ្នាំ១៩៩៩ មុនប្រគល់ព្រែកជីកនេះទាំងអាឡោះអាល័យឱ្យទៅប្រទេសប៉ាណាប៉ា ជាអ្នកកាន់កាប់វិញក្រោមសន្ធិសញ្ញាចុះដោយប្រទេសទាំងពីរ៕

ដោយ: តែម សុខុម