តើនរណាជាបេក្ខភាពលេចធ្លោ ដែលអាចក្លាយជានាយករដ្ឋមន្ត្រីថៃ ជំនួសលោកស្រី ផែថងថាន ដែលត្រូវបានតុលាការធម្មនុញ្ញថៃ ទម្លាក់ចេញពីតំណែង?

នៅទីបំផុតតុលាការធម្មនុញ្ញថៃ នៅរសៀលថ្ងៃទី២៩ ខែសីហា នេះ បានសម្រេចដកតំណែងលោកស្រី ផៃថងថាន ស៊ីណាវ៉ាត្រា ពីតំណែងនាយករដ្ឋមន្ត្រី ក្រោយរកឃើញថា លោកស្រី បានរំលោភរបំពានក្រមសីលធម៌ និងធម្មនុញ្ញរបស់ថៃ ពាក់ព័ន្ធការបែកធ្លាយសារសន្ទនារវាងលោកស្រីជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា។ ការបាត់បង់កៅអីនាយករដ្ឋមន្ត្រីរបស់លោកស្រី ផែថងថាន នេះ ជាការវាយប្រហារដ៏ធ្ងន់ដល់គណបក្សរបស់លោកស្រី និងត្រកូល ស៊ីណាវ៉ាត្រា។

អាសនៈ និងមហិច្ឆតានយោបាយរបស់ត្រកូលនេះ ត្រូវបានស្ថាបនាឡើងដោយអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា ដែលបានឡើងកាន់អំណាចក្នុងឆ្នាំ២០០១។ លោកត្រូវបានគេអះអាងថា ជាមេដឹកនាំដំបូងគេក្នុងប្រវត្តិសាស្ត្ររបស់ប្រទេស ដែលដឹកនាំរដ្ឋាភិបាលជាប់ឆ្នោតពេញមួយអាណត្តិ ប៉ុន្តែលោកត្រូវបានអស់អំណាចដោយរដ្ឋប្រហារនាឆ្នាំ២០០៦ ហើយក្រោយមកត្រូវនិរទេសនៅក្នុងឆ្នាំ២០០៨ ហើយទើបតែចូលមកវិញកាលពីឆ្នាំ២០២៣ កន្លងទៅនេះ។ ទោះអវត្តមានពីប្រទេសថៃ តែលោកនៅតែមានឥទ្ធិពល ហើយជាអ្នកនៅពីក្រោយខ្នង នៃភាពជោគជ័យរបស់គណបក្សភឿថៃ។

តើនរណាដែលអាចនឹងចូលមកជំនួសតំណែងលោកស្រី ផែថងថាន?

នៅក្នុងដំណាក់កាលអន្តរកាលនេះលោក ភូមថាំ វិឆាយ៉ាឆៃ នាយករដ្ឋមន្រ្តីស្តីទីនឹងបន្តកាន់តំណែងជានាយករដ្ឋមន្រ្តីចាំផ្ទះ ប៉ុន្តែថៃ ដាច់ខាតត្រូវតែបោះឆ្នោតនៅក្នុងសភាតំណាងរាស្រ្ត ដែលមានបេក្ខជនលេចធ្លោចំនួន៥រូប ដែលគេរំពឹងថា អាចនឹងចូលមកជំនួសតំណែងរបស់លោកស្រី ផែថងថាន។

បេក្ខជនលេចធ្លោរទាំងនេះ រួមមាន លោក ឆៃកាសេម នីទិស៊ីរី (Chaikasem Nitisiri) មកពីគណបក្សភឿថៃ របស់លោកស្រី ផៃថងថាន, លោក អានុទិន ឆានវីរ៉ាគុល (Anutin Charnvirakul) មេដឹកនាំគណបក្សភូមិចៃថៃ ដែលជាគណបក្សអភិរក្សនិយមធ្លាប់កាន់តំណែងជាឧបនាយករដ្ឋមន្រ្តី និងជារដ្ឋមន្រ្តីមហាផ្ទៃ តែបានលាលែងពីក្រុមចម្រុះបន្ទាប់ពីលេចធ្លាយការសន្ទនារបស់លោកស្រី ផែថងថាន ជាមួយមេដឹកនាំកម្ពុជា, លោកឧត្តមសេនីយ ប្រាយុទ្ធ ចាន់អូចា អតីតនាយករដ្ឋមន្ត្រី ដែលបានចូលនិវត្តន៍ពីនយោបាយនៅឆ្នាំ២០២៣ ប៉ុន្តែទោះបីជាយ៉ាងណាលោកនៅតែស្ថិតក្នុងបញ្ជីបេក្ខជនសម្រាប់គណបក្ស ដែលគាំទ្រដោយយោធា, លោក ភីរ៉ាផាន សាលីរ៉ាតាវីបាហ្គា (Pirapan Salirathavibhaga) ឧបនាយករដ្ឋមន្ត្រី និងជារដ្ឋមន្ត្រីថាមពលមកពីគណបក្សរួបរួមជាតិថៃ និងលោក ជូរិន ឡាកសាណាវីសិទ្ធ (Jurin Laksanawisit) មកពីគណបក្សប្រជាធិបតេយ្យអភិរក្ស៕

ដោយៈ សរ សុជាតិ