![ហ្គេមអនឡាញ](https://cdn.cambonomist.com/media/images/hvlpnbtchnhbssmthkmnl12jj.2e16d0ba.fill-960x540.jpg)
ថ្លែងទៅកាន់ជនរួមជាតិកាលពីពេលថ្មីៗលោក ហ្វឺឌីណាន់ ម៉ាកូស ប្រធានាធិបតីហ្វីលីពីនអះអាងថា លោកនឹងហាមឃាត់ក្រុមហ៊ុនប្រតិបត្តិករហ្គេមអនឡាញហ្វីលីពីន ដែលគ្រប់គ្រងដោយក្រុមហ៊ុនចិន មិនឱ្យបន្តអាជ្ញាបណ្ណទៀតឡើយ និងបញ្ជាឱ្យនិយ័តករកាត់បន្ថយឧស្សាហកម្មនេះជាអតិបរមានៅត្រឹមចុងឆ្នាំ២០២៤ នេះ។
លោក អាឡេចានដ្រូ តេងខូ (Alejandro Tengco) ប្រធាននិយ័តករហ្គេមរដ្ឋរបស់ហ្វីលីពីនបាននិយាយថា វាគ្មានបញ្ហានោះទេ ក្នុងការបិទប្រតិបត្តិការហ្គេមអនឡាញនេះ ព្រោះលោកគោរពដល់សន្តិសុខជាតិ និងបទបញ្ជារបស់ប្រធានាធិបតី។ បើតាមការអះអាងរបស់ថ្នាក់ដឹកនាំរូបនេះ ក្រុមហ៊ុនហ្គេមអនឡាញដែលមានអាជ្ញាបណ្ណកំពុងធ្វើប្រតិបត្តិការនៅហ្វីលីពីន បានផ្តល់ការងារដោយផ្ទាល់ និងដោយប្រយោលដល់ប្រជាជនហ្វីលីពីន ប្រមាណ៤ម៉ឺននាក់ និងជនបរទេសជិត២ម៉ឺន៣ពាន់នាក់ គិតត្រឹមចុងឆ្នាំ២០២៣។
យ៉ាងណាក៏ដោយ លោក តេងខូ បានគូសបញ្ជាក់ថា បញ្ហាប្រឈមសម្រាប់មន្ត្រីអនុវត្តច្បាប់ គឺពិបាកគ្រប់គ្រងប្រាក់ចំណូលរបស់ក្រុមហ៊ុនប្រតិបត្តិករហ្គេមអនឡាញ ដែលមានអាជ្ញាបណ្ណស្របច្បាប់ទាំងនោះ ខណៈដែលកន្លងមក រដ្ឋាភិបាលហ្វីលីពីន បានបាត់បង់ប្រាក់ចំណូលប្រហែល៤០០លានដុល្លារ ពីថ្លៃអាជ្ញាបណ្ណ និងពន្ធជារៀងរាល់ឆ្នាំ៕
អត្ថបទ៖ សុខ មង្គល