លោក វ៉្លូឌីមៀ ហ្សេឡិនស្គី ប្រធានាធិបតីអ៊ុយក្រែន បានអះអាងថា លោកបានត្រៀមខ្លួនរួចហើយក្នុងការចុះចេញពីតំណែង ប្រសិនបើការចុះចេញនោះអាចនាំសន្តិភាពដល់អ៊ុយក្រែន ឬទទួលបានជាសមាជិកភាពរបស់អង្គការណាតូ។ ការប្រកាសបែបនេះរបស់ប្រធានាធិបតី អ៊ុយក្រែន ធ្វើឡើងក្រោយលោករងការរិះគន់ពីប្រធានាធិបតីសហរដ្ឋអាម៉េរិក លោក ដូណាល់ ត្រាំ តាមបណ្តាញសង្គមដោយហៅលោកជាមេដឹកនាំផ្តាច់ការ និងការដាក់សម្ពាធឲ្យអ៊ុយក្រែន សងលុយសហរដ្ឋអាម៉េរិក តាមរយៈការចុះកិច្ចព្រមព្រៀងធនធានរ៉ែកម្រ ដែលមានតម្លៃប្រមាណ៥០០ពាន់លានដុល្លារ។
លោក ហ្សេឡិនស្គី បានលើកឡើងថា ប្រសិនបើអាចនាំមកនូវសន្តិភាពសម្រាប់អ៊ុយក្រែន វាពិតជាចាំបាច់សម្រាប់លោកក្នុងការចាកចេញពីមុខតំណែង។ តែយ៉ាងណា លោក នៅតែបារម្ភពីបញ្ហាសន្តិសុខសម្រាប់អ៊ុយក្រែន។
បញ្ហាសង្រ្គាមនៅអ៊ុយក្រែន មានការប្រែប្រួលខ្លាំងគួរឱ្យកត់សម្គាល់ ក្រោយលោក ដូណាល់ ត្រាំ ត្រឡប់មកដឹកនាំសេតវិមានសហរដ្ឋអាម៉េរិកជាថ្មី។ តាមផែនការសន្តិភាព ដែលរដ្ឋបាលសហរដ្ឋអាម៉េរិក បានដាក់ចេញត្រូវបានអ្នកវិភាគអះអាងថា គឺជាហានិភ័យមួយសម្រាប់អ៊ុយក្រែន ដែលបានតស៊ូប្រយុទ្ធជាមួយរុស្ស៊ី តាំងតែពីថ្ងៃទី២៤ ខែកុម្ភៈ ឆ្នាំ២០២២។ តាមរយៈផែនការសន្តិភាពនេះ លោក ត្រាំ ចង់បានធនធានរ៉ែកម្រពីអ៊ុយក្រែន ជាថ្នូរនឹងការផ្តល់ជំនួយយោធា និងបញ្ជូនកងកម្លាំងទៅជួយការពារអ៊ុយក្រែន។ លោក ហ្សេឡិនស្គី បានអះអាងថា លោកចង់ជួបសន្ទនាជាមួយលោក ដូណាល់ ត្រាំ ដើម្បីបញ្ជាក់ថា លោកនឹងមិនចុះហត្ថលេខាលើអ្វីមួយ ដែលដាក់បន្ទុកឱ្យមនុស្សជំនាន់ក្រោយរបស់អ៊ុយក្រែនត្រូវសងត្រឡប់១០ជំនាន់បន្ទាប់នោះទេ។
មកដល់ពេលនេះ អ៊ុយក្រែន ទទួលស្គាល់ថា ខ្លួនបានទទួលជំនួយពីសហរដ្ឋអាម៉េរិកប្រមាណ១០០ពាន់លានដុល្លារ តែការសងត្រឡប់មិនគួរមានការប្រាក់នោះទេ ព្រោះការផ្តល់ជំនួយនេះមានការទទួលស្គាល់ពីសភាតាមយន្តការទ្វេភាគី។
ជាមួយគ្នានេះ លោក ស្ទីវ វីតកូហ្វ (Steve Witkoff ) បេសកជនពិសេសរបស់លោក ត្រាំ បាននិយាយថា អាម៉េរិកអាចនឹងរកស៊ីជាមួយនឹងរុស្ស៊ីឡើងវិញ ប្រសិនបើមានកិច្ចព្រមព្រៀងសន្តិភាព នៅក្នុងសង្រ្គាមរុស្ស៊ី-អ៊ុយក្រែន៕
ដោយៈ សរ សុជាតិ
