សម្តេចធិបតី ហ៊ុន ម៉ាណែត ចាត់ទុកអាស៊ានជានិមិត្តរូបនៃស្ថិរភាព និងវិបុលភាពនៅក្នុងតំបន់

ទន្ទឹមនេះ សម្តេចធិបតី បានចាត់ទុកកិច្ចប្រជុំកំពូលធុរកិច្ចអាស៊ាន-កម្ពុជាឆ្នាំ២០២៥ ជាកាតាលីករសម្រាប់ជំរុញវឌ្ឍនភាពជាក់ស្តែងនៅក្នុងតំបន់ ស្របពេលដែលកម្ពុជាបាននិងកំពុងផ្តោតលើការវិនិយោគជាយុទ្ធសាស្រ្តលើបណ្តាញហេដ្ឋារចនាសម្ព័ន្ធរូបវន្ត ដើម្បីធានាបាននូវការតភ្ជាប់ដោយរលូនជាមួយអាស៊ាន និងតំបន់ផ្សេងទៀត។

នាពិធីបើក«កិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៥»នៅថ្ងៃទី៦ ខែមីនា ឆ្នាំ២០២៥ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានចាត់ទុកកិច្ចប្រជុំកំពូលធុរកិច្ចនេះ មិនត្រឹមតែជាវេទិកាជជែងពិភាក្សាប៉ុណ្ណោះទេ តែជាកាតាលីករសម្រាប់ជំរុញវឌ្ឍនភាពជាក់ស្តែងនៅក្នុងតំបន់។ បើតាមសម្តេចធិបតី ជាមួយនឹងការទទួលស្គាល់ពីតួនាទីដ៏សំខាន់របស់កម្ពុជាក្នុងការជំរុញវិបុលភាពតំបន់ រាជរដ្ឋាភិបាលកម្ពុជាបានជំរុញយ៉ាងសកម្មនូវបរិយាកាសអំណោយផលដល់ការវិនិយោគ តាមរយៈការកែលម្អជាបន្តបន្ទាប់ ហើយដើម្បីធានាបាននូវការតភ្ជាប់ដោយរលូនជាមួយរដ្ឋសមាជិកអាស៊ាន និងតំបន់ផ្សេងទៀត កម្ពុជាកំពុងវិនិយោគជាយុទ្ធសាស្រ្តលើបណ្តាញហេដ្ឋារចនាសម្ព័ន្ធរូបវន្ត ប្រកបដោយភាពគ្រប់ជ្រុងជ្រោយ ដែលរួមបញ្ចូលទាំងផ្លូវល្បឿនលឿន កំពង់ផែទឹកជ្រៅ អាកាសយានដ្ឋានអន្តរជាតិ និងមជ្ឈមណ្ឌលភស្តុភារកម្ម។

សម្តេចធិបតីបានបន្តថា ក្នុងនាមជាសមាជិកនៃអង្គការពាណិជ្ជកម្មពិភពលោក កម្ពុជាបានបង្ហាញពីការប្ដេជ្ញាចិត្តយ៉ាងមុតមាំចំពោះការធ្វើពាណិជ្ជកម្មដោយស្មើភាព និងតម្លាភាព ដោយកម្ពុជាផ្តោតលើការសម្រេចបាននូវសហគមន៍សេដ្ឋកិច្ច ប្រកបដោយជវភាព និងសមាហរណកម្ម តាមរយៈសេរីភាវូបនីយកម្មពាណិជ្ជកម្មដ៏រឹងមាំ និងកិច្ចសម្រួលពាណិជ្ជកម្ម។ មិនតែប៉ុណ្ណោះ ក្នុងភាពជាដៃគូជិតស្និទ្ធជាមួយប្រទេសជិតខាងអាស៊ាន កម្ពុជាបាននិងកំពុងធ្វើការយ៉ាងយកចិត្តទុកដាក់ ដើម្បីរុះរើ និងកាត់បន្ថយរបាំងពាណិជ្ជកម្ម សម្រួលនីតិវិធីគយ សម្រួលនីតិវិធីចុះបញ្ជីអាជីវកម្ម និងបង្កើតបរិយាកាសគតិយុត្ត ប្រកបដោយភាពច្បាស់លាស់ និងតម្លាភាព។ ជាមួយគ្នានេះ កម្ពុជាក៏ផ្តោតលើការបើកចំហទីផ្សារ តាមរយៈកិច្ចព្រមព្រៀងពាណិជ្ជកម្មសេរីជាយុទ្ធសាស្ត្រ ដើម្បីផ្តល់លទ្ធភាពចូលទៅកាន់ទីផ្សារអាស៊ាន ក៏ដូចជាទីផ្សារសេដ្ឋកិច្ចពិភពលោកសំខាន់ៗដូចជាសហភាពអឺរ៉ុប សហរដ្ឋអាម៉េរិក ចិន កូរ៉េ និងអេមីរ៉ាតអារ៉ាប់រួម ប្រកបដោយការអនុគ្រោះផងដែរ។

ជាមួយគ្នានេះឯកឧត្តម តាន់ មុនីវណ្ណ អនុប្រធានសភាពាណិជ្ជកម្មកម្ពុជាបានគូសបញ្ជាក់ថា តាមរយៈកិច្ចប្រជុំកំពូលធុរកិច្ចអាស៊ាន-កម្ពុជានាពេលនេះ គឺជាកាលានុវត្តភាពបន្ថែមសម្រាប់កម្ពុជាក្នុងការទទួលបាននូវឱកាសវិនិយោគថ្មីៗពីបណ្តាវិនិយោគិនជាតិ និងអន្តរជាតិ ដែលបានចូលរួម ដ្បិតថា វិនិយោគិនទាំងនោះបានបង្ហាញការចាប់អារម្មណ៍ខ្លាំងមកលើការរីក ចម្រើនរបស់កម្ពុជា ជាមួយនឹងបរិយាកាសវិនិយោគដ៏ទាក់ទាញ និងអំណោយផល ជាមួយគោលនយោបាយបើកចំហររបស់រាជរដ្ឋាភិបាលកម្ពុជាជាមួយវិស័យឯកជន។ តែយ៉ាងណា អ្នកជំនាញរូបនេះយល់ឃើញថា ដើម្បីសម្រេចបាននូវភាពល្អប្រសើរក្នុងការទទួលបាននូវឱកាសវិនិយោគ និងធុរកិច្ចថ្មីៗបន្ថែម ក្រៅពីមានគោលនយោបាយល្អៗរបស់រាជរដ្ឋាភិបាល ក៏ត្រូវការកិច្ចសហការគ្នាបន្ថែមពីវិស័យឯកជនក្នុងស្រុកផងដែរ។

គួរជម្រាបថា កិច្ចប្រជុំកំពូលធុរកិច្ចអាស៊ាន-កម្ពុជាឆ្នាំ២០២៥ ក្រោមមូលបទ«ជំរុញការតភ្ជាប់អាស៊ាន៖ មនុស្ស ហេដ្ឋារចនាសម្ព័ន្ធ និងពាណិជ្ជកម្ម» មានការចូលរួមពីបណ្តាលក្រុមហ៊ុនជាតិ និងអន្តរជាតិ សរុប៣១៥ក្រុមហ៊ុន និងធុរជនជាង៥០០នាក់៕

អត្ថបទ សោម ស្រីពេជ្រ និងរូបភាព តែន ចិន