លោក ពូទីន ស្វាគមន៍លោក ស៊ី មកកាន់ទីក្រុងមូស្គូ ចំពេលស្ថានភាពសង្រ្គាមនៅអ៊ុយក្រែនបន្ដឆេះឆួល

លោក Xi ក្លាយជាមេដឹកនាំពិភពលោកដំបូងគេ ដែលបានចាប់ដៃលោក Putin តាំងពីតុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួនមេដឹកនាំរុស្ស៊ីកាលពីថ្ងៃសុក្រសប្ដាហ៍មុន ជុំវិញការចាប់បញ្ជូនកុមារអ៊ុយក្រែនរាប់រយនាក់ទៅកាន់ប្រទេសរុស្ស៊ីចាប់តាំងពីការចាប់ផ្តើមនៃសង្រ្គាម ប៉ុន្តែទីក្រុងម៉ូស្គូបដិសេធការចោទប្រកាន់នេះ។

ប្រទេសរុស្ស៊ីនឹងបង្ហាញថា ដំណើរទស្សនកិច្ចរបស់លោក Xi ជាលើកដំបូងចាប់តាំងពីទទួលបានអាណត្តិទី៣ធ្វើជាប្រធានាធិបតីចិនក្នុងខែនេះ គឺជាភស្តុតាងបង្ហាញថា រុស្ស៊ីមានមិត្តដ៏មានឥទ្ធិពលមួយដែលត្រៀមខ្លួនរួមគ្នាប្រឆាំងនឹងបស្ចឹមលោកដែលរុស្ស៊ីនិយាយថា កំពុងព្យាយាមធ្វើឱ្យ រុស្ស៊ីឯកោ និងកម្ចាត់រុស្ស៊ីផងដែរ។

សម្រាប់លោក Xi វិញ ដំណើរទស្សនកិច្ចនេះនឹងក្លាយជាការរឹតបន្តឹងការទូតដោយប្រទេសចិនបានបង្ហាញសំណើចំនួន ១២ ចំណុច ដើម្បីដោះស្រាយវិបត្តិនៅអ៊ុយក្រែន ប៉ុន្តែវាក៏ជាពេលវេលាមួយសម្រាប់ការពង្រឹងទំនាក់ទំនងជាមួយសម្ព័ន្ធមិត្តរបស់ខ្លួនផងដែរ។

នៅក្នុងអត្ថបទមួយដែលបានចេញផ្សាយនៅមុនពេលចាប់ផ្ដើមដំណើរទស្សនកិច្ចទៅកាន់ទីក្រុងម៉ូស្គូនេះ លោក Xi បាននិយាយថា សំណើរបស់ប្រទេសចិនទាំង១២ចំណុច ដែលបានចេញផ្សាយកាលពីខែមុននេះបានឆ្លុះបញ្ចាំងពីទស្សនៈពិភពលោក និងស្វែងរកការបន្សាបផលវិបាក ប៉ុន្តែលោកក៏បានទទួលស្គាល់ដែរថា ដំណោះស្រាយនេះគឺមិនងាយស្រួលនោះទេ។

ស្របពេលនេះដែរ រដ្ឋមន្ត្រីក្រសួងយុត្តិធម៌មកពីជុំវិញពិភពលោកនឹងជួបប្រជុំគ្នានៅទីក្រុងឡុងដ៍នៅថ្ងៃចន្ទនេះ ដើម្បីពិភាក្សាអំពីការគាំទ្រចំពោះតុលាការឧក្រិដ្ឋកម្មអន្តរជាតិបន្ទាប់ពីតុលាការនេះបានចេញដីកាចាប់ខ្លួនលោក ពូទីន។

ឧបនាយករដ្ឋមន្ត្រីអង់គ្លេសលោក Dominic Raab បាននិយាយថា ពួកគេនឹងប្រមូលផ្តុំគ្នានៅទីក្រុងឡុងដ៍ថ្ងៃនេះ ដោយរួបរួមគ្នាក្នុងបុព្វហេតុមួយ គឺដើម្បីចាប់ខ្លួនឧក្រិដ្ឋជនសង្រ្គាម ដើម្បីឱ្យទទួលខុសត្រូវចំពោះអំពើឃោរឃៅដែលបានប្រព្រឹត្តនៅអ៊ុយក្រែនក្នុងអំឡុងពេលការលុកលុយដ៏អយុត្តិធម៌ គ្មានហេតុផល និងខុសច្បាប់មួយនេះ៕