ស្ត្រីទីមួយរបស់កម្ពុជា លើកទឹកចិត្តឱ្យស្រ្តី និងក្មេងស្រី ចាប់យកជំនាញបច្ចេកវិទ្យា ដែលកំពុងមានទីផ្សារខ្ពស់

ជាមួយគ្នានេះ ប្រមុខរាជរដ្ឋាភិបាលកម្ពុជា បានអះអាងថា ការពង្រឹងសមភាពយេនឌ័រនៅតែបន្តជាកិច្ចការអាទិភាព និងកាន់តែចាំបាច់ ដើម្បីឱ្យស្រ្តី និងក្មេងស្រីគ្រប់រូបទទួលបាននូវកាលានុវត្តភាពពេញលេញ និងប្រកបដោយសមភាពនៅក្នុង​គ្រប់ទិដ្ឋភាពទាំងក្នុងវិស័យនយោបាយ សេដ្ឋកិច្ច និងសង្គម។

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ស្ត្រីទីមួយរបស់កម្ពុជា បានគូសបញ្ជាក់ថា នៅក្នុងយុគសម័យឌីជីថលបុគ្គលគ្រប់រូប ទាំងក្មេងស្រី និងក្មេងប្រុស អាចចាប់យកជំនាញ មុខរបរការងារនៅក្នុងសង្គមស្របតាមសេចក្តីស្រលាញ់ និងចំណង់ចំណូលចិត្តរបស់ខ្លួន ដោយមិនប្រកាន់ភេទ ឬយេនឌ័រនោះទេ ពោលគឺគ្រប់គ្នាមានសិទ្ធក្នុងការរៀនសូត្រ ជ្រើសរើសមុខរបរសមស្របតាមសមត្ថភាព និង បំណងប្រាថ្នារបស់ខ្លួន ដើម្បីចូលរួមអភិវឌ្ឍន៍ប្រទេសជាតិ។

យ៉ាងណាមិញនៅក្នុងយុគសម័យឌីជីថលនេះ ការចាប់យកចំណេះដឹងឌីជីថលជាមូលដ្ឋានគ្រឹះដ៏សំខាន់សម្រាប់គ្រប់ៗគ្នាក្នុងការបង្កើនគុណភាព ប្រសិទ្ធភាពនៃការប្រាស្រ័យទាក់ទងប្រចាំថ្ងៃ និងការអភិវឌ្ឍជំនាញនិងមុខរបរ។

មួយវិញទៀត ការចាប់យកជំនាញផ្នែកបច្ចេកវិទ្យាឌីជីថល គឺជាវិស័យដែលមានទីផ្សារការងារខ្ពស់ ហើយកន្លងមកស្ត្រីនៅមានចំនួនតិចប៉ុណ្ណោះ ដែលបានចូលរួម និងចាប់យកជំនាញនេះ។ ក្នុងឱកាសទិវារអន្តរជាតិនារី ៨ មីនា ឆ្នាំ២០២៤នេះ លោកជំទាវលើកទឹកចិត្តឱ្យពលរដ្ឋទាំងអស់ចូលរួមជួយលើកកម្ពស់ការចូលរួមរបស់ស្រ្តី និងក្មេងស្រីក្នុងវិស័យឌីជីថល ការប្រើប្រាស់បច្ចេកវិទ្យា ការអប់រំផ្នែកវិទ្យាសាស្ត្រ បច្ចេកវិទ្យាវិស្វកម្ម សិល្បៈច្នៃប្រឌិត និងគណិតវិទ្យា។

ជាមួយគ្នានេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចាត់ទុកការប្រារព្ធអបអរសាទរខួបទី១១៣ ទិវាអន្ដរជាតិនារី ៨មីនា ឆ្នាំ២០២៤ ដែលធ្វើឡើងក្រោមមូលបទ ស្រ្តី និងក្មេងស្រី ក្នុងបរិវត្តកម្មឌីជីថល គឺដើម្បីរំលេចអំពីសក្កានុពល និងសារសំខាន់នៃការចូលរួម និងភាពជាតំណាងរបស់ស្រ្តី និងក្មេងស្រីក្នុងសេដ្ឋកិច្ច និងសង្គមឌីជីថលនៅកម្ពុជា។ ទន្ទឹមនេះ សម្ដេចធិបតី ក៏បានគាំទ្រចំពោះខ្លឹមសារនៃមូលបទនេះ ដោយបានឆ្លើយតបនឹងបរិបថនៃការវិវឌ្ឍរបស់សង្គមនៅក្នុងយុគសម័យឌីជីថល និងស្របតាមការកំណត់ក្នុងយុទ្ធសាស្ត្របញ្ចកោណដំណាក់កាលទី១ ក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ និងក្រមខណ្ឌគោលនយោបាយលើកកម្ពស់សមភាពយេនឌ័រ និងបង្កើនភាពអង់អាចរបស់ស្ត្រី និងក្មេងស្រីផងដែរ។ ​

បើតាមប្រមុខរាជរដ្ឋាភិបាលកម្ពុជាការពង្រឹងសមភាពយេនឌ័រនៅតែបន្តជាកិច្ចការអាទិភាព និងកាន់តែចាំបាច់ ដើម្បីឱ្យស្រ្តី និងក្មេងស្រីគ្រប់រូប ទទួលបាននូវកាលានុវត្តភាពពេញលេញ និងប្រកបដោយសមភាពនៅក្នុងគ្រប់ទិដ្ឋភាព ទាំងក្នុងវិស័យនយោបាយ សេដ្ឋកិច្ច និងសង្គម ព្រមទាំងទទួលបាននូវសិទ្ធិចូលរួមដោយស្មើភាព និងជាដៃគូមិនអាចខ្វះបាន ជាមួយនឹងបុរសនៅក្នុងកិច្ចអភិវឌ្ឍន៍​ប្រទេសជាតិ ជាពិសេស នៅក្នុងរបៀបវារៈនៃការធ្វើបរិវត្តន៍កម្មឌីជីថលនៅក្នុងសង្គម និងសេដ្ឋកិច្ចកម្ពុជា៕