ផែនការទាញយកធនធានរ៉ែកម្រតម្លៃ១,៥ទ្រីលានដុល្លាររបស់អាម៉េរិក មិនទាន់មានបន្លឺនៅឡើយទេ

មកទល់ពេលនេះ ជោគវាសនានៃការទាញយក និងប្រើប្រាស់កំណប់រ៉ែកម្រលីចូមតម្លៃប្រមាណ១,៥ទ្រីលានដុល្លារ ដែលគេបានរកឃើញនៅតំបន់ជួរភ្នំភ្លើងចំណាស់រាប់លានឆ្នាំនៅតាមបណ្តោយព្រំដែននៃរដ្ឋណេវ៉ាដា និងអូរីហ្គន សហរដ្ឋអាម៉េរិកមិនទាន់មានពន្លឺនៅឡើយទេ។ បើតាមសេចក្តីរាយការណ៍ របស់ក្រុមអ្នកស្រាវជ្រាវមកពីសាជីវកម្មលីចូមអាម៉េរិក, ក្រុមហ៊ុន GNS Science, និងសាកលវិទ្យាល័យរដ្ឋអូរីហ្គន កំណប់រ៉ែលីចូមនៅសហរដ្ឋអាម៉េរិក មានទម្ងន់ចន្លោះពី២០ទៅ៤០លានតោនលើសកំណប់រ៉ែនេះនៅអូស្រ្តាលី និងឈីលីទៅទៀត។

ពាក់ព័ន្ធបញ្ហានេះ លោក អាណូក បស (Anouk Borst ) ភូគព្ភវិទូម្នាក់បានអះអាងថា វត្តមានធនធានរ៉ែកម្រដ៏មហាសាលនេះ វាអាចផ្លាស់ប្តូរសក្ដានុពលរបស់រ៉ែលីចូមជាសាកល ទាក់ទងនឹងតម្លៃផងដែរ។​​ ​

ដោយឡែក លោក ថូម៉ា បេនសុន (Thomas Benson ) ភូគព្ភវិទូ នៃក្រុមហ៊ុនសាជីវកម្ម Lithium America លើកឡើងថា ប្រតិបត្តិការរុករកធនធានរ៉ែកម្រេលីចូមនៅអាម៉េរិក ទំនងជាអាចធ្វើឡើងនៅដើមឆ្នាំ២០២៦។

រ៉ែលីចូមមានគុណភាពខុសៗគ្នា តែគេរំពឹងថា រ៉ែលីចូមនៅសហរដ្ឋអាម៉េរិក ជារ៉ែកម្រដ៏ពិសេសមួយប្រភេទ។ កាលពីឆ្នាំ២០២០ រ៉ែលីចូមមានតម្លៃត្រឹមតែ៥ពាន់៨រយដុល្លារប៉ុណ្ណោះក្នុង១តោន ប៉ុន្តែដល់ឆ្នាំ២០២២ វាបានឡើងដល់៨ម៉ឺនដុល្លារ ហើយបច្ចុប្បន្នវាធ្លាក់មកនៅត្រឹម៣ម៉ឺនដុល្លារក្នុងមួយតោន៕

ដោយៈ សរ សុជាតិ