តើមានប្រទេសចំនួនប៉ុន្មានហើយ ដែលបានដាក់សំណើសុំចរចារឿងពន្ធជាមួយសហរដ្ឋអាម៉េរិក?

ទីប្រឹក្សាសេដ្ឋកិច្ចកំពូលរបស់សេតវិមានលោក ខេវិន ហាសេត (Kevin Hassett) បានអះអាងថា ក្រោយលោក ដូណាល់ ត្រាំ ប្រធានាធិបតីសហរដ្ឋអាម៉េរិក ប្រកាសដាក់ចេញចំណាត់ការពន្ធលើប្រទេស និងដែនដីជាង១៨០កាលពីពេលថ្មីៗ មានប្រទេសខ្លះខឹងសម្បារ និងបានប្រកាសដាក់ពន្ធសងសឹកតបតវិញ ហើយប្រទេសខ្លះបានដាក់ពាក្យសុំចរចាជាមួយសហរដ្ឋអាម៉េរិកជុំវិញបញ្ហានេះ។ បើយោងតាមរបាយការណ៍របស់ការិយាល័យតំណាងពាណិជ្ជកម្មសហរដ្ឋអាម៉េរិកមានប្រទេសជាង៥០ហើយ ដែលបានទំនាក់ទំនងមកសេតវិមាន ដើម្បីសុំចរចា។

បើតាមការបង្ហើបឱ្យដឹងពីមន្ត្រីជាន់ខ្ពស់ខាងលើ ប្រទេសដែលកំពុងព្យាយាមបើកផ្លូវចរចាជាមួយអាម៉េរិកមានតាំងពីអ៊ីស្រាអែល ដែលជាសម្ព័ន្ធមិត្តរបស់សហរដ្ឋអាម៉េរិក និងវៀតណាមជាដើម ហើយកម្ពុជាក៏បានដាក់លិខិតសុំចរចាជាមួយសហរដ្ឋអាម៉េរិកផងដែរ។ បើគ្មានការប្រែប្រួលទេ វិធានការពន្ធទៅវិញទៅមករបស់សហរដ្ឋអាម៉េរិក ដែលដាក់លើប្រទេសជាដៃគូពាណិជ្ជកម្មនេះ នឹងចូលជាធរមាននៅថ្ងៃទី៩ ខែមេសា ដ៏ខ្លីខាងមុខនេះ ហើយមកទល់ពេលនេះមិនទាន់មានដំណឹងណាបញ្ជាក់ថា ពន្ធនេះនឹងត្រូវពន្យារអនុវត្តនៅឡើយទេ។

ជាមួយគ្នានេះលោក ត្រាំ បានអះអាងថា លោកនឹងមិនថយក្រោយឡើយក្នុងការអនុវត្តវិធានការពន្ធទៅវិញទៅមកនេះ។ លោកបានសង្កត់ធ្ងន់ថា លោកមិនចង់ឃើញពិភពលោកមានបញ្ហាណាមួយកើតមានឡើងនោះទេ ហើយការដាក់ចេញវិធានការពន្ធនេះគ្រាន់តែចង់ឲ្យប្រទេសនានាធ្វើពាណិជ្ជកម្មជាមួយនឹងសហរដ្ឋអាម៉េរិកដោយស្មើភាព៕

ដោយៈ សរ សុជាតិ