ដំណឹងធ្វើសមយុទ្ធយោធារួមគ្នារវាងមហាអំណាចទាំងពីរនេះ ធ្លាក់មកចំពេល ប្រទេសឥណ្ឌាបាននិងកំពុងធ្វើសមយុទ្ធយោធារួមគ្នាមួយដែរជាមួយនឹង ប្រទេសជប៉ុន នៅចំពោះមុខការរីសាយនៃឥទ្ធិពលអំណាចយោធាចិននៅក្នុងតំបន់។
បើយោងតាមកងកម្លាំងប្រដាប់អាវុធអាហ្រ្វិកខាងត្បូង បាននិយាយកាលពីថ្ងៃព្រហស្បតិ៍ ទី១៩ខែមករាថា ពួកគេនិងកងទ័ពជើងទឹករុស្ស៊ី រួមជាមួយប្រទេសចិននឹងចូលរួមនៅក្នុង «សមយុទ្ធដែនសមុទ្រពហុជាតិសាសន៍» ចាប់ពីថ្ងៃទី ១៧ដល់២៧ខែកុម្ភៈខាងមុខ ដែលនឹងធ្វើឡើងនៅឆ្នេរសមុទ្រភាគខាងកើតរបស់ប្រទេសអាហ្វ្រិកខាងត្បូង នៃតំបន់ឈូងសមុទ្រឥណ្ឌា។
គួរកត់សម្គាល់ថា សមយុទ្ធនេះនឹងធ្វើឡើង អំឡុងថ្ងៃគម្រប់ខួបមួយឆ្នាំ នៃការឈ្លានពានរបស់រុស្ស៊ីលើអ៊ុយក្រែនផងដែរ គឺនៅថ្ងៃទី២៤ខែកុម្ភៈ។ ជាមួយគ្នានេះ វាធ្វើឱ្យមានការចាប់អារម្មណ៍ កាន់តែខ្លាំងថារុស្ស៊ីនិងចិន ហាក់កំពុងបង្កើនឥទ្ធិពលថែមទៀតទៅលើប្រទេសនៅទ្វីបអាហ្រ្វិកមួយនេះ ស្របពេលដែលប្រទេសលោកខាងលិចមិនសូវជាយកចិត្តទុកដាក់ឡើយ។
មែនទែនទៅ ការប្រកាសនៃសមយុទ្ធនេះ ក៏កើតមានប៉ុន្មានថ្ងៃមុនពេលរដ្ឋមន្ត្រីការបរទេសរុស្ស៊ីលោក Sergey Lavrov ត្រូវទៅបំពេញទស្សនកិច្ចនៅអាហ្វ្រិកខាងត្បូង ដោយគ្រោងជួបពិភាក្សាជាមួយសមភាគីអាហ្វ្រិកខាងត្បូង គឺលោកស្រី ណាលីឌី ផេនដរ(Naledi Pandor) រដ្ឋមន្ត្រីការបរទេសនៃអាហ្រិកខាងត្បូង។
អត្ថបទគួរអាន
យ៉ាងណាមិញ រដ្ឋាភិបាលអាហ្រ្វិកខាងត្បូងបានគូសបញ្ជាក់ថា ខ្លួនមានជំហរអព្យាក្រឹតទៅលើបញ្ហានៅអ៊ុយក្រែន ហើយបានអំពាវនាវឱ្យមានកិច្ចសន្ទនាតាមផ្លូវការទូត ដើម្បីដោះស្រាយជម្លោះ។ ប៉ុន្តែសមយុទ្ធកងទ័ពជើងទឹកនាពេលខាងមុខបាននាំឱ្យគណបក្សប្រឆាំងនៅអាហ្វ្រិកខាងត្បូង ចោទប្រកាន់រដ្ឋាភិបាលថាលំអៀងទៅខាងប្រទេសរុស្ស៊ីរួចស្រេចទៅហើយ។ យ៉ាងណាក៏ដោយ រដ្ឋាភិបាលអាហ្វ្រិកខាងត្បូងបដិសេធថា ខ្លួនមិនឈរនៅខាងនរណាទាំងអស់ក្នុងជម្លោះរុស្ស៊ី-អ៊ុយក្រែន ហើយបានអំពាវនាវឲ្យបញ្ចប់សង្គ្រាមឱ្យបានឆាប់រហ័ស។
ដោយឡែក កងការពារជាតិអាហ្រ្វិកខាងត្បូងបាននិយាយថា៖ សមយុទ្ធកងទ័ពជើងទឹកនៅខែក្រោយនេះនឹងពង្រឹងទំនាក់ទំនងបន្ថែមពីលើកិច្ចសហការ ដែលកំពុងរីកចម្រើនរួចស្រេចទៅហើយរវាងអាហ្វ្រិកខាងត្បូង រុស្ស៊ី និងចិន។ ដូច្នេះ សមយុទ្ធនេះ គ្រាន់តែចង់ចែករំលែកជំនាញប្រតិបត្តិការ និងចំណេះដឹងផ្នែកយោធាបន្ថែមតែប៉ុណ្ណោះ។
សូមជម្រាបថា អាហ្វ្រិកខាងត្បូង ជាប្រទេសមួយក្នុងចំណោមប្រទេសតំបន់អាហ្រ្វិកជាច្រើនទៀត ដែលបានបោះឆ្នោតអនុប្បវាទចំពោះសេចក្តីសម្រេចអង្គការសហប្រជាជាតិកាលពីឆ្នាំមុន លើការថ្កោលទោសអំពើឈ្លានពានរបស់រុស្ស៊ីទៅលើអ៊ុយក្រែន។ កន្លងមកសហរដ្ឋអាមេរិក និងសហភាពអឺរ៉ុបធ្លាប់បានសង្ឃឹមយ៉ាងមុតមាំថា អាហ្វ្រិកខាងត្បូងនឹងគាំទ្រការថ្កោលទោសរុស្ស៊ីជាអន្តរជាតិ ដើម្បីជាគំរូសម្រាប់ប្រទេសផ្សេងទៀតនៅទ្វីបអាហ្វ្រិក។
ទោះបីជាបែបនេះក្តី អ្នកជំនាញបានព្រមានអំពីការកំណើននៃឥទ្ធិពលយោធារបស់រុស្ស៊ីនៅក្នុងទ្វីបអាហ្រ្វិកចាប់តាំងពីទីក្រុងម៉ស្គូបានបញ្ចូលដែនដីគ្រីមៀជាទឹកដីរបស់ខ្លួននៅក្នុងឆ្នាំ២០១៤។ អាមេរិកក្រោមរដ្ឋបាលលោកបៃដិន ក៏បានទទួលស្គាល់ពីសារៈសំខាន់នៃការពង្រឹងទំនាក់ទំនងអាហ្វ្រិកខាងត្បូងនេះដែរ បន្ទាប់ពីប្រទេសចិនបានចំណាយពេលជាច្រើនទសវត្សរ៍ក្នុងការពង្រឹងទីផ្សារ និងធនធានធម្មជាតិរបស់ខ្លួនជាមួយទ្វីបនេះ។ ប្រទេសអាហ្រ្វិកខាងត្បូង ក៏ជាសមាជិកនៃប្លុកប្រទេសដែលមានសេដ្ឋកិច្ចរីកចម្រើនហៅកាត់ថា BRICS រួមជាមួយសមាជិកផ្សេងទៀតដូចជា ប្រេស៊ីល រុស្ស៊ី ឥណ្ឌា និងចិនផងដែរ៕
