រុស្ស៊ីកំពុងព្យាយាមរម្ងាប់កង្វល់ជុំវិញបញ្ហាសន្តិសុខរបស់ប្រព័ន្ធតេឡេក្រាម ក្រោយស្ថាបនិកប្រព័ន្ធនេះត្រូវបានអាជ្ញាធរបារាំងចាប់ខ្លួន

សេដ្ឋីបច្ចេកវិទ្យា និងជាស្ថាបនិកបណ្តាញសង្គមតេឡេក្រាម លោក ប៉ាវែល ឌូរ៉ូវ ជនជាតិរុស្ស៊ីកាត់បារាំងវ័យ៣៩ឆ្នាំ ត្រូវបានអាជ្ញាធរបារាំងចាប់ខ្លួនកាលពីចុងសប្តាហ៍មុន ពេលលោកត្រឡប់មកពីប្រទេសអេមីរ៉ាតអារ៉ាប់រួម ក្រោមបទចោទបានល្មើសច្បាប់បារាំង និងអឺរ៉ុបជុំវិញការចែកចាយរូបភាពអាសអាភាសរបស់កុមារតាមប្រព័ន្ធតេឡេក្រាម ការឆបោក ការជួញដូរគ្រឿងញៀន និងការផ្ទេរប្រាក់សម្រាប់សកម្មភាពធ្វើភេរវកម្ម។

ការចាប់ខ្លួនស្ថាបនិករូបនេះ បានធ្វើឱ្យអ្នកប្រើប្រាស់ប្រព័ន្ធនេះប្រមាណ៩៥០លាននាក់ នៅលើពិភពលោកបានបង្ហាញការព្រួយបារម្ភចំពោះសន្តិសុខរបស់ប្រព័ន្ធនេះ បន្ទាប់ពីមានការអំពាវនាវឱ្យអ្នកប្រើប្រាស់លុបចោលសារដ៏រសើបរបស់ពួកគេចេញពីប្រព័ន្ធនេះ ប៉ុន្តែថ្មីៗនេះរដ្ឋាភិបាលរុស្ស៊ីបានព្យាយាមរម្ងាប់ការព្រួយបារម្ភនេះ។

អ្នកនាំពាក្យរដ្ឋាភិបាលរុស្ស៊ី លោក ឌីមីទ្រី ផេស្កូវ (Dmitry Peskov) បានប្រាប់ក្រុមអ្នកសារព័ត៌មានកាលពីថ្ងៃអង្គារថា ការអំពាវនាវរបស់អាជ្ញាធរបារាំងឱ្យអ្នកប្រើប្រាស់លុបសាររបស់ពួកគេនៅលើកម្មវិធីនេះ គឺជារឿងឆោតល្ងង់ ហើយបានចាត់ទុកការចោទប្រកាន់ទោសលើលោក ឌូរ៉ូវ គឺមានស្ថានទម្ងន់ទោសធ្ងន់ធ្ងរពេក ហើយលោកក៏បានស្នើឱ្យអាជ្ញាធរបារាំងបង្ហាញភស្តុតាងជាក់ស្ដែងដើម្បីដាក់បន្ទុកលើសេដ្ឋីរូបនេះផងដែរ។

អ្នកនាំពាក្យរូបនេះបានសង្កត់ធ្ងន់ថា បើអាជ្ញាធរបារាំងមិនបង្ហាញភស្តុតាងទេនោះ ការចោទប្រកាន់ទោសទាំងនេះ គឺជាការប៉ុនប៉ងដោយផ្ទាល់ដើម្បីរឹតបន្តឹងសេរីភាពលើប្រព័ន្ធទំនាក់ទំនង និងចាត់ទុកវិធានការរបស់អាជ្ញាធរបារាំង គឺជាការបំភិតបំភ័យដោយផ្ទាល់ទៅលើប្រធានក្រុមហ៊ុនដ៏ធំមួយ ក្នុងហេតុផលនយោបាយទៀតផង ប៉ុន្តែលោក អេម៉ាញូអែល ម៉ាក្រុង ប្រធានាធិបតីបារាំងបានចេញមកទាត់ចោលចំពោះការលើកឡើងរបស់មន្ត្រីជាន់ខ្ពស់រូបរុស្ស៊ីរូបនេះ៕

អត្ថបទ៖ សុខ មង្គល