យោងតាមនាយកប្រតិបត្តិនៃប្រតិបត្តិករស៊ីទែនប្រេងក្នុងប្រទេសសិង្ហបុរីបានប្រាប់កាសែត South China Morning Post ថា ទំហំស៊ីទែននៅក្នុងកំពង់ផែនានាក្នុងប្រទេសសិង្ហបុរីមានការកើនឡើងគួរឱ្យកត់សម្គាល់ ដោយសារតែគេអាចទទួលបានប្រាក់ចំណេញច្រើន និងតម្រូវការកើនឡើងពីការលាយបញ្ចូលគ្នារវាងប្រេងឥន្ធនៈរបស់រុស្ស៊ីដែលមានតម្លៃថោក ជាមួយនឹងការដឹកជញ្ជូនពីប្រភពផ្សេងៗទៀត។ ពួកគេបាននិយាយថា ការធ្វើបែបនេះ គឺដើម្បីបិទបាំងប្រភពដើមផលិតផលប្រេងរបស់រុស្ស៊ី។
មែនទែនទៅ បើទោះបីជាសម្ព័ន្ធមិត្តដ៏ជិតស្និទ្ធរបស់អាមេរិកមែន សិង្ហបុរីមិនបានហាមឃាត់ការនាំចូលប្រេង ឬផលិតផលពាក់ព័ន្ធជាមួយប្រេង ពីប្រទេសរុស្ស៊ីទេ ទោះបីជាស្ថាប័នហិរញ្ញវត្ថុ ដែលមានមូលដ្ឋាននៅក្នុងប្រទេសមួយនេះ ត្រូវបានហាមឃាត់មិនឱ្យផ្តល់ហិរញ្ញប្បទាន ឬធ្វើប្រតិបត្តិការទូទាត់ជាមួយទំនិញ និងក្រុមហ៊ុនរបស់រុស្ស៊ីក៏ដោយ។
បើតាមទីភ្នាក់ងាររដ្ឋាភិបាលសិង្ហបុរី គេមិនបានផ្តល់ការអត្ថាធិប្បាយជុំវិញរឿងនេះទេ ដោយគ្រាន់តែបញ្ជាក់ឡើងវិញពីគោលនយោបាយកំណត់តម្លៃប្រេងរបស់ខ្លួនលើប្រទេសរុស្ស៊ីតែប៉ុណ្ណោះ។ ទោះបីជាយ៉ាងណាក៏ដោយ ការដោះស្រាយ និងការជួញដូរប្រេងឥន្ធនៈរបស់រុស្ស៊ី នៅតែជាបញ្ហារសើបនៅក្នុងតំបន់ ដោយអ្នកទិញមួយចំនួនមិនចង់ឱ្យគេឃើញថា ខ្លួនកំពុងទិញប្រេងរបស់រុស្ស៊ីនោះទេ។
អត្ថបទគួរអាន
ជាក់ស្តែង លំហូរប្រេងឆៅ និងប្រេងឥន្ធនៈរបស់រុស្ស៊ីមកកាន់តំបន់អាស៊ី និងមជ្ឈិមបូព៌ាបានហក់ឡើងខ្ពស់បំផុត ចាប់តាំងពីសង្រ្គាមនៅអ៊ុយក្រែនផ្ទុះឡើងមក។ ជាមួយគ្នានោះ លោកខាងលិចបាននិងកំពុងរិះរកវិធីគ្រប់បែបយ៉ាង ដូចជាការបញ្ឈប់ការនាំចូលប្រេង និងការកំណត់ម្លៃប្រេងរុស្ស៊ីឱ្យនៅទាប ដើម្បីផ្តាច់ប្រភពចំណូលដ៏សំខាន់នេះរបស់ទីក្រុងម៉ូស្គូ។ ប្រការនេះហើយទើបជំរុញការនាំចេញប្រេងរបស់រុស្ស៊ីនៅតែកើនឡើងដដែល ពីសេសតាមរយៈការលាយបញ្ចូលគ្នា និងចែកចាយឡើងវិញដូចជានៅប្រទេសសិង្ហបុរី និងទីក្រុង ហ្វូចៃរ៉ា(Fujairah) ក្នុងប្រទេសអារ៉ាប់រួមជាដើម ដែលពួកគេអាចបញ្ចូលគ្នា រួចវេចខ្ចប់ឡើងវិញ និងនាំចេញឡើងវិញទៅកាន់ទីផ្សារសកលលោក។
សូមជម្រាបថា និន្នាការនៃការដឹកជញ្ជូនប្រេងពីរុស្ស៊ីទៅកាន់តំបន់អាស៊ីគឺមានកាន់តែច្រើនឡើងៗ ខណៈមជ្ឈមណ្ឌលក្នុងការចែកចាយប្រេងឡើងវិញក៏នឹងបង្កើនសកម្មភាពរបស់ខ្លួនផងដែរនៅក្នុងសប្តាហ៍ខាងមុខនេះ ហើយស្របពេលដែលអឺរ៉ុបកំពុងរៀបចំទណ្ឌកម្មថ្មីរបស់ខ្លួនលើប្រេងរុស្ស៊ីនៅថ្ងៃទី៥ខែកុម្ភៈខាងមុខនេះ៕
