SDF ឈ្នះពានរង្វាន់កម្រិតអន្តរជាតិ Human Capital Management (HCM) Excellence Award ពីស្ថាប័នដ៏ល្បីល្បាញរបស់សហរដ្ឋអាម៉េរិក BRANDON HALL GROUP

ការផ្ដល់ជូនពានរង្វាន់មេដាយប្រាក់នេះ ត្រូវបានឆ្លងកាត់ការវាយតម្លៃយ៉ាងម៉ត់ចត់ ពីក្រុមអ្នកជំនាញឯករាជ្យរបស់ BRANDON HALL GROUP ដោយផ្អែកលើកត្តាសំខាន់ៗរួមមាន៖

- តម្រូវការជំនាញជាក់ស្តែងក្នុងអាជីវកម្ម និងបរិបទការងារបុគ្គលិក

- ការគ្រប់គ្រងគម្រោងសិក្សា និងការអភិវឌ្ឍជំនាញ ព្រមទាំងកិច្ចសហប្រតិបត្តិការជាមួយដៃគូពាក់ព័ន្ធ

- ភាពច្នៃប្រឌិត និងបទពិសោធល្អពីដៃគូពាក់ព័ន្ធ ជាពិសេសដំណោះស្រាយបច្ចេកវិទ្យា

- ប្រសិទ្ធភាព អត្ថប្រយោជន៍ដែលអាចវាស់វែងបាន និងផលជះវិជ្ជមានពីកម្មវិធីអភិវឌ្ឍន៍​ជំនាញរបស់ខ្លួន។

លោកស្រី Rachel Cooke ប្រធានប្រតិបត្តិការនៃ BRANDON HALL GROUP និងជាអ្នកដឹកនាំកម្មវិធី HCM EXCELLENCE AWARDS បានគូសបញ្ជាក់ថា “តាមរយៈការវាយតម្លៃដ៏ល្អិតល្អន់ និងយ៉ាងម៉ត់ចត់នេះ ត្រូវបានចាត់ទុក​ជាគំរូនៃ​ឧត្តមានុវត្តន៍ និងភាពច្នៃប្រឌិតខ្ពស់​របស់ស្ថាប័ន ក្នុងការកសាងធនធានមនុស្ស។”

ជាមួយគ្នានេះ លោក Mike Cooke នាយកប្រតិបត្តិ BRANDON HALL GROUP ក៏បានលើកឡើងដែរថា

"ស្ថាប័នដែលឈ្នះពានរង្វាន់​ឆ្នាំ២០២៥នេះ បានបង្ហាញពីការប្ដេជ្ញាចិត្តខ្ពស់​ក្នុងការកសាង​បទពិសោធល្អ​ក្នុងការអភិវឌ្ឍ​ជំនាញប្រកបដោយប្រសិទ្ធភាព និងអត្ថន័យខ្លឹមសារសម្រាប់បុគ្គលិក ហើយអ្វីដែលកាន់តែពិសេសជាងនេះ គឺការផ្ដល់ដំណោះស្រាយបច្ចេកវិទ្យាថ្មីៗ និងកម្មវិធីអភិវឌ្ឍជំនាញដែលភាពច្នៃប្រឌិត​ក្នុងការបង្កើនធនធាន​មនុស្សប្រកប​ដោយប្រសិទ្ធភាព និងគុណភាព។"

សមិទ្ធផលថ្មីនេះបង្ហាញថា SDF កំពុងក្លាយជាស្ថាប័នគំរូមួយ ក្នុងការអភិវឌ្ឍជំនាញបុគ្គលិករបស់​វិស័យឯកជន ប្រកបដោយគុណភាព និងប្រសិទ្ធភាព ចូលរួមពង្រឹង និងពង្រីកកម្លាំងពលកម្មជំនាញកម្ពុជា ដើម្បីចូលរួមសម្រេចចក្ខុវិស័យឆ្នាំ២០៥០ របស់រាជរដ្ឋាភិបាល ក្នុងការប្រែក្លាយកម្ពុជា​ទៅជាប្រទេស​ចំណូលខ្ពស់។

បន្ថែមលើសនេះ មូលនិធិអភិវឌ្ឍន៍ជំនាញ (SDF) ចាត់ទុកសមិទ្ធិផលដ៏គួរកត់សម្គាល់នេះ កើតចេញពី​ការបង្កើតភាពជា​ដៃគូយុទ្ធសាស្ត្រជាមួយប្រទេសនៅក្នុងតំបន់ និងការអនុវត្តកម្មវិធី​អភិវឌ្ឍ​ជំនាញ​ប្រកបដោយ​ឧត្តមភាព។ SDF បានកសាងទំនាក់ទំនងសហប្រតិបត្តិការដ៏រឹងមាំ ជាមួយដៃគូយុទ្ធសាស្ត្រតំបន់ ជាពិសេសប្រទេសម៉ាឡេស៊ី និងសិង្ហបុរី តាមរយៈការចុះអនុស្សរណៈយោគយល់ និងកិច្ចព្រមព្រៀងដៃគូភាព​ជាមួយស្ថាប័នឈានមុខគេដូចជា HRD Corp, SNEF, AFWC, និង IAL Singapore។ តាមរយៈ ការចែករំលែក​បទពិសោធន៍ និងចំណេះដឹងពីប្រទេសទាំងនេះ ដែលបានសម្រេចជោគជ័យក្នុងការប្រែក្លាយ​ទៅជាប្រទេស​ចំណូលខ្ពស់ បានជួយ SDF ក្នុងការកែលម្អ និងអភិវឌ្ឍកម្មវិធីជំនាញថ្មីៗដែលគាំទ្រដល់ការ​អភិវឌ្ឍជំនាញ​នៅកម្ពុជា និងឆ្លើយតបនឹងស្តង់ដារតំបន់ និងអន្តរជាតិ។