ទីក្រុងតៃប៉ិ មានការព្រួយបារម្ភជាយូរណាស់មកហើយ អំពីកិច្ចខិតខំប្រឹងប្រែងរបស់ចិនក្នុងការចម្លងភាពជោគជ័យពីតៃវ៉ាន់លើការផលិតបន្ទះឈីប រួមទាំងការធ្វើចារកម្មសេដ្ឋកិច្ច ការលួចទេពកោសល្យ និងវិធីសាស្រ្តផ្សេងៗទៀតជាដើម ខណៈដែលកោះតៃវ៉ាន់ ត្រូវបានគេស្គាល់ថា គឺជាកន្លែងដែលមានការផលិតបន្ទះឈីបជឿនលឿនជាងគេមួយនៅក្នុងពិភពលោក។
មន្ត្រីជាន់ខ្ពស់របស់តៃវ៉ាន់បាននិយាយថា ខ្លួនបានស្នើឡើងនូវការដាក់ទោសទណ្ឌលើការ ចំពោះការប្រព្រឹត្តបទល្មើសចារកម្មសេដ្ឋកិច្ច ក្រោមច្បាប់សន្តិសុខជាតិរបស់តៃវ៉ាន់ ដោយក្នុងនោះកំណត់ការផ្តន្ទាទោសដាក់ពន្ធនាគាររហូតដល់ ១២ ឆ្នាំសម្រាប់អ្នកដែលធ្វើឱ្យលេចធ្លាយបច្ចេកវិទ្យាស្នូលទៅកាន់ប្រទេសចិន ឬ កងកម្លាំងសត្រូវបរទេស។
អត្ថបទទាក់ទង!
មន្ត្រីជាន់ខ្ពស់តៃវ៉ាន់និយាយទៀតថា បច្ចេកវិទ្យាបន្ទះឈីបត្រូវបានចាត់ទុកថា មានសារៈសំខាន់ខ្លាំង សម្រាប់សន្តិសុខរបស់តៃវ៉ាន់ក្រោមច្បាប់ថ្មីបន្ថែមពីលើច្បាប់ ដែលមានស្រាប់ស្ដីពីការសម្ងាត់ពាណិជ្ជកម្ម ហើយដូច្នេះការការពារបន្ថែមទៀត គឺចាំបាច់ណាស់សម្រាប់សន្តិសុខរបស់តៃវ៉ាន់។ មន្ត្រីជាន់ខ្ពស់កោះតៃវ៉ាន់ បានលើកជាឧទាហរណ៍ចំៗថា ក្រុមហ៊ុនផលិតបន្ទះឈីបតៃវ៉ាន់ TSMC មានបច្ចេកវិទ្យាឈានមុខគេលើពិភពលោក ដូច្នេះប្រសិនបើបច្ចេកវិទ្យារបស់ក្រុមហ៊ុននេះត្រូវបានគេលួច នោះនឹងមានផលប៉ះពាល់យ៉ាងខ្លាំង ទៅលើឧស្សាហកម្មបន្ទះឈីបតៃវ៉ាន់។
ជាមួយគ្នានេះ ថ្នាក់ដឹកនាំតៃវ៉ាន់ក៏បានស្នើច្បាប់រឹតបន្តឹង ដើម្បីទប់ស្កាត់ក្រុមហ៊ុនចិនពីការលួចចម្លង និងដំណើមយកអ្នកមានទេពកោសល្យរបស់តៃវ៉ាន់ដោយខុសច្បាប់ តាមរយៈក្រុមហ៊ុនដែលបានបង្កើតឡើងនៅក្នុងប្រទេសទីបី។ ក្រៅពីនេះ រដ្ឋបាលទីក្រុងតៃប៉ិ ក៏បានរឹតបន្តឹងការដាក់ទណ្ឌកម្ម លើការវិនិយោគរបស់ចិននៅតៃវ៉ាន់ តាមរយៈវិធីសាស្រ្តខុសច្បាប់ដែលនាំឱ្យមានករណីចារកម្មឧស្សាហកម្មជាច្រើនក្នុងប៉ុន្មានឆ្នាំថ្មីៗនេះ៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
