មន្ត្រីជាន់ខ្ពស់អាម៉េរិក និងចិន ជួបគ្នានៅទីក្រុងប៉ារីស ដើម្បីបន្ធូរកម្ដៅសង្គ្រាមពាណិជ្ជកម្ម

យោងតាមទីភ្នាក់ងារព័ត៌មាន Reuters កិច្ចពិភាក្សាដែលពោរពេញដោយសម្ពាធនេះ ដឹកនាំដោយផ្ទាល់ដោយលោក ស្កុត បេសសេន (Scott Bessent) រដ្ឋមន្ត្រីក្រសួងហិរញ្ញវត្ថុអាម៉េរិក និងលោក ហឺ លីហ្វឹង (He Lifeng) ឧបនាយករដ្ឋមន្ត្រីចិន។ របៀបវារៈសំខាន់ៗ ដែលត្រូវបានលើកមកដេញដោលរួមមានការកែសម្រួលពន្ធគយ ការផ្គត់ផ្គង់រ៉ែកម្រ និងមេដែកយុទ្ធសាស្ត្រពីចិន ការរឹតត្បិតបច្ចេកវិទ្យាកម្រិតខ្ពស់របស់អាម៉េរិក និងការបង្កើនការទិញផលិតផលកសិកម្មពីសហរដ្ឋអាម៉េរិក។

ភាគីទាំងពីរបានជ្រើសរើសទីស្នាក់ការកណ្តាលនៃអង្គការសម្រាប់កិច្ចសហប្រតិបត្តិការសេដ្ឋកិច្ច និងការអភិវឌ្ឍ (OECD) ក្នុងទីក្រុងប៉ារីស ជាកន្លែងតតាំងមតិគ្នា។ លោក ចេមីសុន ហ្គ្រៀ (Jamieson Greer) តំណាងពាណិជ្ជកម្មអាម៉េរិក បានបញ្ជាក់ថា នេះ គឺជាការបន្តកិច្ចខិតខំប្រឹងប្រែងពីបណ្តាជំនួបនៅអឺរ៉ុប កាលពីឆ្នាំមុន ដើម្បីទប់ស្កាត់កុំឱ្យទំនាក់ទំនងសេដ្ឋកិច្ចរវាងប្រទេសយក្សទាំងពីរធ្លាក់ក្នុងជ្រោះមហន្តរាយ។

ទោះជាយ៉ាងណា អ្នកវិភាគមើលឃើញថា ឱកាសនៃការទទួលបានលទ្ធផលផ្លែផ្កាធំដុំហាក់នៅមានកម្រិតនៅឡើយ ដោយសាររដ្ឋបាលក្រុងវ៉ាស៊ីនតោន កំពុងជាប់ដៃយ៉ាងខ្លាំងក្នុងសង្គ្រាមជាមួយអ៊ីរ៉ង់។ យ៉ាងណាក៏ដោយ កិច្ចចរចានេះនឹងពិនិត្យឡើងវិញនូវវឌ្ឍនភាព នៃកិច្ចព្រមព្រៀងក្រុងប៊ូសាន កាលពីខែតុលា ឆ្នាំ២០២៥ ដែលកាលនោះមហាអំណាចទាំងពីរបានព្រមព្រៀងគ្នាកាត់បន្ថយពន្ធនាំចូល និងផ្អាកការដាក់បញ្ជីខ្មៅលើក្រុមហ៊ុនបច្ចេកវិទ្យាចិនជាបណ្តោះអាសន្ន។

ឆ្នាំ២០២៦ នេះ អាចជាឆ្នាំ នៃរបត់ថ្មី ដ្បិតលោក ត្រាំ និងលោក ស៊ី គ្រោងនឹងជួបគ្នាផ្ទាល់រហូតដល់ទៅ៣លើក រួមមានជំនួបនៅប៉េកាំង នាពេលឆាប់ៗនេះ កិច្ចប្រជុំកំពូល APEC នៅចិនក្នុងខែវិច្ឆិកា និងកិច្ចប្រជុំ G20 ដែលសហរដ្ឋអាម៉េរិកធ្វើជាម្ចាស់ផ្ទះក្នុងខែធ្នូ។ ពិភពលោកសង្ឃឹមថា ជំនួបបន្តបន្ទាប់នេះ នឹងនាំមកនូវស្ថិរភាពសេដ្ឋកិច្ចសកលឡើងវិញ៕

អត្ថបទៈ សួន ឡង់ទី​