លោក ឃួង ស្រេង បាននិយាយនៅក្នុងលិខិតឆ្លើយតបថា បន្ទាប់ពីបានស្រាវជ្រាវ បានពិនិត្យឃើញថា ស្រះទឹកដែលជាកម្មវត្ថុនៃការតវ៉ានេះ ពុំមែនជាទ្រព្យសម្បត្តិសាធារណៈរបស់រដ្ឋបាលរាជធានីភ្នំពេញឡើយ។ លោកបន្តនៅក្នុងលិខិតដដែលថា ស្រះទឹកនេះមានបណ្ណសម្គាល់សិទ្ធិកាន់កាប់អចលទ្រព្យ ចុះថ្ងៃទី២៥ ខែសីហា ឆ្នាំ២០០៩ របស់មន្ទីររៀបចំដែនដីរាជធានីភ្នំពេញ ដែលជាកម្មសិទ្ធិរបស់លោកឧកញ៉ា លាង ឃុន និងលោកឧកញ៉ា លាង ម៉េង ដែលបានទិញពីក្រុមហ៊ុន វ៉ាយ អិល ភី គ្រុប។
កាលពីថ្ងៃទី២៧ កញ្ញា តំណាងសហគមន៍ពលរដ្ឋរស់នៅក្នុងទីក្រុងរណបហ្គ្រេនភ្នំពេញ ដែលជាអ្នកតវ៉ាជំទាស់ចំពោះគម្រោងលុបបឹង(ស្រះទឹក)ក្នុងសហគមន៍ ដោយក្រុមហ៊ុន ជីប ម៉ុង លែន នោះ បានជួបជុំគ្នាដោយមានការកាន់បដាធំៗផង ដើម្បីបញ្ជាក់ពីគោលជំហរដដែលរបស់ពួកគេថា ប្រឆាំងដាច់ខាតចំពោះគម្រោងលុបបឹងនេះ ។
លោក អ៊ិន ចាន់នី ជាអ្នកតំណាងឲ្យពលរដ្ឋចំនួន ១៤០នាក់ ដែលរស់នៅក្នុងបុរីទីក្រុងរណបហ្គ្រេនភ្នំពេញ បានបញ្ជាក់ថា កាលពីលោក ក៏ដូចជាពលរដ្ឋដែលកំពុងរស់នៅក្នុងសហគមន៍នៃទីក្រុងរណបហ្គ្រេនភ្នំពេញ បានទិញផ្ទះនៅក្នុងគម្រោងនេះ ដោយមានផ្អែកទៅតាមប្លង់មេឆ្នាំ២០០៦ ដល់ឆ្នាំ២០១៩ ដែលក្រុមហ៊ុនYLP CIPUTRA (ម្ចាស់ចាស់ទីក្រុងរណបហ្គ្រេនភ្នំពេញ) បានប្រកាសលក់ ដោយក្នុងប្លង់មេ មានស្រះទឹក កន្លែងវាយកូនហ្គោល និងសួនច្បារធំទូលាយ។ លោកបន្ថែមថា ផ្ទះដែលបានដាក់លក់នៅតាមក្បែរមាត់ស្រះទឹកនោះទៀតសោត ក៏មានតម្លៃខ្ពស់ណាស់ដែរ។
នៅខែតុលា ឆ្នាំ២០១៩ ក្រុមហ៊ុន YLP CIPUTRA បានលក់ប្រតិបត្តិការ និងទ្រព្យសម្បត្តិទាំងអស់នៅក្នុងទីក្រុងរណបហ្គ្រេនភ្នំពេញនេះ ទៅឲ្យក្រុមហ៊ុនជីប ម៉ុង លែន ដើម្បីអភិវឌ្ឍបន្ដ។
ប៉ុន្តែ បើយោងតាមលិខិតរបស់លោក ឃួង ស្រេង ចុះថ្ងៃទី២៨ កញ្ញា ឆ្នាំ២០២០ បង្ហាញថា ស្រះទឹកដែលមានទំហំបណ្ដោយ ៤២៣ម៉ែត្រ និងទទឹង ២៤៥ម៉ែត្រ បានក្លាយជាកម្មសិទ្ធិរបស់លោកឧកញ៉ា លាង ឃុន និងលោកឧកញ៉ា លាង ម៉េង ទិញពីក្រុមហ៊ុន វ៉ាយអិលភី គ្រុប តាមរយៈបណ្ណកម្មសិទ្ធិចុះថ្ងៃទី២៥ ខែសីហា ឆ្នាំ២០០៩ មកម្ល៉េះ ។
ខេមបូណូមីស ពុំទាន់អាចសុំការអត្ថាធិប្បាយពីតំណាងប្រជាពលរដ្ឋនៅក្នុងសហគមន៍ទីក្រុងរណបហ្គ្រេនភ្នំពេញ ដែលតវ៉ាប្រឆាំងគម្រោងលុបស្រះទឹក(បឹង)នេះ នៅឡើយទេ នៅវេលាចេញផ្សាយអត្ថបទនេះ ៕
