អគ្គមេធាវីនៅរដ្ឋជាច្រើនបានដាក់ពាក្យប្តឹងភាពស្របច្បាប់របស់លោក អេឡិន ម៉ាស់ ដែលត្រូវបានប្រធានាធិបតី ដូណាល់ ត្រាំ តែងតាំងឲ្យធ្វើជាប្រធានទីភ្នាក់ងារប្រសិទ្ធភាពរដ្ឋាភិបាល។ គោលបំណងនៃការដាក់ពាក្យប្តឹងនេះ គឺដើម្បីបញ្ឈប់កិច្ចខិតខំប្រឹងប្រែងរបស់កំពូលមហាសេដ្ឋីរូបនេះ ក្នុងការកាត់បន្ថយការចំណាយរបស់សហព័ន្ធក្នុងនាមជាប្រធានទីភ្នាក់ងារប្រសិទ្ធភាពរដ្ឋាភិបាលថ្មីរបស់ប្រធានាធិបតី ដែលជាការបង្កើនការតស៊ូផ្លូវច្បាប់លើឥទ្ធិពលរបស់មហាសេដ្ឋីរូបនេះនៅសេតវិមាន។
នៅក្នុងពាក្យបណ្តឹងខាងលើបានចោទប្រកាន់លោក ដូណាល់ ត្រាំ ថា បានតែងតាំងលោក ម៉ាស់ ដោយគ្មានការអនុញ្ញាតពីសភាសហរដ្ឋអាម៉េរិក។ បើយោងតាមការចុះផ្សាយរបស់សារព័ត៌មាន ABC អគ្គមេធាវីដែលផ្តុំគ្នាធ្វើពាក្យបណ្តឹងប្តឹងលោក អេឡិន ម៉ាស់ មានដល់ទៅដល់១៤រដ្ឋឯណោះ។ ពួកគេបានអះអាងថា ការតែងតាំងលោក ម៉ាស់ ឲ្យដឹកនាំស្ថាប័នដែលមិនធ្លាប់មានពីមុនមកនៅសហរដ្ឋអាម៉េរិក គឺខុសពីរដ្ឋធម្មនុញ្ញ។
ក្រុមអគ្គមេធាវីទាំងនោះ ក៏បានចោទប្រកាន់ស្ថាប័នថ្មីដែលលោក ម៉ាស់ កំពុងដឹកនាំថា កំពុងបំពានរដ្ឋធម្មនុញ្ញរបស់សហរដ្ឋអាម៉េរិក និងជាស្ថាប័នដែលកំពុងបង្កភាពភាពវឹកវរនៅសហរដ្ឋអាម៉េរិក។ ពាក្យបណ្តឹងក៏បានលើកឡើងដែរថា អំណាចរបស់លោក ម៉ាស់ ហាក់ដូចជាគ្មានដែនកំណត់ និងគ្មានការត្រួតពិនិត្យ។
ក្រៅពីរដ្ឋទាំងនេះ លោក ម៉ាស់ ក៏បានរងនូវពាក្យបណ្តឹងពីបុគ្គលិក និងអតីតបុគ្គលិករបស់ USAID ចំនួន២៦រូបផ្សេងទៀតផងដែរ។ ពាក់ព័ន្ធនឹងបញ្ហានេះអ្នកនាំពាក្យសេតវិមានលោកស្រី ខារ៉ូលីន លីវីត (Karoline Leavitt) បាននិយាយម្តងហើយម្តងទៀតថា លោក ម៉ាស់ កំពុងអនុវត្តតាមច្បាប់សហព័ន្ធដែលអាចអនុវត្តបានទាំងអស់។
យ៉ាងណាក៏ដោយទាំងលោក អេឡិន ម៉ាស់ និងលោក ដូណាល់ ត្រាំ សុទ្ធតែបានលើកឡើងថា អ្វីដែលទីភ្នាក់ងារប្រសិទ្ធភាពរដ្ឋាភិបាលថ្មីបានធ្វើ គឺគ្រាន់តែចង់យកកាកសំណល់រដ្ឋាភិបាលដ៏ច្រើនសន្ធឹកសន្ធាប់ ក៏ដូចជាអំពើពុករលួយចេញតែប៉ុណ្ណោះ៕
ដោយៈ សរ សុជាតិ
