រដ្ឋាភិបាលថៃ រំពឹងអាចប្រមូលចំណូលពន្ធបានច្រើនពីគម្រោងអនុញ្ញាតឱ្យបង្កើតកាស៊ីណូ

បើតាមសេចក្តីថ្លែងការណ៍បង្ហោះលើគេហទំព័ររបស់គណបក្សភឿថៃ កាលពីថ្ងៃសៅរ៍កន្លងមកនេះ បានឱ្យដឹងថា ការធ្វើឱ្យស្របច្បាប់នូវសកម្មភាពល្បែងស៊ីសងក្រោមដី និងការយកពន្ធលើគម្រោងបង្កើតល្បែងកាស៊ីណូអាចមានតម្លៃជាង៥០% នៃផលិតផលក្នុងស្រុកសរុប ដែលនឹងជួយជំរុញសេដ្ឋកិច្ច និងចំណាយលើការអភិវឌ្ឍវិស័យអប់រំ និងគម្រោងផ្សេងៗទៀត។

គណបក្សកាន់អំណាចបានបន្ថែមថា អគារកម្សាន្តកាស៊ីណូ នឹងអាចជួយឱ្យសេដ្ឋកិច្ចថៃ មានតម្លៃប្រមាណ១៣.៧ទ្រីលានដុល្លារអាម៉េរិក ហើយគម្រោងនេះ គឺជាផ្នែកមួយនៃសេចក្តីថ្លែងការណ៍អំពីគោលនយោបាយរបស់រដ្ឋាភិបាលដឹកនាំដោយគណបក្សភឿថៃ របស់លោកស្រី ផែថងថាន ស៊ីណាវ៉ាត្រា នៅក្នុងសភាកាលពីថ្ងៃទី១២ ខែកញ្ញា។

សេចក្តីថ្លែងការណ៍នេះ បាននិយាយថា ក្នុងរយៈពេល២០ឆ្នាំកន្លងមកនេះ រដ្ឋាភិបាលថៃ បានប្រឹងប្រែងដើម្បីធ្វើឱ្យស្របច្បាប់នូវប្រតិបត្តិការសេដ្ឋកិច្ចដែលគេចាត់ទុកថា ខុសច្បាប់ទាំងនោះ ប៉ុន្តែពួកគេបានបរាជ័យដោយសារតែមនុស្សជាច្រើននៅក្នុងសង្គមមិនបើកចំហចំពោះគំនិតបែបនេះ។ ទោះជាយ៉ាងណាក្នុងរយៈពេលប៉ុន្មានឆ្នាំចុងក្រោយនេះ រដ្ឋាភិបាលអតីតកាល និងបច្ចុប្បន្នបានសិក្សាពីលទ្ធភាពនេះ។

ដោយលើកឡើងអំពីរបាយការណ៍របស់គណៈកម្មាធិការសភាអំពីគម្រោងនៃការបង្កើតកន្លែងកម្សាន្តកាស៊ីណូនេះ គណបក្សភឿថៃ បាននិយាយថា សេដ្ឋកិច្ចសប្បាយរីករាយដែលគ្របដណ្តប់លើវិស័យ​ទេសចរណ៍ កីឡា ការកម្សាន្តក៏ដូចជាកម្មវិធីកម្សាន្តផ្សេងទៀតនេះ កំពុងមានការរីកចម្រើនជាលំដាប់៕

អត្ថបទ៖ សុខ មង្គល