ធនាគារកណ្តាលរបស់ប្រទេសថៃ បាននិយាយកាលពីថ្ងៃ៣ ខែតុលាថា ខ្លួនកំពុងឃ្លាំមើលយ៉ាងដិតដល់នូវចលនានៃរូបិយបណ្ណជាប្រាក់បាត ដែលការធ្លាក់ចុះត្រូវបានធនាគារកណ្ដាលថៃ គូបញ្ជាក់ថា បណ្ដាលមកពីលទ្ធផលនៃកត្តាខាងក្រៅ និងស្របតាមនិន្នាការនៃសេដ្ឋកិច្ចប្រទេសជាដៃគូក្នុងតំបន់។
ប្រភពដដែលបានអះអាងថា ប្រាក់បាតបានធ្លាក់ចុះដល់កម្រិតទាបបំផុតនៅក្នុងរយៈពេល ១១ ខែ ពោលគឺធ្លាក់ដល់ ៣៧,០៩៥បាត ទើបប្ដូរបានមួយដុល្លារអាមេរិក កាលពីព្រឹកថ្ងៃទី៣ ខែតុលា។ ពាក់ព័ន្ធនឹងការធ្លាក់ចុះនេះ ត្រូវបានធនាគារកណ្តាលថៃ អះអាងថា ខ្លួនបានត្រៀមខ្លួនរួចជាស្រេចក្នុងការគ្រប់គ្រងប្រាក់បាត ប្រសិនបើមានចលនាមិនទៀងទាត់កើតឡើង ដោយបន្ថែមថា វិនិយោគិនកំពុងរង់ចាំភាពច្បាស់លាស់អំពីគោលនយោបាយសារពើពន្ធរបស់រដ្ឋាភិបាលថ្មី។
លោក សាកាផាប ប៉ានីយ៉ានុគល ( Sakkapop Panyanukul) មន្រ្តីជាន់ខ្ពស់របស់ធនាគារ កណ្តាលថៃបាននិយាយថា ការឡើងថ្លៃនៃប្រាក់ដុល្លារ ក្រោយពេលដែលធនាគារកណ្តាលអាមេរិក ចាត់វិធានការដើម្បីរក្សាស្ថិរភាពនៃអត្រាការប្រាក់នៅអាមេរិក កំពុងតែជះឥទ្ធិពលដល់ស្ថានការណ៍នេះ ។
លោកបានបន្ថែមថា ក្រៅពីការកើនឡើងនូវតម្លៃនៃប្រាក់ដុល្លារ ការធ្លាក់ចុះនៃប្រាក់បាតថៃនេះ ក៏អាច បណ្តាលមកពីកត្តាផ្សេងទៀតរួមមាន សម្ពាធពីការធ្លាក់ចុះតម្លៃមាស និងការកើនឡើងតម្លៃប្រេងនៅលើពិភពលោក។
អត្ថបទគួរអាន
ទោះយ៉ាងណា លោក ស្រ៊ីថា ថាវេស៊ីន នាយករដ្ឋមន្រ្តីថៃ នៅថ្ងៃដដែលនេះ នៅតែបានអះអាង ជាថ្មីទៀតថា ការធ្លាក់ចុះនៃប្រាក់បាតថៃនេះ គឺមិនអាក្រក់ទាំងអស់ឡើយ ផ្ទុយទៅវិញវានឹងជួយ ដល់ការនាំចេញ និងសម្រាលបបន្ទុករបស់ភ្ញៀវទេសចរ ខណៈដែលប្រទេសនេះ កំពុងតែឃោសនា និងជំរុញការ បើកចំហរដើម្បីទទួលភ្ញៀវទេសចរ។
បន្ទាប់ពីធនាគារកណ្តាលថៃ លើកឡើងពីការធ្លាក់ចុះនៃលុយបាតនេះ ខាងធនាគារពិភពលោកឯណោះ បានរាយការណ៍ថា កំណើនសេដ្ឋកិច្ចថៃ សម្រាប់ឆ្នាំ២០២៣ នេះ មកនៅត្រឹមតែ ៣,៤% ពោលគឺទាបជាង ០,២% ធៀបនឹងការព្យាករកាលពីមុន។
ទោះយ៉ាងណា ធនាគារពិភពលោកក៏បានអះអាងផងដែរថា សម្រាប់ឆ្នាំ២០២៤ ខាងមុខនេះ កំណើនសេដ្ឋកិច្ចថៃ នឹងមានដល់ ៣,៥% ។
ស្ថាប័នធនាគារមួយនេះបានអះអាងថា ការនាំចេញទំនិញរបស់ប្រទេសថៃ ត្រូវបានគេរំពឹងថា នឹងធ្លាក់ចុះ ២,១នៅឆ្នាំ ២០២៣ គិតជាប្រាក់ដុល្លារអាមេរិក ដោយសារតម្រូវការកាត់បន្ថយពីប្រទេសដែលមានសេដ្ឋកិច្ចជឿនលឿនធំៗនានា។
ជាមួយគ្នានេះ បំណុលសាធារណៈរបស់ថៃ នឹងឡើងដល់ កម្រិត ៦០,២% នៃអត្រាផលិតផលនៅក្នុងស្រុកសរុប ប៉ុន្តែវាអាចនឹងធ្លាក់ចុះមកនៅត្រឹម ៥៩,៦% នៅឆ្នាំ២០២៤ និង មកនៅ៥៩,៥% នៅឆ្នាំ២០២៥ ៕
ដោយៈ សរ សុជាតិ
None
