នៅទីបំផុតតុលាការធម្មនុញ្ញថៃ បានសម្រេចដកលោក ស៊្រីថា ថាវិស៊ីន ចេញពីតំណែងនាយករដ្ឋមន្ត្រីចំពោះការបំពានរដ្ឋធម្មនុញ្ញដោយសារលោកបានផ្ដល់តំណែងរដ្ឋមន្ត្រីដល់អតីតមេធាវីដែលធ្លាប់ជាប់ពន្ធនាគារ។
ចៅក្រមចំនួនប្រាំក្នុងចំណោមប្រាំបួនរូបរបស់តុលាការនេះ បានបោះឆ្នោតបណ្ដេញលោក ស៊្រីថា និងរំលាយគណៈរដ្ឋមន្ត្រីរបស់លោកជាមួយសំឡេងគាំទ្រ៥ទល់នឹង៤។
ការសម្រេចបែបនេះ ធ្វើឡើងក្រោយតុលាការនេះកាលពីខែឧសភា បានទទួលយកញត្តិរបស់សមាជិកព្រឹទ្ធសភាចំនួន៤០រូប ដែលចង់ឱ្យដកលោក ស៊្រីថា ចេញពីតំណែងនាយករដ្ឋមន្ត្រី ដោយពួកគេបានអះអាងថា ការដែលលោក ស៊្រីថា តែងតាំងលោក Pichit Chuenban ឱ្យធ្វើជារដ្ឋមន្ត្រីកាលពីខែមេសា នោះ គឺមិនស្របតាមរដ្ឋធម្មនុញ្ញនោះទេ ដោយសារលោក Pichit ត្រូវបានកាត់ទោសឱ្យជាប់ពន្ធនាគាររយៈពេលប្រាំមួយខែជុំវិញសំណុំរឿងសូកប៉ាន់។
ការសម្រេចដកតំណែងលោក ស៊្រីថា នេះទំនងជាអាចធ្វើឱ្យនយោបាយនៅប្រទេសថៃធ្លាក់ចូលភាពចលាចល និងធ្វើឱ្យ លោក ក្លាយជានាយករដ្ឋមន្ត្រីថៃលើកទី៤ក្នុងរយៈពេល១៦ឆ្នាំ ដែលត្រូវបានតុលាការនេះដកចេញពីតំណែង។ ការដកតំណែងលោក ស៊្រីថា នេះធ្វើឡើងបន្ទាប់ពីលោកបានឡើងកាន់អំណាចបានប្រមាណ១ឆ្នាំ ហើយការណ៍នេះ ក៏នឹងតម្រូវឱ្យសភាត្រូវកោះប្រជុំ ដើម្បីជ្រើសរើសនាយករដ្ឋមន្ត្រីចាំផ្ទះដើម្បីដឹកនាំប្រទេសបណ្តោះអាសន្នផងដែរ។ កាលពីសប្ដាហ៍មុន តុលាការនេះ ក៏បានសម្រេចរំលាយគណបក្សឆ្ពោះទៅមុខដែលជាបក្សជំទាស់ដ៏ធំបំផុតនៅក្នុងប្រទេសថៃផងដែរ៕
