តើអ្នកជំនាញសេដ្ឋកិច្ចមានការយល់ឃើញយ៉ាងណាខ្លះ ជុំវិញការធ្លាក់ចុះការនាំចូលទំនិញពីប្រទេសថៃ? ហើយអ្នកផលិតក្នុងស្រុកត្រូវត្រៀមខ្លួនអ្វីខ្លះ ដើម្បីបំពេញតម្រូវការទីផ្សារក្នុងស្រុក?
តាមរបាយការណ៍របស់ក្រសួងពាណិជ្ជកម្ម បានបង្ហាញថា នៅក្នុងខែកក្កដា ឆ្នាំ២០២៥នេះ ជាអំឡុងពេល ដែលថៃ បើកការវាយប្រហារឈ្លានពានមកលើកម្ពុជា ការនាំចូលទំនិញពីថៃ មកកាន់ទីផ្សារកម្ពុជា មានទំហំទឹកប្រាក់ប្រមាណ ១៦៦លានដុល្លារ ធ្លាក់ចុះជាង ៤៤% ធៀបនឹងខែកក្កដា ឆ្នាំ២០២៤ ដែលមានទំហំដល់ប្រមាណ ២៩៧លានដុល្លារ។
លោកបណ្ឌិត ហុង វណ្ណៈ អ្នកស្រាវជ្រាវសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានគូសបញ្ជាក់ថា ការធ្លាក់ចុះការនាំចូលទំនិញថៃ មកកាន់ទីផ្សារកម្ពុជានេះ គឺដោយសារពលរដ្ឋខ្មែរ ជាច្រើនបានធ្វើចលនាពហិការឈប់ប្រើប្រាស់ផលិតផលថៃ ដើម្បីបង្ហាញពីស្មារតីជាតិនិយម និងដើម្បីឆ្លើយតបនឹងសកម្មភាពរំលោភបំពានយ៉ាងកម្រោលរបស់ទាហានថៃ មកលើដែនអធិបតេយ្យភាពកម្ពុជា។ អ្នកជំនាញរូបនេះ ជឿជាក់ថា ក្រោយមានបញ្ហាជម្លោះព្រំដែនលើកនេះ ការនាំចូលទំនិញពីថៃ ចូលមកកម្ពុជា គឺនឹងបន្តធ្លាក់ចុះក្នុងរយៈពេលវែងបន្ថែមទៀត ដ្បិតថា ប្រជាជនកម្ពុជា ចាប់ផ្តើមងាកមកគាំទ្រផលិតផលនៅក្នុងស្រុកច្រើនជាងមុន និងជំនួសដោយការប្រើប្រាស់ផលិតផលពីប្រទេសដទៃ។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព យល់ឃើញថា ក្រោយពលរដ្ឋកម្ពុជា បង្ហាញទំនោរឈប់ប្រើប្រាស់ផលិតផលរបស់ប្រទេសជិតខាង និងងាកមកគាំទ្រផលិតផលនៅក្នុងស្រុកវិញ អ្នកផលិតនៅក្នុងស្រុកគួរតែពង្រឹងការផលិតផលិតផលរបស់ខ្លួនឱ្យបានល្អពិសេសលើគុណភាព និងសុវត្ថិភាព។ បើមិនដូច្នេះទេ អ្នកប្រើប្រាស់គឺនឹងឈប់បន្តគាំទ្រដូចទៅនឹងផលិតផលនាំចូលនានាដែរ។ សម្រាប់អ្នកជំនាញរូបនេះ ការធ្លាក់ចុះការនាំចូលទំនិញពីប្រទេសជិតខាងនេះ គឺបានបង្ហាញពីឱកាសរបស់សហគ្រាសផលិតក្នុងស្រុកក្នុងការពង្រីកទីផ្សាររបស់ខ្លួន ប៉ុន្តែទាមទារឱ្យមានការជួយជ្រោមជ្រែងពីស្ថានប័នពាក់ព័ន្ធបន្ថែម ដើម្បីឱ្យដំណើរការអាជីវកម្មក្នុងស្រុកមានស្ថិរភាពល្អ។
បើគិតក្នុងរយៈពេល៧ខែ ឆ្នាំ២០២៥នេះ ការដោះដូរពាណិជ្ជកម្មទ្វេភាគីរវាងកម្ពុជា និងថៃ មានទំហំប្រមាណ ២ពាន់៤រយលានដុល្លារ ធ្លាក់ចុះ ០,៦% បើធៀបនឹងរយៈពេលដូចគ្នាកាលពីឆ្នាំមុន ក្នុងនោះ កម្ពុជានាំចេញទៅថៃ មានទំហំប្រមាណ ៤៨៨លានដុល្លារ ខណៈថៃ នាំចូលមកកម្ពុជាវិញមានទំហំជាង ១ពាន់៩រយលានដុល្លារ៕
អត្ថបទ សោម ស្រីពេជ្រ
