គេនៅចាំថា លោកប្រាយុទ្ធ បានដាក់បទបញ្ញាត្តិមួយកាលពីថ្ងៃទី ២៩ ខែកក្កដា ដើម្បីហាមឃាត់រាល់ការផ្សាយព័ត៌មាន ឬ មាតិកាទាំងឡាយណា ដែលអាចបំភិតបំភ័យដល់សាធារណជន ឬ ក៏បំភាន់ព័ត៌មាន ដោយលោកប្រាយុទ្ធចាត់ទុកការផ្សាយព័ត៌មានទាំងនេះ គឺជាដើមចមមួយធ្វើឲ្យមានការយល់ច្រឡំកើតឡើង ក្នុងគ្រាអាសន្ន និង ប៉ះពាល់ដល់សន្ដិសុខជាតិ សន្ដិភាព និង សណ្ដាប់ធ្នាប់។
ការដកបម្រាមហាមឃាត់ការផ្សាយព័ត៌មានទាក់ទងស្ថានភាពកូវីដ-១៩នាពេលនេះ ត្រូវបានគេមើលឃើញថា គឺធ្វើឡើងនៅចំពេលដែលប្រទេសថៃ កំពុងផុងខ្លួនកាន់តែជ្រៅទៅៗក្នុងវិបត្តិកូវីដ-១៩ ខណៈដែលចំនួនអ្នកឆ្លងប្រចាំថ្ងៃនៅមួយរយៈចុងក្រោយនេះ គិតជាមធ្យមប្រមាណជិត ២ម៉ឺននាក់ និងមានអ្នកស្លាប់រាប់រយនាក់ក្នុងមួយថ្ងៃ។
បទបញ្ជារបស់នាយករដ្ឋមន្ត្រីថៃ ដែលបានដាក់ចេញទាក់ទងនឹងរឹតត្បិតការផ្សព្វផ្សាយអំពីស្ថានភាពកូវីដ-១៩នៅក្នុងប្រទេសថៃ នាពេលកន្លងមកនេះ ក៏ធ្លាប់រងការរិះគន់យ៉ាងចាស់ដៃ ពីសំណាក់សកម្មជនសិទ្ធិមនុស្ស និង អ្នកសារព័ត៌មាននៅក្នុងប្រទេសថៃ ផងដែរ។
អត្ថបទគួរអាន
ជាក់ស្ដែង នៅថ្ងៃទី ០២ ខែសីហា ក្រុមតំណាងស្ថាប័នសារព័ត៌មាន និង មេធាវីសិទ្ធិមនុស្ស បានដាក់ញត្តិទៅកាន់តុលាការស៊ីវិល ប្រឆាំងនឹងបទបញ្ញត្តិរបស់នាយករដ្ឋមន្ត្រីថៃ ដើម្បីធ្វើយ៉ាងណាឲ្យលោកប្រាយុទ្ធ ដកបម្រាមនេះចោលវិញ។ នៅទីបំផុត នៅថ្ងៃទី ៩ ខែសីហា តុលាការស៊ីវិលរបស់ថៃ បានសម្រេចឲ្យដកបម្រាមនេះចេញ ក្រោយមើលឃើញថា បទបញ្ជាហាមឃាត់របស់លោកប្រាយុទ្ធនេះ គឺបានធ្វើឲ្យមានការបាត់បង់នូវសិទ្ធិ និងសេរីភាពរបស់ប្រជាជន។ តុលាការក៏បានសម្រេចផងដែរថា ការអនុញ្ញាតឲ្យមានការផ្អាកសេវាអ៊ីនធើណែតចំពោះ ក្រុមហ៊ុនស្ថាប័នសារព័ត៌មាន គឺជាការផ្ទុយទៅនឹងច្បាប់។ ជាមួយគ្នានេះដែរ តុលាការស៊ីវិលថៃ បានចាត់ទុកថា ការទទួលបានសេវាអ៊ីនធើណែតប្រើប្រាស់ គឺមានសារសំខាន់ណាស់នៅក្នុងអំឡុងពេលកូវីដ-១៩រាតត្បាតនេះ៕
None
