ថៃ ទទួលបានភ្ញៀវទេសចរបរទេសជាង២០លាននាក់ នៅជាង៧ខែកន្លងមកនេះ

អាជ្ញាធរទេសចរណ៍ថៃ (TAT) បានឱ្យដឹងថា ប្រទេសថៃ ទទួលបានភ្ញៀវទេសចរបរទេសរហូដល់ទៅជិត២២លាននាក់ ក្នុងរយៈពេលជាង៧ខែ ដើមឆ្នាំ២០២៤ ហើយក្នុងនោះភ្ញៀវទេសចរចិន និងភ្ញៀវទេសចរម៉ាឡេស៊ី មានចំនួនច្រើនជាងគេ។ ក្នុងនោះភ្ញៀវទេសចរចិន មានចំនួនច្រើនជាងគេរហូតដល់ទៅជាង៤លាននាក់ បន្ទាប់មកម៉ាឡេស៊ី មាន​ចំនួន៣លាននាក់ ខណៈឥណ្ឌា កូរ៉េខាងត្បូង និងរុស្ស៊ី មានជាង១លាននាក់ ដោយទទួលបានចំណូលពីវិស័យទេសចរណ៍សរុបចំនួនជិត៣០ពាន់លានដុល្លារអាម៉េរិក។

ជាមួយគ្នានេះ ប្រទេសថៃ ដាក់គោលដៅទាក់ទាញភ្ញៀវទេសចរបរទេសឱ្យបានជាង៣៦លាននាក់នៅត្រឹមដំណាច់ឆ្នាំ២០២៤ នេះ។ ចាប់ពីថ្ងៃទី២២ ខែកក្កដា ប្រទេសថៃ បានបន្តកម្មវិធីស្នាក់នៅដោយគ្មានទិដ្ឋាការរយៈពេល៦០ថ្ងៃ ដល់ពលរដ្ឋមកពី៩៣ប្រទេស និងដែនដី ដោយកើនឡើងពី៥៧ប្រទេស និងដែនដីសម្រាប់គោលបំណងទេសចរណ៍ ឬអាជីវកម្មរយៈពេលខ្លី។

គួររំឭកថា កាលពីអំឡុងឆ្នាំ២០១៩ នៅមុនពេលផ្ទុះវិបត្តិកូវីដ-១៩ ប្រទេសថៃ ដែលសេដ្ឋកិច្ចពឹងផ្អែកខ្លាំងលើវិស័យទេសចរណ៍ ទទួលបានភ្ញៀវទេសចរបរទេសរហូតដល់ទៅជិត៤០លាននាក់ និងទទួលបានចំណូលរហូតដល់ទៅជិត៥២ពាន់លានដុល្លារអាម៉េរិក៕

ដោយ: តែម សុខុម