ទោះបីភ្ញៀវទេសចរមកកម្សាន្តនៅប្រទេសថៃ មានការធ្លាក់ចុះជិត១%ក្តី តែប្រទេសក្បែរខាងកម្ពុជា មួយនេះ នៅតែគ្រងតំណែងជាអធិរាជក្នុងវិស័យទេសចរណ៍នៅក្នុងតំបន់អាស៊ាន ក្រោយប្រទេសនេះទាក់ទាញភ្ញៀវទេសចរបរទេសបានជាង១២លាននាក់ នៅ៤ខែឆ្នាំនេះ ដែលជាចំនួនមួយច្រើនជាងបណ្តាប្រទេសផ្សេងៗ។ ប្រទេសចិន នៅតែជាទីផ្សារទេសចរធំបំផុតរបស់ថៃ ដោយមានជនជាតិចិន រហូតដល់ជាង១,៦លាននាក់ បានមកកម្សាន្តនៅប្រទេសនេះ តាមពីក្រោយដោយភ្ញៀវទេសចរម៉ាឡេស៊ី មានជាង១,៥លាននាក់ បន្ទាប់មករុស្ស៊ី ឥណ្ឌា កូរ៉េខាងត្បូង ចក្រភពអង់គ្លេស អាល្លឺម៉ង់ អាម៉េរិក បារាំង និងជប៉ុន ជាដើម។
ជាមួយគ្នានេះ ប្រទេសវៀតណាម ដែលជាអ្នកក្បែរខាងកម្ពុជា ដែរនោះ ទាក់ទាញភ្ញៀវទេសចរបរទេសបានជិត៨លាននាក់ នៅក្នុងរយៈពេលដូចគ្នានេះ កើនឡើងប្រមាណជិត២៤% ក្នុងនោះភ្ញៀវទេសចរចិន មានច្រើនជាងគេរហូតដល់ជិត២លាននាក់ ដោយវ៉ាដាច់ប្រទេសថៃ ទៅទៀត។ ចំណែកភ្ញៀវទេសចរកូរ៉េ ឈរលំដាប់ទីពីរ ជាមួយបរិមាណជាង១,៥លាននាក់ ដែលតាមពីក្រោយដោយចិន តៃវ៉ាន់ សហរដ្ឋអាម៉េរិក ជប៉ុន កម្ពុជា អូស្ត្រាលី ឥណ្ឌា ម៉ាឡេស៊ី និងថៃ។
ដោយឡែក បើយើងក្រឡេកទៅមើលប្រទេសក្បែរខាងកម្ពុជា មួយទៀត គឺប្រទេសឡាវ នៅត្រីមាសទី១ ដើមឆ្នាំនេះ ប្រទេសនេះ ទាក់ទាញភ្ញៀវទេសចរបរទេសបានជាង១,១លាននាក់ មានការកើនឡើងរហូតដល់១៦២% ឯណោះ បើធៀបនឹងរយៈពេលដូចគ្នាកាលពីឆ្នាំមុន៕
ដោយៈ សរ សុជាតិ
