ប្រមុខការទូតថៃ អះអាងថា ថៃ មិនបដិសេធការជួយរបស់បរទេសក្នុងការបញ្ចប់សង្គ្រាមនោះទេ តែត្រូវមានអព្យាក្រឹត
រដ្ឋមន្ត្រីការបរទេសថៃ លោក ស៊ីហាសាក់ ភួងកេតកែវ បានអះអាងថា ថៃ មិនបដិសេធការជួយសម្របសម្រួលពីបរទេសក្នុងការបញ្ចប់ជម្លោះព្រំដែនជាមួយកម្ពុជា ន…
ស្របពេលកិច្ចប្រជុំពិសេសរដ្ឋមន្ត្រីការបរទេសអាស៊ាន ស្តីពី ជម្លោះព្រំដែនកម្ពុជា-ថៃ ដែលប្រទេសម៉ាឡេស៊ី ធ្វើជាម្ចាស់ផ្ទះនឹងចូលមកដល់នៅថ្ងៃទី២២ ខែធ្នូ ឆ្នាំ២០២៥ ប្រទេសថៃ នៅតែប្រកាន់យកលក្ខខណ្ឌចំនួន៣ ដែលខ្លួនបានដាក់ចេញកាលពីថ្មីៗក្នុងការចរចាបទឈប់បាញ់ជាមួយកម្ពុជា។ លក្ខខណ្ឌទាំងនោះរួមមានប្រទេសកម្ពុជា ត្រូវតែប្រកាសឈប់បាញ់មុន, បទឈប់បាញ់ត្រូវតែស៊ើបអង្កេតជាក់ស្ដែង និងជាបន្តបន្ទាប់ និងប្រទេសកម្ពុជា ត្រូវតែបង្ហាញកិច្ចសហប្រតិបត្តិការដោយស្មោះត្រង់ក្នុងប្រតិបត្តិការដោះមីនរួមគ្នា។
អ្នកជំនាញ និងអ្នកតាមដានស្ថានការណ៍សង្គមនៅកម្ពុជា បានចាត់ទុកលក្ខខណ្ឌទាំង៣របស់ថៃ ជាលក្ខខណ្ឌមិនអាចទទួលយកបាននោះទេ ព្រោះកម្ពុជា ជាជនរងគ្រោះ ហើយថៃ ខ្លួនឯងទេ ដែលជាអ្នកឈ្លានពានមកលើកម្ពុជា។ សម្រាប់អ្នកជំនាញលក្ខខណ្ឌទាំងនេះ គួរតែថៃ ជាអ្នកអនុវត្តខ្លួនឯង។
គួរបញ្ជាក់ថា នាយករដ្ឋមន្ត្រីម៉ាឡេស៊ីលោក អាន់វ៉ា អ៊ីប្រាហ៊ីម ប្រធានអាស៊ានឆ្នាំ២០២៥ បានឯកភាពតាមសំណើរបស់ប្រទេសថៃ ដែលបានស្នើសុំពន្យារពេលកិច្ចប្រជុំរដ្ឋមន្ត្រីការបរទេសអាស៊ានពីថ្ងៃទី១៦ ខែធ្នូ ទៅថ្ងៃទី២២ ខែធ្នូ។ បើតាមប្រភពយោធាបានឱ្យដឹងថា មូលហេតុនៃការសុំពន្យារពេលកិច្ចប្រជុំនេះ គឺដោយសារប្រទេសថៃកំពុងស្វែងរកការបញ្ចប់ប្រតិបត្តិការសន្តិសុខ និងបង្កើតជំហររឹងមាំនៅព្រំដែន៕
ដោយ៖ សុខ មង្គល
