ពាណិជ្ជករ អាជីវករថៃ នៅក្នុងខេត្តចំនួន៧ កំពុងរងទុក្ខ ក្រោយយោធាថៃ បិទច្រកព្រំដែនជាមួយកម្ពុជា
ការដោះដូរពាណិជ្ជកម្មឆ្លងដែនទ្វេភាគីកម្ពុជា-ថៃ ដែលមួយថ្ងៃមានទំហំប្រមាណ១៥លានដុល្លារ បានចាប់ផ្តើមរអាក់រអួលក្រោយយោធាថៃ បានបិទច្រកព្រំដែនជាឯក…
ក្រោយមានការរិះគន់ពីការធ្លាក់ចុះសេដ្ឋកិច្ច គណៈរដ្ឋមន្ត្រីថៃ បានអនុម័តកញ្ចប់ថវិកាជំរុញសេដ្ឋកិច្ចដែលមានទំហំរហូតដល់ប្រមាណ៤,៦ពាន់លានដុល្លារ ហើយតាមផែនការកញ្ចប់ថវិកានេះរដ្ឋាភិបាលថៃ នឹងប្រើប្រាស់សម្រាប់អភិវឌ្ឍន៍ហេដ្ឋារចនាសម្ព័ន្ធ និងលើកកម្ពស់វិស័យ ទេសចរណ៍ ដើម្បីការពារសេដ្ឋកិច្ចពីភាពមិនប្រាកដប្រជាជាសកល។ បន្ថែមលើនេះ ថៃមានផែនការប្រើកញ្ចប់ថវិកានេះ បង្កើតការងារធ្វើដល់ពលរដ្ឋឲ្យបានប្រមាណជា៧,៤លានកន្លែង។
មកទល់ពេលនេះវិស័យទេសចរណ៍ ដែលជាជន្ទល់ដ៏សំខាន់មួយក្នុងការជួយគាំទ្រកំណើនសេដ្ឋកិច្ចរបស់ថៃ កំពុងដាំក្បាលចុះ ស្របពេលស្ថានភាពសេដ្ឋកិច្ចពិភពលោកកំពុងរងការគំរាមកំហែងពីវិបត្តិសង្រ្គាមផ្លូវអាកាសរវាងអ៊ីស្រាអែល និងអ៊ីរ៉ង់ ដែលវិបត្តិនេះអាចទាញទម្លាក់ចំនួនភ្ញៀវទេសចរបរទេសពីតំបន់មជ្ឈិមបូព៌ាមកកម្សាន្តនៅប្រទេសថៃ ឱ្យមានការធ្លាក់ចុះ។ នៅក្នុងរយៈពេល៥ខែដើមឆ្នាំ២០២៥ ថៃទាក់ទាញភ្ញៀវទេសចរបរទេសបានត្រឹម១៤,៣លាននាក់ប៉ុណ្ណោះ មានការធ្លាក់ចុះប្រមាណជិត៣% បើធៀបនឹងរយៈពេលដូចគ្នាកាលពីឆ្នាំមុន ។
ក្រៅពីវិស័យទេសចរណ៍ វិស័យពាណិជ្ជកម្មរបស់ប្រទេសដែលមានសេដ្ឋកិច្ចធំបំផុតលំដាប់ទីពីរនៅអាស៊ាននេះ ក៏បានបង្ហាញសញ្ញាមិនសូវល្អផងដែរ។ ជាក់ស្តែងការដោះដូរពាណិជ្ជកម្មរបស់ប្រទេសនេះជាមួយចិននៅក្នុងរយៈពេល៥ខែដើមឆ្នាំនេះ សម្រេចបានជិត៥៨ពាន់លានដុល្លារកើនឡើងជាង២៦% ប៉ុន្តែការនាំចេញរបស់ថៃ ទៅចិន សម្រេចបានត្រឹមជាង១៧ពាន់លានដុល្លារប៉ុណ្ណោះ ពោលគឺមានឱនភាពពាណិជ្ជកម្មរហូតដល់ជាង២៣ពាន់លានដុល្លារ។
បច្ចុប្បន្នស្ថានភាពពាណិជ្ជកម្មរបស់ប្រទេសថៃ នៅពិបាកប៉ាន់ស្មាននៅឡើយ ដោយសារការចរចាពន្ធបដិការជាមួយអាម៉េរិក នៅមិនទាន់មានពន្លឺ ស្របពេលមានការបិទការធ្វើពាណិជ្ជកម្មជាមួយកម្ពុជា ដោយសារការបិទព្រំដែនទាំងអស់ជាមួយកម្ពុជា ជាឯកតោភាគីពីសំណាក់យោធាថៃ៕
ដោយៈ សរ សុជាតិ
