អ្នកនាំពាក្យរដ្ឋាភិបាលថៃ បាននិយាយកាលពីថ្ងៃពុធថា ប្រទេសថៃនឹងទទួលបានគម្រោងវិនិយោគដែលមានតម្លៃសរុបប្រមាណ៣០០ពាន់លានបាត ឫប្រមាណជាជិត៨ពាន់៥រយលានដុល្លារ ពីក្រុមហ៊ុនធំៗបីរបស់អាម៉េរិក រួមមាន ក្រុមហ៊ុនសេវាកម្មអាម៉ាហ្សូន (Amazon Web Services), ហ្គូហ្គល(Google) និងក្រុមហ៊ុនម៉ាយក្រូសូហ្វ (Microsoft)។ លោក ឆៃ វ៉ាឆារ៉ុន ( Chai Wacharonke ) អ្នកនាំពាក្យរដ្ឋាភិបាលថៃ បាននិយាយថា ក្រុមហ៊ុនដែលមានមូលដ្ឋាននៅសហរដ្ឋអាម៉េរិកទាំងបីនេះ នឹងវិនិយោគនៅក្នុងមួយក្រុមហ៊ុនតម្លៃ១០០ពាន់លានបាត ឫប្រមាណជាជាង២ពាន់៨រយលានដុល្លារ។
បើតាមសេចក្តីរាយការណ៍ដាច់ដោយឡែកមួយរបស់រដ្ឋាភិបាលថៃ ក្រុមហ៊ុនសេវាកម្មអាម៉ាហ្សូន ក៏គ្រោងនឹងសាងសង់មជ្ឈមណ្ឌលទិន្នន័យមួយ ដែលមានទំហំវិនិយោគ៥ពាន់លានដុល្លារក្នុងរយៈពេល១៥ឆ្នាំផងដែរ។ លោក ឆៃ បាននិយាយថា នាយករដ្ឋមន្ត្រីថៃ មានទំនុកចិត្តថា ការវិនិយោគរបស់ក្រុមហ៊ុនសេវាកម្មអាម៉ាហ្សូន នឹងលើកកម្ពស់ការប្រកួតប្រជែងរបស់ប្រទេស" ហើយថា ការវិនិយោគដោយ ម៉ាយក្រូសូហ្វ និងហ្គូហ្គល ក៏កំពុងសិក្សាផែនការវិនិយោគសម្រាប់មជ្ឈមណ្ឌលទិន្នន័យធំនៅក្នុងប្រទេសថៃ ផងដែរ។
នៅពេលនេះលោក ស្រ៊ីថា ថាវេស៊ីន នាយករដ្ឋមន្រ្តីថៃ កំពុងតែស្ថិតនៅក្នុងទឹកដីអាម៉េរិក ដើម្បីចូលរួមកិច្ចប្រជុំកំពូល APEC រយៈពេលបីថ្ងៃនៅទីក្រុងសាន់ហ្វ្រាន់ស៊ីស្កូ។ បើតាមសេចក្តីរាយការណ៍របស់សារព័ត៌មាននៅក្នុងស្រុកថៃ នៅក្នុងដំណើរនៅអាម៉េរិកនៅពេលនេះ លោកនាយករដ្ឋមន្រ្តីថៃ កំពុងតែបង្ហាញពីចក្ខុវិស័យរបស់រដ្ឋាភិបាលរបស់លោក ក្នុងការជំរុញប្រទេសថៃឆ្ពោះទៅមុខ។
លោកបានជួប និងធ្វើការជាមួយនឹងក្រុមហ៊ុនអាម៉េរិកនានា ដោយគូសបញ្ជាក់ពីភាពបើកចំហរបស់ប្រទេសថៃ ចំពោះការវិនិយោគ។ នៅក្នុងដំណើរនេះ លោក បានជួបជាមួយនឹងតំណាងក្រុមហ៊ុនលក់រាយដ៏ធំអាម៉េរិក គឺក្រុមហ៊ុន Walmart ក្រុមហ៊ុន Western Digital ក្រុមហ៊ុន ហ្គូហ្គល និងក្រុមហ៊ុន Microsoft ជាដើម៕
ដោយៈ សរ សុជាតិ
