នាយករដ្ឋមន្ត្រីថៃ លោកស្រី ផែថងថាន បាននិយាយកាលពីថ្ងៃអង្គារថា រដ្ឋាភិបាលថៃ នឹងបង្កើតគណៈកម្មការបច្ចេកទេសរួមមួយ (JTC) ដើម្បីដោះស្រាយបញ្ហាមួយចំនួននៅតំបន់ដែនសមុទ្រត្រួតស៊ីគ្នាជាមួយនឹងប្រទេសកម្ពុជា។ លោកស្រីនឹងបញ្ជូនផែនការនេះទៅគណៈរដ្ឋមន្ត្រីរបស់លោកស្រីនៅពីរសប្ដាហ៍ខាងមុខនេះ។
លោកស្រី ផែថងថាន បាននិយាយថា គណៈកម្មការ JTC នឹងបន្តកិច្ចពិភាក្សាជាមួយនឹងកម្ពុជា ជុំវិញតំបន់ទាមទារសំណងត្រួតស៊ីគ្នា (OCA) នៅឈូងសមុទ្រថៃ ដោយផ្អែកលើអនុស្សរណៈនៃការយោគយល់គ្នាឆ្នាំ២០០១ ខណៈដែលរដ្ឋាភិបាលថៃ មុនៗមិនទទួលបានជោគជ័យក្នុងការបង្កើតគណៈកម្មការ JTC ដើម្បីដោះស្រាយការខ្វែងគំនិតគ្នានេះទេ។
បើយោងតាមប្រភពពីមន្ត្រីរដ្ឋាភិបាលថៃ រដ្ឋមន្ត្រីការពារជាតិថៃ លោក ភុមថាម វេឆាយ៉ាឆៃ (Phumtham Wechayachai) នឹងដឹកនាំគណៈកម្មការ JTC ខណៈដែលលោកមានតួនាទីជាឧបនាយករដ្ឋមន្ត្រីទទួលបន្ទុកសន្តិសុខជាតិ។
លោក ភុមថាម ក៏បាននិយាយដែរថា ក្រសួងការបរទេស ក្រុមប្រឹក្សាសន្តិសុខជាតិ និងស្ថាប័នពាក់ព័ន្ធសុទ្ធតែបានបញ្ជាក់ថា អនុស្សរណៈយោគយល់គ្នាឆ្នាំ២០០១នេះ គឺជាយន្តការដ៏ល្អបំផុតសម្រាប់ដោះស្រាយជម្លោះ។ ប្រទេសថៃ និងកម្ពុជា បានទាមទារដែនអធិបតេយ្យនៅតំបន់ត្រួតស៊ីគ្នាដែលគ្របដណ្ដប់លើដែនទឹកទំហំ២ម៉ឺន៧ពាន់គីឡូម៉ែត្រការ៉េនៅឈូងសមុទ្រថៃ៕
អត្ថបទ៖ សុខ មង្គល
