ការព្រមានយ៉ាងគឃ្លើនវង្វេងប្រវត្តិសាស្ត្ររបស់អាជ្ញាធរថៃ គឺវាផ្ទុយស្រឡះពីការលើកឡើងរបស់ប្រជាពលរដ្ឋកម្ពុជា ដែលលំនៅឋានរបស់ពួកគាត់កំពុងតែរស់នៅមិនស្ថិតនៅក្នុងភូមិណងចាន់ (Nong Chan) ស្រុកខុកសង (Khok Sung) ខេត្តស្រះកែវ ដូចដែលថៃ អះអាងនោះទេ។ នេះបើយោងតាមការចុះផ្សាយរបស់សារព័ត៌មាន The Nation។
លោកឧត្តមសេនីយ៍ វ៉ាន់ឆាណា សាវេឌី (Wanchana Sawasdee) ប្រធានការិយាល័យសម្របសម្រួលបេសកកម្ម ដើម្បីសន្តិសុខជាតិ នៃកងទ័ពថៃ បានចេញមកព្រមានទុកពេលឱ្យពលរដ្ឋកម្ពុជា ចំនួនពីរខែក្នុងការរុះរើផ្ទះសម្បែង និងទ្រព្យសម្បត្តិចេញតំបន់មានជម្លោះ ដែលខ្លួនអះអាងថា ស្ថិតនៅភូមិណងចាន់របស់ថៃ បើមិនដូច្នោះទេ ខ្លួននឹងប្រើកងកម្លាំងអនុវត្តទៅតាមច្បាប់របស់ថៃ។
ការចេញមកព្រមានដោយគ្មានអ្វីមកសំអាងបែបនេះធ្វើឡើងក្រោយពលរដ្ឋកម្ពុជា បានរួបរួមសាមគ្គីគ្នាជាធ្លុងមួយទប់ស្កាត់កងកម្លាំងថៃ ដែលចុះមករាយលួសបន្លារំលោភលើដីស្រែចម្ការ និងលំនៅឋានរបស់ពួកគាត់ស្ថិតនៅក្នុងភូមិសាស្រ្តភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលទល់មុខភូមិសាស្ត្រភូមិណងចាន់របស់ថៃ។ មកទល់ពេលនេះកងកម្លាំងថៃ នៅតែវង្វេងវង្វាន់សូន្យសុងប្រវត្តិសាស្ត្រដោយខ្លួនបន្តអះអាងថា លំនៅឋាន និងភូមិស្រុកដែលប្រជាពលរដ្ឋកម្ពុជា កំពុងរស់នៅ គឺស្ថិតនៅលើទឹកដីថៃ។ កងកម្លាំងថៃ បានលើកឡើងថា លំនៅឋានរបស់ពលរដ្ឋចំនួន ១៨ខ្នង ដែលកំពុងរស់នៅនឹងអាស្រ័យផលផ្សេងៗ គឺជាដីរបស់ថៃ និងបានចោទប្រកាន់ថា ប្រជាពលរដ្ឋកម្ពុជា បានចូលមកទន្រ្ទានដោយខុសច្បាប់។
ការចេញមកប្រឆាំងតវ៉ារបស់ប្រជាពលរដ្ឋកម្ពុជា ចំពោះសកម្មភាពរាយលួសបន្លារំលោភលើភូមិ និងលំនៅឋានរបស់ពួកគាត់ កាលពីថ្ងៃទី២៥ ខែសីហា ឆ្នាំ២០២៥ គឺ ដើម្បីការពារលំនៅឋាន និងទ្រព្យសម្បត្តិស្របច្បាប់របស់ពួកគាត់តែប៉ុណ្ណោះ ក៏ប៉ុន្តែបែរជាថៃ ចោទកម្ពុជាថា បានប្រើប្រាស់កម្លាំងជនស៊ីវិលដើម្បីទប់ស្កាត់ការការពារបូរណភាពទឹកដីរបស់គេទៅវិញ។
ពាក់ព័ន្ធនឹងបញ្ហានេះ លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានស្នើឱ្យភាគីថៃ គោរពឱ្យបានពេញលេញ និងខ្ជាប់ខ្ជួននូវបទឈប់បាញ់ ជាពិសេសស្មារតីនៃកិច្ចព្រមព្រៀងនៃកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ (RBC) រវាងយោធភូមិភាគទី៥របស់កម្ពុជា និង កងទ័ពភូមិភាគទី១របស់ថៃ ពាក់ព័ន្ធនឹងការមិនពង្រីកភូមិសាស្ត្រនៃជម្លោះ និង ជៀសវាងទង្វើដែលនាំទៅរកការកើនឡើងនៃភាពតានតឹង។
លោកស្រីសុជាតា បានសង្កត់ធ្ងន់ថា កម្ពុជា បានប្រកាន់គោលជំហរយ៉ាងច្បាស់ថា រាល់ទំនាស់ពាក់ព័ន្ធនឹងបញ្ហាព្រំដែនត្រូវយកទៅដោះស្រាយដោយគណៈកម្មាធិការចម្រុះខណ្ឌសីមាព្រំដែនគោក (JBC) នៃប្រទេសទាំងពីរ ស្របតាមស្មារតី នៃអនុស្សរណៈនៃការយោគយល់ឆ្នាំ២០០០ (MOU 2000)៕
ដោយៈ សរ សុជាតិ
