លោក ថាក់ស៊ីន ស្នើឱ្យរដ្ឋាភិបាលថៃ រៀបចំឱ្យមានវិធានការលើកទឹកចិត្ត ដើម្បីជំរុញក្រុមហ៊ុនថៃ ឱ្យទៅបោះទុនវិនិយោគនៅអាម៉េរិក

លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃ កាលពីពេលថ្មីៗនេះបានផ្ដល់បទសម្ភាសជាលើកដំបូងដល់អ្នកយកព័ត៌មានរបស់ នីកេអេស៊ា ចាប់តាំងពីលោកបានវិលត្រឡប់ចូលស្រុកកំណើតវិញកាលពីខែសីហា ឆ្នាំ២០២៣។ នៅក្នុងបទសម្ភាសនោះ លោក ថាក់ស៊ីន បានចាត់ទុកជម្លោះភូមិសាស្ត្រនយោបាយសកល និងការកើនឡើងភាពតានតឹងពាណិជ្ជកម្មរវាងទីក្រុងវ៉ាស៊ីនតោន និងទីក្រុងប៉េកាំង នឹងក្លាយកម្លាំងចលករមួយក្នុងការជួយជំរុញការធ្វើពិពិធកម្មសេដ្ឋកិច្ចរបស់ថៃ។

ប៉ុន្តែលោក ថាក់ស៊ីន ក៏បានសម្តែងការព្រួយបារម្ភដែរថា ប្រសិនបើអតិរេកពាណិជ្ជកម្មរបស់ថៃ មានទំហំធំពេក វាក៏អាចក្លាយជាគោលដៅនៃការសងសឹករបស់អាម៉េរិក ជាពិសេសនៅពេលប្រធានាធិបតីជាប់ឆ្នោតអាម៉េរិក លោក ដូណាល់ ត្រាំ ឡើងកាន់អំណាច។

ការបង្ហាញក្តីព្រួយបារម្ភនេះ ក៏ដោយសារលោក ថាក់ស៊ីន ជឿជាក់ថា លោក ត្រាំ នឹងដំឡើងពន្ធលើទំនិញ ដែលនាំចូលទៅកាន់សហរដ្ឋអាម៉េរិក ដើម្បីធ្វើឱ្យប្រសើរឡើងនូវតុល្យភាពពាណិជ្ជកម្មរបស់មហាអំណាចសេដ្ឋកិច្ចផុតលេខមួយនេះ។ ដូច្នេះការវិលត្រឡប់មកគ្រប់គ្រងសេតវិមានជាថ្មីរបស់លោក ត្រាំ ចង់ ឬមិនចង់វានឹងធ្វើឱ្យប៉ះពាល់ដល់ប្រទេសថៃ។

ការណ៍នេះបានជំរុញឱ្យលោក ថាក់ស៊ីន ស្នើឱ្យរដ្ឋាភិបាលថៃ ក្រោមការដឹកនាំរបស់កូនស្រីខ្លួន គឺលោកស្រី ផែថងថាន ស៊ីណាវ៉ាត្រា ចាត់វិធានការមួយចំនួន ដើម្បីលើកទឹកចិត្តក្រុមហ៊ុនថៃ ឱ្យទៅបោះទុនវិនិយោគនៅសហអាម៉េរិក ដើម្បីកាត់បន្ថយសម្ពាធពីការដំឡើងពន្ធរបស់សហរដ្ឋអាម៉េរិក ក្រោមការដឹកនាំរបស់លោក ដូណាល់ ត្រាំ។

ការស្នើរបស់លោក ថាក់ស៊ីន នេះវាស្របពេលដែលក្រុមហ៊ុនឧស្សាហកម្មរបស់ថៃ កំពុងរងការគំរាមកំហែងពីការហូរចូលទំនិញមានតម្លៃថោកពីក្រៅប្រទេស ជាពិសេសប្រទេសចិន តែម្តង។ បញ្ហានេះបានជំរុញឱ្យក្រសួងពាណិជ្ជកម្មថៃ កំពុងរៀបចំផែនការ ដើម្បីដោះស្រាយការជោរជន់ផលិតផលមានតម្លៃថោកក្រោមស្ដង់ដារ ដែលនាំចូលមកពីបរទេសនេះ ព្រោះផលិតផលទាំងនេះបានធ្វើឱ្យប៉ះពាល់ដល់អ្នកប្រើប្រាស់ និងឧស្សាហកម្មធុនតូច និងមធ្យមក្នុងស្រុក។

អនុរដ្ឋមន្ត្រីក្រសួងពាណិជ្ជកម្មថៃលោក ណាពិនថន ស្រីស៊ុនប៉ាង (Napintorn Srisunpang) បាននិយាយថា អនុគណៈកម្មាធិការទទួលបន្ទុកគាំទ្រសហគ្រាសធុនតូច និងមធ្យមថៃបានបើកកិច្ចប្រជុំមួយកាលពីថ្ងៃព្រហស្បតិ៍ សប្ដាហ៍មុន ដោយមានការចូលរួមពីតំណាងទីភ្នាក់ងាររដ្ឋាភិបាលចំនួន២០ ដើម្បីពិភាក្សាអំពីវិធានការបង្ក្រាបទំនិញក្រោមស្តង់ដាទាំងនេះ៕

អត្ថបទ៖ សុខ មង្គល