លោក ថាក់ស៊ីន ប្រាប់ឱ្យថៃ ប្រុងជើងការលើការប្រែប្រួលពាណិជ្ជកម្មជាមួយអាម៉េរិក និងដាក់របាំងពាណិជ្ជកម្មដើម្បីទប់ការហូរចូលទំនិញចិន

អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត់ត្រា ដែលជាឥស្សរជនដ៏មានឥទ្ធិពលបំផុតមួយរូបក្នុងឆាកនយោបាយថៃ បានថ្លែងក្នុងពិធីជួបសំណេះសំណាល និងពិសាអាហារពេលល្ងាចជួបជុំជាមួយក្រុមអ្នកសារព័ត៌មានថៃថា សហរដ្ឋអាម៉េរិក ដែលជាសម្ព័ន្ធមិត្តដ៏ជិតស្និទ្ធបំផុតរបស់ប្រទេសថៃ នឹងផ្ដោតលើការកាត់បន្ថយឱនភាពពាណិជ្ជកម្មរបស់ខ្លួន ហើយរដ្ឋាភិបាលថៃគួរតែត្រៀមលក្ខណៈប្រុងជើងការខ្ពស់ ពីព្រោះប្រទេសថៃ មានអតិរេកពាណិជ្ជកម្មជាមួយសហរដ្ឋអាម៉េរិក។

នៅពេលដែលការហូរចូលយ៉ាងគំហុកនូវទំនិញថោកៗពីប្រទេសចិន តាមរយៈ Platform លក់ទំនិញតាមអនឡាញចិន ដូចថា ធើមូ (Temu) និងសប់ភី (Shopee) ជាដើមចាប់ផ្តើមធ្វើឱ្យពលរដ្ឋផ្ទុះកំហឹងមិនសប្បាយចិត្តជាខ្លាំងនោះ លោក ថាក់ស៊ីន បានអំពាវនាវឱ្យរដ្ឋាភិបាលថៃ ប្រើរបាំងពាណិជ្ជកម្មដើម្បីការពារឧស្សាហកម្មក្នុងស្រុក ពីការប្រកួតប្រជែងដោយមិនត្រឹមត្រូវ។

លោកបានបន្ថែមទៀតថា រដ្ឋាភិបាលថៃ ចាំបាច់ត្រូវអនុវត្តគោលនយោបាយគាំពារនិយមដើម្បីជួយឱ្យឧស្សាហកម្មក្នុងស្រុកអាចប្រកួតប្រជែងជាមួយឧស្សាហកម្មបរទេសបាន ពោលគឺមិនមែនអនុវត្តគោលនយោបាយគាំពារនិយម ដើម្បីកេងចំណេញឡើយ។ លោកបានសង្កត់ធ្ងន់ថា ថៃមិនស្អប់ទំនិញចិននោះទេ ប៉ុន្តែការប្រកួតប្រជែងត្រូវតែស្មើភាពគ្នា។

គួររំឭកថា នៅប៉ុន្មានថ្ងៃក្រោយកូនស្រីបង្កើតរបស់លោក គឺលោកស្រី ផែថុងថាន ស៊ីណាវ៉ាត់ត្រា (Paetongtarn Shinawatra) ត្រូវបានសភាថៃបោះឆ្នោតតែងតាំងជានាយករដ្ឋមន្ត្រីថ្មីរបស់ថៃ កាលពីពេលថ្មីៗជំនួសលោក ស៊្រីថា ថាវីស៊ីន នោះ លោក ថាក់ស៊ីន បានបង្ហាញជំហរគាំទ្រផែនការចែកលុយពលរដ្ឋ១៤,៥ពាន់លានដុល្លារអាម៉េរិករបស់បក្សកាន់អំណាច ហើយលោកបានគូសបញ្ជាក់ថា ផែនការនេះ គឺចាំបាច់ណាស់ ដើម្បីជួយជំរុញសេដ្ឋកិច្ចថៃ ឱ្យហក់ឡើង៕

ដោយ: តែម សុខុម