សមាគមអ្នកអភិវឌ្ឍន៍លំនៅឋានកម្ពុជាបរិច្ចាគថវិកាចំនួន៤៣៤លានរៀលដល់មូលនិធិគន្ធបុប្ផាកម្ពុជា ក្រោមយុទ្ធនាការ«១ម៉ឺនរៀល១ម៉ឺននាក់»

នាពិធីប្រគល់-ទទួលថវិកាកាលពីថ្ងៃទី២៩ ខែសីហា ឆ្នាំ២០២៥ លោកអ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជាបានគូសបញ្ជាក់ថា សមាគមបាននាំយកថវិកាចំនួន ៤៣៤លានរៀលប្រគល់ជូនដល់មូលនិធិគន្ធបុប្ផាកម្ពុជាក្រោមយុទ្ធនាការ«១ម៉ឺនរៀល១ម៉ឺននាក់» ឆ្នាំ២០២៥ ដោយថវិកាទាំងនេះ គឺទទួលបានពីការចូលរួមបរិច្ចាគពីសប្បុរសធម៌ ដែលជាសមាជិក នៃសមាគមអ្នកអភិវឌ្ឍន៍លំនៅឋានកម្ពុជា ខណៈកាលពីឆ្នាំ២០២៤ កន្លងទៅ សមាគមក៏បានចូលរួមបរិច្ចាគថវិកាជូនមូលនិធិគន្ធបុប្ផាកម្ពុជាចំនួន ៥៩,៩៩៩ដុល្លារផងដែរ។ ក្នុងនាមប្រធានសមាគម និងតំណាងឱ្យសមាជិក-សមាជិកានៃសមាគមលោកអ្នកឧកញ៉ា លី ហួរ បានសម្តែងការគាំទ្រយ៉ាងពេញទំហឹងនូវការផ្តួចផ្តើមដ៏ខ្ពង់ខ្ពស់ក្នុងការបង្កើតយុទ្ធនាការ«១ម៉ឺនរៀល១ម៉ឺននាក់» របស់មូលនិធិគន្ធបុប្ផាកម្ពុជា ដែលជាយុទ្ធនាការដ៏មានតម្លៃក្នុងការកៀរគរថវិកាប្រចាំឆ្នាំដ៏ធំមួយ ក្នុងបុព្វហេតុសង្គ្រោះជីវិតទារក និងកុមារ ព្រមទាំងស្រ្តីមានផ្ទៃពោះនៅកម្ពុជា។

នៅក្នុងឱកាសនោះដែរ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជាបានថ្លែងអំណរគុណយ៉ាងជ្រៅចំពោះលោកអ្នកឧកញ៉ា លី ហួរ និងថ្នាក់ដឹកនាំ សមាជិក-សមាជិកាសមាគមអ្នកអភិវឌ្ឍន៍លំនៅឋានកម្ពុជា ដែលតែងតែចូលរួមយ៉ាងសកម្មក្នុងការងារមនុស្សធម៌នាពេលកន្លងមក ជាក់ស្តែងដូចជាការចូលរួមបរិច្ចាគថវិកាជូនដល់មូលនិធិគន្ធបុប្ផាកម្ពុជានាពេលនេះ ដែលជាការចូលរួមមួយដ៏សំខាន់បំផុតក្នុងការចូលរួមជួយសង្គ្រោះជីវិតកុមារ ក៏ដូចជាផ្តល់ក្តីសង្ឃឹមដល់កុមារកម្ពុជា។ បើតាមការបញ្ជាក់របស់លោកជំទាវបណ្ឌិត យុទ្ធនាការ«១ម៉ឺនរៀល១ម៉ឺននាក់» នៅឆ្នាំ២០២៥នេះ គឺទទួលបានថវិកាបរិច្ចាគរហូតដល់ប្រមាណ៦លានដុល្លារពីសប្បុរសជនសរុបជាង៣០ម៉ឺននាក់ ដោយមិនទាន់បានបញ្ជូលថវិកាចំនួន៤៣៤លានរៀល ឬស្មើនឹងប្រមាណជាង១០ម៉ឺនដុល្លារដែលសមាគមអ្នកអភិវឌ្ឍន៍លំនៅឋានកម្ពុជាបានបរិច្ចាគនោះទេ ពោលគឺមានការកើនឡើងគួរឱ្យកត់សម្គាល់ធៀបនឹងថវិកាដែលទទួលបានកាលពីឆ្នាំមុនក្នុងចំនួនជាង៣លានដុល្លារ។

បើតាមការគូសបញ្ជាក់របស់លោកជំទាវ ប៉ែន សុបភា រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ និងជាអនុប្រធានប្រតិបត្តិមូលនិធិគន្ធបុប្ផាកម្ពុជាបានឱ្យដឹងថា មូលនិធិគន្ធបុប្ផាកម្ពុជាត្រូវការចំណាយថវិកាប្រមាណជាង៤៣លានដុល្លារនៅក្នុង១ឆ្នាំៗ ខណៈនៅក្នុងឆមាសទី១ឆ្នាំ២០២៥នេះ មន្ទីរពេទ្យគន្ធបុប្ផាបានចំណាយថវិកាអស់ប្រមាណជាង២០លានដុល្លារហើយ ដើម្បីបន្តបេសកម្មរបស់ខ្លួនក្នុងការផ្តល់សេវា និងព្យាបាលជំងឺដល់កុមារ និងទារក ព្រមទាំងស្រ្តីមានផ្ទៃពោះសរុបចំនួនប្រមាណ ៦៨១,៣៧០ករណី៕

អត្ថបទ សោម ស្រីពេជ្រ និងរូបភាព ប៉ុក វន្ថា