ឆ្លើយតបទៅនឹងសំណួរនេះ ក្រុមអ្នកជំនាញនៅក្នុងវិស័យសំណង់ និងអចលនទ្រព្យ បានអះអាងថា ផ្អែកតាមទិន្នន័យ និងការអង្កេតពីសកម្មភាពទីផ្សារបច្ចុប្បន្ន បានបង្ហាញឲ្យឃើញថា វិស័យសំណង់ ពិតជាបាននិងកំពុងកម្រើកឡើងវិញជាបណ្ដើរៗមែន ប៉ុន្ដែវាហាក់មានការកើនឡើងទៅតាមប្រភេទសំណង់ និងតំបន់អភិវឌ្ឍន៍មួយចំនួនតែប៉ុណ្ណោះ។
របាយការណ៍របស់ធនាគារជាតិនៃកម្ពុជា បានបង្ហាញថា ការផ្តល់កម្ចីឥណទានដោយគ្រឹះស្ថានធនាគារ និងហិរញ្ញវត្ថុ ទៅក្នុងវិស័យសំណង់នៅកម្ពុជា ក្នុងរយៈពេល១០ខែកន្លងមកនេះ មានទំហំទឹកប្រាក់សរុបប្រមាណ ៧ពាន់លានដុល្លារ មានការកើនឡើងជាង ៣៣% បើធៀបនឹងរយៈពេលដូចគ្នាកាលពីឆ្នាំមុន។ ទន្ទឹមនឹងការផ្តល់ឥណទាននៅក្នុងវិស័យសំណង់មានការកើនឡើង ក្រឡេកទៅមើលការនាំចូលសម្ភារសំណង់ពីក្រៅប្រទេសចូលមកកម្ពុជា នៅក្នុងរយៈពេល១១ខែនេះវិញ មានទំហំទឹកប្រាក់ជាង ១៤០០លានដុល្លារ បានកើនឡើងជាង ២២% ធៀបនឹងរយៈពេលដូចគ្នាឆ្នាំមុន។ នេះបើតាមស្ថិតិពាណិជ្ជកម្មរបស់ក្រសួងពាណិជ្ជកម្ម។
ពាក់ព័ន្ធនឹងតួលេខកំណើននៃវិស័យសំណង់នេះដែរ លោក សុខ ឡៃ អ្នកគ្រប់គ្រងទូទៅរបស់ក្រុមហ៊ុនម៉ៅការសំណង់ ពិស្ណុការ បានវាយតម្លៃថា ការកើនឡើងនៃការនាំចូលសម្ភារសំណង់ និងទំហំឥណទានសម្រាប់វិស័យសំណង់ គឺជាសញ្ញាណវិជ្ជមានមួយនៃការកម្រើកឡើងវិញជាបណ្តើរៗរបស់វិស័យសំណង់កម្ពុជា។
អត្ថបទគួរអាន
ជាក់ស្តែងទាំងគម្រោងសាងសង់របស់រាជរដ្ឋាភិបាល និងវិនិយោគឯកជន សុទ្ធសឹងតែមានសកម្មភាពកើនឡើងមកវិញ ពិសេសសំណង់អគារនៅក្នុងតំបន់ពាណិជ្ជកម្ម ដែលមានភាពមមាញឹកតែម្តង។ លោក សុខ ឡៃ បានបន្ថែមថា សញ្ញាណកើនឡើងនេះ ក៏បានបញ្ជាក់ពីការត្រៀមខ្លួនរបស់វិនិយោគិនក្នុងការចាប់យកឱកាសទីផ្សារសម្រាប់ឆ្នាំ២០២៥ ខាងមុខ ដែលរំពឹងថា ស្ថានភាពសេដ្ឋកិច្ចពាណិជ្ជកម្មនឹងល្អប្រសើរជាងមុន ក្រោយលោក ដូ ណាល់ត្រាំ ឡើងជាប្រធានាធិបតីសហរដ្ឋអាម៉េរិក។
ជាមួយគ្នានេះ លោក ប៉ូ អ៊ាវគង់ អគ្គនាយកក្រុមហ៊ុន អ៊ែតវ៉ានស៍ រៀលអ៊ីស្ទេត បានសង្កេតឃើញថា វិស័យសំណង់របស់កម្ពុជា បច្ចុប្បន្ន គឺមានសកម្មភាពកម្រើកឡើងវិញ ទៅតាមផ្នែកមួយចំនួនប៉ុណ្ណោះ ដូចជាគម្រោងសាងសង់ រោងចក្រឧស្សាហកម្ម រីសត និងកាស៊ីណូជាដើម។ ដោយឡែកសម្រាប់សកម្មភាពសាងសង់នៅក្នុងគម្រោងបុរីលំនៅឋានវិញ ហាក់មានសភាពទ្រឹងនៅឡើយ។
សូមជម្រាបថា ស្របពេលដែលការនាំចូលសម្ភារសំណង់មានការកើនឡើងគួរឱ្យកត់សម្គាល់ ការនាំចូលដែក និងដែកថែម នៅក្នុងរយៈពេល១១ខែឆ្នាំនេះ ក៏មានការកើនឡើងខ្ពស់ផងដែរ រហូតដល់ជាង ៦៥% និងមានទំហំទឹកប្រាក់ប្រមាណជាង ២៩២លានដុល្លារ។ នេះបើតាមស្ថិតិពាណិជ្ជកម្មរបស់ក្រសួងពាណិជ្ជកម្ម៕
