
ធនាគារកណ្តាលថៃ (BoT) បានព្យាករថា គ្រោះរញ្ជួយដីដ៏កំណាចកម្រិត៧,៧ រ៉ិចទ័រ ដែលផ្ដើមចេញពីប្រទេសមីយ៉ាន់ម៉ា កាលពីថ្ងៃសុក្រ សប្ដាហ៍មុន ដែលបានបណ្ដាលឱ្យអគារកម្ពស់៣៤ជាន់មួយ ដែលកំពុងសាងសង់នៅទីក្រុងបាងកក ដួលរលំរាបដល់ដី និងបណ្ដាលឱ្យអគារខ្ពស់ៗជាច្រើនទៀតនៅក្នុងទីក្រុងនេះ មានស្នាមប្រេះជាច្រើនកន្លែងដែលអាចនឹងឈានដល់ការវាយកម្ទេចចោលនោះ នឹងធ្វើឱ្យវិស័យអចលនទ្រព្យដែលកំពុងជួបការលំបាករបស់ប្រទេសថៃ កាន់តែយ៉ាប់យឺនបន្ថែមទៀត ជាពិសេសទីផ្សារខុនដូដែលមានកម្ពស់ខ្ពស់ៗ។
ការវាយតម្លៃបឋមរបស់ធនាគារកណ្តាលថៃ បានបង្ហាញថា គ្រោះរញ្ជួលដីនេះនឹងជះផលប៉ះពាល់ដល់សកម្មភាពសេដ្ឋកិច្ចក្នុងវិស័យសំខាន់ៗចំនួន៣ រួមមានវិស័យទេសចរណ៍ វិស័យតម្រូវការប្រើប្រាស់ក្នុងស្រុក និងវិស័យអចលនទ្រព្យ។
ឧបការីទេសាភិបាលធនាគារកណ្ដាលថៃ លោក សាកាផុប ផាន់យ៉ានុគុល (Sakkapop Panyanukul) បានព្យាករថា តម្រូវការជួល និងតម្រូវការទិញខុនដូ ដែលមានកម្ពស់ខ្ពស់ៗទំនងជានឹងធ្លាក់ចុះខ្លាំង ដោយសារគ្រោះមហន្តរាយរញ្ជួយដីកាលពីពេលថ្មីៗនេះបានធ្វើឱ្យមានការភ័យតក់ស្លុត និងធ្វើឱ្យទំនុកចិត្តរបស់អ្នកទិញធ្លាក់ចុះ។
សូមបញ្ជាក់ថា ស្ថានភាពដ៏អាក្រក់នេះកើតមានឡើង ស្របពេលដែលវិស័យអចលនទ្រព្យរបស់ប្រទេសថៃ កំពុងដាំក្បាលចុះស្រាប់ទៅហើយដោយសារការផ្គត់ផ្គង់ខ្ពស់ និងសន្ទុះតម្រូវការងើបឡើងវិញយឺតយ៉ាវ៕
ដោយ: តែម សុខុម