មានការលេចធ្លាយព័ត៌មានថា រុស្ស៊ី មិនបានធ្វើសម្បទានណាមួយ ដើម្បីបើកផ្លូវឈានទៅរកសន្តិភាពលើសង្រ្គាមនៅអ៊ុយក្រែន ប៉ុន្តែរុស្ស៊ី បានប្រកាសច្រានចោលចំពោះព័ត៌មានលេចធ្លាយនេះ។ រុស្ស៊ី បានចាត់ទុកព័ត៌មានលេចធ្លាយនេះថា គ្រាន់តែជាការប៉ុនប៉ង ដើម្បីបំផ្លាញកិច្ចខិតខំប្រឹងប្រែងស្វែងរកសន្តិភាពនៅអ៊ុយក្រែន តែប៉ុណ្ណោះ។
ប្រធានាធិបតីអ៊ុយក្រែន លោក វ៉្លូឌីមៀ ហ្សេឡិនស្គី បាននិយាយកាលពីថ្ងៃទី២៥ ខែវិច្ឆិកា ថា លោកបានត្រៀមខ្លួនរួចជាស្រេចក្នុងការធ្វើការ និងពិភាក្សាលើចំណុលមិនទាន់ច្បាស់លាស់ជាមួយសហរដ្ឋអាម៉េរិក លើផែនការ ដើម្បីបញ្ចប់សង្គ្រាមជាមួយរុស្ស៊ី ប៉ុន្តែលោកនៅតែមិនទទួលស្គាល់ការកាន់កាប់របស់រុស្ស៊ី នៅលើទឹកដីអ៊ុយក្រែន ដែលបញ្ហានេះអាចជាកត្តារាំងស្ទះមួយក្នុងការឈានទៅបញ្ចប់សង្គ្រាមនៅអ៊ុយក្រែន។
ចាប់តាំងពីកងកម្លាំងរុស្ស៊ី វាយចូលឈ្លានពានអ៊ុយក្រែន នៅឆ្នាំ២០២២ មកដល់ពេលនេះ កងកម្លាំងរុស្ស៊ី កំពុងគ្រប់គ្រងទឹកដីអ៊ុយក្រែន ប្រមាណជាង១៩%។ បច្ចុប្បន្នកងកម្លាំងរុស្ស៊ី កំពុងពង្រីក និងពង្វាតទឹកដីបន្ថែមទៀតពីកងកម្លាំងអ៊ុយក្រែន។
មកទល់ពេលនេះ ក្រោមកិច្ចខិតខំប្រឹងប្រែងរបស់លោក ត្រាំ ដែលបានសន្យាជាមួយពលរដ្ឋអាម៉េរិក នៅពេលឃោសនាបោះឆ្នោតថា នឹងនាំសន្តិភាពឱ្យអ៊ុយក្រែននោះ កំពុងដាក់ផែនការសន្តិភាពមួយឱ្យរុស្ស៊ី និងអ៊ុយក្រែន ទទួលយក។ ប៉ុន្តែអ្វីដែលពិភពលោកជាពិសេសអឺរ៉ុប និងអ៊ុយក្រែន កំពុងព្រួយបារម្ភនោះ គឺខ្លាចលោក ត្រាំ ជំរុញឱ្យអ៊ុយក្រែន ចុះហត្ថលេខាលើកិច្ចព្រមព្រៀងសន្តិភាព ដែលមានទំនោរទៅរកទីក្រុងមូស្គូ។ តែសម្រាប់អ្នកនាំពាក្យក្រសួងការបរទេសរុស្ស៊ី វាលឿនពេកហើយដែលត្រូវនិយាយពីបញ្ហានេះ៕
ដោយៈ សរ សុជាតិ
