ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានចាត់ទុកវេទិកា និងពិព័រណ៍កសិកម្ម ឆ្នាំ២០២៥ ដែលគ្រោងធ្វើឡើងចាប់ពីថ្ងៃទី១៣-១៦ ខែវិច្ឆិកា ជាវេទិកាប្រវត្តិសាស្រ្តដ៏ធំមួយសម្រាប់វិស័យកសិកម្មកម្ពុជា ហើយវានឹងក្លាយជាវេទិកាផ្គូរផ្គងរវាងភាគីពាក់ព័ន្ធក្នុងខ្សែច្រវាក់កសិកម្មរាប់ចាប់តាំងពីកសិករ អ្នកកែច្នៃ វិនិយោគិន និងអ្នកតាក់តែងគោលនយោបាយ ដើម្បីផ្សារភ្ជាប់ទំនាក់ទំនង ផ្លាស់ប្តូរគំនិត និងចាប់យកឱកាសថ្មីៗក្នុងការជំរុញការធ្វើពាណិជ្ជកម្ម និងវិនិយោគក្នុងវិស័យកសិស្បៀងអាហារនៅកម្ពុជា។ ក្រៅពីតាំងបង្ហាញផលិតផល វេទិការនេះ ក៏មានការបញ្ចូលការពិភាក្សាកម្រិតខ្ពស់ និងស៊ីជម្រៅ ដែលផ្តោតលើទីផ្សារ តម្រូវការ បរិយាកាសវិនិយោគ ជម្រើសហិរញ្ញវត្ថុ ខ្សែច្រវាក់ផ្គត់ផ្គង់ និងការដឹកជញ្ជូន។
ជាមួយគ្នានេះ ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ ជឿជាក់ថា វេទិកា និងពិព័រណ៍កសិកម្មនេះនឹងមិនបញ្ចប់ត្រឹមតែព្រឹត្តិការណ៍ចប់ក្នុងរយៈពេល៤ថ្ងៃនោះទេ ពោលគឺវានឹងផ្តល់ឱកាសឱ្យភាគីពាក់ព័ន្ធបន្តទំនាក់ទំនង និងសហការគ្នាតទៅមុខទៀត ដើម្បីស្វែងរក និងអនុវត្តចក្ខុវិស័យរួមសម្រាប់វិស័យកសិស្បៀងអាហារកម្ពុជា ក្នុងគោលបំណងធ្វើឱ្យកម្ពុជា ក្លាយជាទិសដៅដ៏ទាក់ទាញក្នុងតំបន់សម្រាប់ការធ្វើពាណិជ្ជកម្ម និងការវិនិយោគក្នុងវិស័យកសិស្បៀងអាហារ។
គួរជម្រាបថា ពិព័រណ៍កសិកម្មកម្ពុជា រយៈពេល៤ថ្ងៃខាងលើ នឹងមានការដាក់តាំងបង្ហាញផលិតផលកសិកម្ម គ្រឿងចក្រកសិកម្មទំនើបៗ បច្ចេកវិទ្យាដ្រូនកសិកម្ម បច្ចេកវិទ្យាកែច្នៃ ធាតុចូលកសិកម្ម និងសេវាកម្មផ្សេងៗប្រមាណ៤០០ស្តង់។ ជាមួយគ្នានេះ កសិករជាង៨ពាន់នាក់នៅទូទាំងប្រទេស នឹងត្រូវបានសម្របសម្រួលឱ្យចូលរួមទស្សនាពិព័រណ៍ដោយផ្ទាល់។ យ៉ាងណាមិញក្រសួងកសិកម្ម រំពឹងថា ព្រឹត្តិការណ៍នេះនឹងស្រូបទាញអ្នកចូលរួមបានប្រមាណជាង២ម៉ឺននាក់ក្នុងរយៈពេល៤ថ្ងៃនេះ៕
អត្ថបទ សោម ស្រីពេជ្រ
