ការក្រើនរំលឹកបែបនេះធ្វើឡើងក្រោយអ្នកជំនាញសង្កេតឃើញថា ការឆបោកតាមប្រព័ន្ធអនឡាញបានកើតមានឡើងជាបន្តបន្ទាប់ ក្រោយប្រព័ន្ធបច្ចេកវិទ្យាមានការរីកចម្រើនខ្លាំងនៅមួយរយៈចុងក្រោយនេះ។ ការជួញដូរភាគហ៊ុន ជាពិសេសឧបករណ៍និស្សន្ទហាក់បង្ហាញទំនោរធ្លាក់ចុះគួរឱ្យកត់សម្គាល់នៅមួយរយៈចុងក្រោយនេះ។ ជាក់ស្តែងទំហំជួញដូរក្នុងទីផ្សារឧបករណ៍និស្សន្ទ ឬការជួញដូរគម្លាតថ្លៃ សម្រេចបានប្រមាណ២០០លានដុល្លារប៉ុណ្ណោះកាលពីឆ្នាំ២០២៤។
ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា កត់សម្គាល់ឃើញថា ស្របពេលបច្ចេកវិទ្យាហិរញ្ញវត្ថុ និងបរិវត្តកម្មឌីជីថលមានការរីកចម្រើនការវិនិយោគលើឧបករណ៍ហិរញ្ញវត្ថុនៅក្នុងយុគសម័យបច្ចេកវិទ្យានេះ ក៏មានការប្រឈមផងដែរពាក់ព័ន្ធនឹងការឆបោកតាមប្រព័ន្ធអនឡាញក្នុងរូបភាពនៃការអូសទាញឱ្យដាក់ប្រាក់វិនិយោគ តាមមធ្យោបាយផ្សេងៗ ដូចជា ការបង្កើតគ្រុបតេឡេក្រាមដោយប្រើប្រាស់រូបភាពរបស់ថ្នាក់ដឹកនាំ ឬបុគ្គលល្បីៗ ដើម្បីកៀរគរសាច់ប្រាក់វិនិយោគ ដោយធានាផ្ដល់នូវផលចំណេញខ្ពស់។ ដើម្បីបង្ការការចាញ់បោកក្រោមរូបភាពនេះ ឯកឧត្តម លើកទឹកចិត្តឱ្យវិនិយោគិនទាំងអស់ត្រូវមានការប្រុងប្រយ័ត្នខ្ពស់ មុននឹងដាក់សាច់ប្រាក់វិនិយោគជាមួយបុគ្គល ឬក្រុមហ៊ុនណាមួយ ត្រូវប្រាកដថាជាក្រុមហ៊ុន ដែលមានអាជ្ញាបណ្ណត្រឹមត្រូវ និងត្រូវស្រាវជ្រាវព័ត៌មាននៃការវិនិយោគឱ្យបានច្បាស់លាស់ ព្រមទាំងរាយការណ៍អំពីការឆបោកទៅអាជ្ញាធរមានសមត្ថកិច្ចពាក់ព័ន្ធ។
អត្ថបទគួរអាន
ជាមួយគ្នានេះ លោក ជា សុធា អភិបាលនៃក្រុមហ៊ុនមូលបត្រ ភីភី លីង បានចាត់ទុកការឆបោកតាមប្រព័ន្ធអនឡាញក្រោមរូបទាក់ទាញវិនិយោគិនឱ្យបោះទុនវិនិយោគជាមួយការផ្តល់ប្រាក់ចំណេញខ្ពស់ គឺជាបញ្ហាប្រឈមមួយសម្រាប់ទីផ្សារជួយដូរឧបករណ៍និស្សន្ទ ហើយវាក៏ជាផ្នែកមួយធ្វើឱ្យការជួញដូរឧបករណ៍និស្សន្ទមានការធ្លាក់ចុះផងដែរ។ ជាមួយគ្នានេះអ្នកជំនាញរូបនេះស្នើឱ្យពលរដ្ឋ ក៏ដូចជាអ្នកវិនិយោគទាំងអស់ត្រូវចេះថ្លឹងថ្លែង និងសិក្សាឱ្យបានច្បាស់លាស់មុនសម្រេចចិត្តបោះទុនវិនិយោគជាមួយបុគ្គល ឬក្រុមហ៊ុនណាមួយ ដើម្បីកុំឱ្យខាតបង់ថវិកាដោយប្រការណាមួយ។
បើតាមការគូសបញ្ជាក់របស់ឯកឧត្តម ស៊ូ សុជាតិ នៅក្នុងឆ្នាំ២០១៧ ទំហំនៃការជួញដូរឧបករណ៍និស្សន្ទមានត្រឹមតែជិត៤លានដុល្លារអាម៉េរិក តែប៉ុណ្ណោះ ដោយការជួញដូរនេះបានកើនឡើងជាបន្តបន្ទាប់ ហើយនៅក្នុងឆ្នាំ២០២៤ ទំហំជួញដូរឧបករណ៍និស្សន្ទមានប្រមាណ២០០លានដុល្លារអាម៉េរិក។ តែយ៉ាងណាឯកឧត្តម បានអះអាងថា ទំហំជួញដូរនៅក្នុងឆ្នាំ២០២៤ មានការធ្លាក់ចុះខ្លាំងបើធៀបនឹងទំហំជួញដូរនៅក្នុងឆ្នាំ២០២២ និង២០២៣ ដែលចន្លោះនោះទំហំជួយដូរមានទំហំចន្លោះពី៣០០លានដុល្លារ ទៅ៤០០លានដុល្លារអាម៉េរិក។
ជាមួយគ្នានេះ ដើម្បីជួយជំរុញទំហំជួយដូរក្នុងទីផ្សារឧបករណ៍និស្សន្ទនៅកម្ពុជា ឱ្យកាន់តែមានភាពរីកចម្រើនបន្ថែមទៀតនោះ ក្រុមហ៊ុនមូលបត្រ ភីភី លីង និងធនាគារ អេស៊ីលីដា បានចុះកិច្ចព្រមព្រៀងសហប្រតិបត្តិការផ្ដល់ជូនវិនិយោគិនបរទេសនូវសេវាឥណទានវិនិយោគរួមគ្នា សំដៅទាក់ទាញការវិនិយោគពីបរទេសមកក្នុងទីផ្សារឧបករណ៍និស្សន្ទនៅកម្ពុជា៕
