សហរដ្ឋអាម៉េរិក ត្រៀមខ្លួនសម្រាប់ការវាយប្រហារ ដែលអាចកើតមានទៅលើអ៊ីរ៉ង់ នៅប៉ុន្មានថ្ងៃខាងមុខ ចំណែកលោក ពូទីន ថា មិនចង់និយាយពីរឿងនេះ

ជម្លោះរវាងអ៊ីស្រាអែល និងអ៊ីរ៉ង់ នៅតែមានការវិវឌ្ឍឥតឈប់ ហើយអាចនឹងមានការប្រួលដែលពិបាកនឹងប៉ាន់ស្មានដឹងជាមុន។ អ្នកមួយចំនួនក្នុងចំណោមប្រភពទាំងនោះបានប្រាប់សារព័ត៌មាន Bloomberg ថា ផែនការវាយប្រហារទៅលើអ៊ីរ៉ង់ របស់អាម៉េរិក អាចនឹងធ្វើឡើងនៅអំឡុងពេលចុងសប្ដាហ៍នេះ។ ថ្លែងទៅកាន់ក្រុមអ្នកសារព័ត៌មានកាលពីព្រឹកថ្ងៃទី១៨ ខែមិថុនា នៅខាងក្រៅសេតវិមានប្រធានាធិបតី ដូណាល់ ត្រាំ បានបដិសេធមិនបញ្ជាក់ថា តើលោកបានសម្រេចចិត្តថានឹងចូលរួមក្នុងយុទ្ធនាការសង្គ្រាមរបស់អ៊ីស្រាអែល ឬក៏អត់នោះទេ។

នៅពេលក្រុមអ្នកកាសែតសាកសួរថា តើលោកនឹងចូលរួមក្នុងយុទ្ធនាការសង្គ្រាមរបស់អ៊ីស្រាអែល ឬយ៉ាងណា លោក ដូណាល់ ត្រាំ បានឆ្លើយថា លោកប្រហែលជាចូលរួម ហើយក៏អាចមិនចូលរួម គឺលោកចង់មានន័យថា គ្មាននរណាម្នាក់ដឹងមុនថា លោកនឹងធ្វើអ្វីនោះទេ។

ងាកទៅប្រធានាធិបតីរុស្ស៊ី លោក វ្ល៉ាឌីមៀ ពូទីន ឯណោះវិញ នៅថ្ងៃទី១៩ ខែមិថុនា នេះបានបដិសេធមិនជជែកអំពីលទ្ធភាព ដែលអ៊ីស្រាអែល និងសហរដ្ឋអាម៉េរិក អាចនឹងសម្លាប់មេដឹកនាំកំពូលរបស់អ៊ីរ៉ង់ គឺលោក អាយ៉ាតូឡាស អាលី ខាមេណី (Ayatollah Ali Khamenei) នោះទេ ហើយបានសង្កត់ធ្ងន់ថា ពេលនេះ ប្រជាជនអ៊ីរ៉ង់ នៅក្រុងតេហេរ៉ង់ កំពុងបង្ហាញការសាមគ្គី និងការគាំទ្រកាន់តែខ្លាំងចំពោះរដ្ឋាភិបាល និងមេដឹកនាំរបស់អ៊ីរ៉ង់ ជាពិសេសអំឡុងស្ថានការណ៍ដ៏តាងតឹងនេះ។

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានធ្វើការប៉ាន់ស្មានដោយបើកចំហថា ការវាយប្រហារយោធារបស់អ៊ីស្រាអែល អាចបណ្តាលឱ្យមានការផ្លាស់ប្តូររបបនៅក្នុងប្រទេសអ៊ីរ៉ង់ ខណៈដែលប្រធានាធិបតីអាម៉េរិក លោក ដូណាល់ ត្រាំ បាននិយាយកាលពីថ្ងៃអង្គារ ដើមសប្ដាហ៍នេះថា សហរដ្ឋអាម៉េរិក បានដឹងពីកន្លែងដែលមេដឹកនាំកំពូលរបស់អ៊ីរ៉ង់ គឺលោក អាយ៉ាតូឡាស អាលី ខាមេណី (Ayatollah Ali Khamenei) លាក់ខ្លួនហើយ ប៉ុន្តែទីក្រុងវ៉ាស៊ីនតោន នឹងមិនសម្លាប់គាត់ទេ នៅពេលនេះ៕

ដោយ: តែម សុខុម