គោលនយោបាយពន្ធគយថ្មីរបស់លោក ត្រាំ ធ្វើឱ្យផ្សារហ៊ុនអាម៉េរិកក្រឡាប់ចាក់ខាតបង់ធ្ងន់ករហូតដល់២,៤ទ្រីលានដុល្លារត្រឹមរយៈពេល១ថ្ងៃ

S&P 500 ដែលជាសន្ទស្សន៍ផ្សារហ៊ុននៃក្រុមហ៊ុនឈានមុខគេទាំង៥០០របស់សហរដ្ឋអាម៉េរិកបានដាំក្បាលចុះរហូតដល់ទៅជិត៥% បណ្ដាលឱ្យខាតបង់ធ្ងន់កដល់ទៅ២,៤ទ្រីលានដុល្លារ ក្នុងពេលត្រឹមតែមួយថ្ងៃកាលពីថ្ងៃព្រហស្បតិ៍ ទី៣ ខែមេសា នៅពេលដែលលោក ដូណាល់ ត្រាំ ប្រកាសដាក់ពន្ធគយថ្មីលើប្រទេស និងដែនដីសរុបជាង១៨០ ដែលបង្កឱ្យមានការព្រួយបារម្ភអំពីសង្គ្រាមពាណិជ្ជកម្ម និងសេដ្ឋកិច្ចពិភពលោកដាំក្បាលចុះ។

ទិន្នន័យផ្លូវការបានបង្ហាញថា គ្រាន់តែក្រុមហ៊ុនយក្សទាំង៧របស់សហរដ្ឋអាម៉េរិក រួមមានក្រុមហ៊ុន Apple, Amazon, Microsoft, Nvidia, Alphabet, Meta និងក្រុមហ៊ុន Tesla បានបាត់បង់តម្លៃទីផ្សាររួមបញ្ចូលគ្នាយ៉ាងសម្បើមរហូតដល់ទៅ១,០៣ទ្រីលានដុល្លារ។

ជាការកត់សម្គាល់ ភាគហ៊ុនរបស់ក្រុមហ៊ុន Apple បានដាំក្បាលចុះខ្លាំងជាងគេដល់ទៅជាង៩% ដែលជាការធ្លាក់ចុះធ្ងន់ធ្ងរបំផុតមិនធ្លាប់មានក្នុងរយៈពេលជាង៥ឆ្នាំមកនេះ។ ចំណែកភាគហ៊ុនរបស់ក្រុមហ៊ុន Amazon ក៏បានធ្លាក់ចុះដល់៩%ដែរ ខណៈដែលផ្សារហ៊ុន Nasdaq បានធ្លាក់ចុះ៦%ដែលជាធ្លាក់ចុះខ្លាំងបំផុតរបស់ខ្លួនចាប់តាំងពីឆ្នាំ២០២០ មក។

ក្រុមអ្នកវិភាគបានព្រមានថា ពន្ធគយដ៏ចម្រូងចម្រាសរបស់លោក ដូណាល់ ត្រាំ អាចបណ្ដាឱ្យសេដ្ឋកិច្ចពិភពលោកដាំក្បាលចុះ ទោះជាក្រុមមន្ត្រីសេតវិមានបានព្យាយាមនិយាយសម្រាលប្រតិកម្មរបស់ទីផ្សារយ៉ាងណាក្ដី៕

ដោយ: តែម សុខុម