តែទោះជាយ៉ាងណាក៏ដោយអ្នកជំនាញសេដ្ឋកិច្ចវាយតម្លៃថា នេះគឺជាសញ្ញាណនៃភាពរឹងមាំក្នុងវិស័យផលិតកម្ម និងសមត្ថភាពប្រកួតប្រជែងរបស់កម្ពុជា នៅលើឆាកអន្តរជាតិ។
យោងតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា នៅក្នុងខែមករា ឆ្នាំ២០២៦ ការនាំចេញរបស់កម្ពុជា ទៅកាន់សហរដ្ឋអាម៉េរិក មានទំហំទឹកប្រាក់រហូតដល់១,២៨២លានដុល្លារ ដែលស្មើនឹងប្រមាណ៤៣,៩% នៃការនាំចេញសរុបរបស់កម្ពុជា។
លោកបណ្ឌិត ឌុច ដារិន្ទ អ្នកជំនាញសេដ្ឋកិច្ច បានលើកឡើងថា តួលេខនេះបានបង្ហាញពីសមត្ថភាពខ្ពស់របស់កម្ពុជា ក្នុងការឆ្លើយតបទៅនឹងទីផ្សារដែលមានស្តង់ដា និងអំណាចទិញខ្លាំង។ លោកបណ្ឌិតបានបន្ថែមថា ស្ថានភាពនេះជាសញ្ញាវិជ្ជមានក្នុងការបង្កើតការងារ បង្កើនប្រាក់ចំណូល និងជំរុញកំណើនសេដ្ឋកិច្ចជាតិ។
ដោយឡែកពាក់ព័ន្ធនឹងការនាំចូលពីប្រទេសចិន ដែលមានទំហំទឹកប្រាក់១,៧៤០លានដុល្លារ ឬស្មើនឹងជាង៥៦% នៃការនាំចូលសរុបរបស់កម្ពុជាវិញ លោកបណ្ឌិត ឌុច ដារិន្ទ បានពន្យល់ថា ការនាំចូលពីចិនភាគច្រើនជាវត្ថុធាតុដើម ដែលមានតួនាទីយ៉ាងសំខាន់ក្នុងការគាំទ្រដល់វិស័យផលិតកម្មក្នុងស្រុក និងជាខ្សែច្រវាក់ផ្គត់ផ្គង់ដ៏ចាំបាច់ ដើម្បីជំរុញការនាំចេញបន្តទៅកាន់ទីផ្សារអន្តរជាតិធំៗដូចជាសហរដ្ឋអាម៉េរិក និងជប៉ុនជាដើម។
គួរបញ្ជាក់ថា នៅក្នុងខែមករា ឆ្នាំ២០២៦ កន្លងទៅការនាំចេញរបស់កម្ពុជា ទៅសហរដ្ឋអាម៉េរិក សម្រេចបានជាង១,២ពាន់លានដុល្លារ ស្មើនឹង៤៣,៩% នៃការនាំចេញសរុបរបស់កម្ពុជា ខណៈការនាំចេញរបស់កម្ពុជា ទៅចិន មានទំហំត្រឹមតែ១៦៥លានដុល្លារតែប៉ុណ្ណោះ។ ជាមួយគ្នានេះកម្ពុជា បាននាំចូលទំនិញពីចិន មានទំហំរហូតដល់ជាង១,៧ពាន់លានដុល្លារ ឬស្មើនឹងជាង៥៦% នៃការនាំចូលសរុបរបស់កម្ពុជា តែកម្ពុជា នាំចូលពីអាម៉េរិក មានទំហំត្រឹមតែជាង៣៨លានដុល្លារតែប៉ុណ្ណោះ។ នេះបើតាមទិន្ន័យរបស់អគ្គនាយកដ្ឋានគយ និងរដ្ឋាករកម្ពុជា៕
អត្ថបទ៖ បូ ដូឡា
